قصص و روايات - قصص رومانسية :

رواية ما بعد الرحيل للكاتبة ياسمين أحمد الفصل التاسع

رواية ما بعد الرحيل بقلم ياسمين أحمد

رواية ما بعد الرحيل للكاتبة ياسمين أحمد الفصل التاسع

تانى يوم جاسم اخد اللوحه وراح بروزها وحطها فى شنطه عربيته لحد مايبقى يرجع القصر كان ماشى فى العزبة سرحان وشارد والكل فى التوقيت دة كان نايم ماعدا مايسه اللى لمحها وهو بيتمشى واقفه ناحيه اسطبل الحصنه وبتأكل الحصان بتاعه قطع سكر وبتملس على شعرة بحنان وهى بتكلم نفسها وشاردة وسرحانه.

مايسه وهى شارده : ياترى صاحبك حنين زيك ولالا ... وكل دة وهى مش واخدة بالها ان جاسم موجود وواقف وراها .
جاسم بهدوء : واضح انك بتحبى الخيل .
مايسه شهقت : حرام عليك والله كل مرة كدة.
جاسم ضحك : هههههههه اه قولتيلى بقى دة انتى طلعتى خوافة وبتخافى من ظلك .
مايسه بصلته : دة مش صحيح انا مش خوافة خالص .
جاسم قرب منها وبص فى عينيها بشوق: امال اتخضيتى ليه لما كلمتك .

مايسه بغيظ : لانى ماكنتش اعرف ان سيادتك هنا ارتحت .
جاسم قرب منها اكتر وبص لشفايفها برغبه قوية ولكن بعد عنها بسرعة وكمل كلامه .
جاسم : ها مقلتليش بقى بتحبى الخيل ولالا ؟
مايسه بجديه : جدا تعرف ياجاسم ساعات بحس ان الحيوانات فيهم رحمه ووفاء مش موجودة فى البنى آدمين تحس كدة انهم عالم بيور مافيهوش كدب ولا لوع ولاخداع ولانفاق .
جاسم : عندك حق بس هو انتى بتعملى ايه ؟
مايسه : بأكلهم سكر اشمعنى ؟

جاسم بضحك :عارفة انتى غريبه اوى الصراحه .
مايسه : اشمعنى غريبه علشان بأكل الحصان سكر ليه دول مهما كانوا كائنات بتحس زينا بالظبط.
جاسم : انتى عارفة ان السكر غالى يعنى احنا اولى بيه من الحصنه مش كدة ولاايه.
مايسه بثقه : ولو الحصان وهو مش بيحس وبيعرف باللى يخاف عليه ويحضتنه زي البنى آدم بالظبط وبيفرح وبيحزن كمان .

جاسم اعجب بطريقه مايسه وكلامها وفضل يقرب منها بشويش لحد مابقوا قدام بعض عينيهم اتقابلت فى نظرة طويله فضلوا باصين لبعض ولان لغة العيون كانت ابلغ من اى كلام تانى جاسم حاول يقرب منها علشان يبوسها بس هى كانت اسرع منه وحطت ايدها على شفايفه .2

مايسه : لا ياجاسم ارجوك صدقنى ماينفعش........ جاسم تدارك موقفة فبعد عنها بسرعة لكن فضل يبصلها ويملى عينه منها وبيبقى فرحان فى وجودة معاها.
جاسم بنتهيدة : عارفة يامايسه عينكى فيهم شقاوة وفيهم سحر غريب جدا تعرفى انا عرفت ستات كتيرة اوى بس مش عارف بجد ليه كل ماببص فى عينكى بيشدونى زى المغناطيس وجمال عيونك الخضراء عاملين زى الزرع الاخضر اللى لسه نابت حلوين اوى .

مايسه اتكسفت اوى ومعرفتش ترد بصت فى الارض بخجل وجاسم رفع وشها بايدة وفضل يبصلها تانى واتقابلت عيونهم من جديد هى كمان ماتنكرش انها معجبه بيه وبوسامته وجاذبيته التى لاتقاوم .

جاسم بحمحمه : احممممم بقولك ايه انتى عمرك ركبتى خيل ؟
مايسه : تؤتؤ لانى بخاف اوى منهم دة غير انى معرفش حتى بتتركب ازاى .
جاسم باستغراب : غريبه مع ان لما كنا فى بلدكم اغلب الناس بيركبوا خيل فأزاى ماتعرفيش بتتركب ازاى؟
مايسه : كلامك صح بس لان بابا وماما اتجوزوا فى المدنيه فماكنتش بروح البلد كتير الا لو للضرورة القصوى .
جاسم : طيب تعالى وانا اقولك بتتركب ازاى .......... وفجأة وبدون مقدمات جاسم شالها من خصرها وراح رافعها على ظهر الحصان .
مايسه صرخت : لالالالا ابوس ايدك ياجاسم نزلنى انا خايفه موووووت .
جاسم بضحك : خلاص خدى بوسى ايدى .
مايسه بغيظ : ماتبقاش رخم بقى ونزلنى .

جاسم : تؤتؤ .......... وفجأه ركب الحصان معاها وهو قدامها وركبها وراه وطلب منها انها تتمسك بيه بقوة وبدأ يجرى بالحصان وهو فرحان ومبسوط اوى ان مايسه معاة وقريبه منه صحيح كانت خايفه ومرعوبة الا ان وجود جاسم معاها طمنها شوية كانت مكسوفه اوى بس كانت حاسه انها فى عالم تانى ودنيا تانيه خالص وخصوصا انها متمسكه بيه بقوة من خصرة لانها خايفه انها تقع وكانها فى الجنه فى دنيا جميله وبعد شويه خوفها دة قل لان وجود جاسم عمل لها نوع من الهدوء النسبى لكن وجودة فى حد ذاته وقريب اوى منها بالشكل دة اربكها وخلاها تتنفس بقوة وصوت ضربات قلبها بتصدر صوت عالى ويمكن جاسم نفسه كان سامع صوت قلبها وفى نفس الوقت كانت حاسه انها زى الطير الحر فى السما مش عليه اى قيود وهى محوطاة علشان مش تقع من على الحصان .

جاسم بصوت هادى جدا ووالتفت لها وبصلها باعجاب : هايامايسه لسه خايفه ؟
مايسه ابتسمت : لا خلاص انا بقيت كويسه خالص .
جاسم بمكر : يعنى مستعدة ؟
مايسه باستغراب : مستعدة لاايه مش فاهمة ؟
جاسم بمكر وضيق عينه واتكلم بخبث : بصى بقى انا لفيت بيكى العزبة شويه صغيره انما دلوقتى انا مصمم انى الف بيكى العزبة كلها وبسرعة كمان قلتى ايه ؟
مايسه : لاياجاسم ارجوك بلاش انا كدة هادوخ .انت مجنون.

جاسم بضحك : هههههه ولسه هاتشوفى الجنان اللى بجد ....... فجأة انطلق بالحصان بسرعة كبيرة وفضل يجرى بالحصان ومايسه خايفه وبتصرخ وتضحك بس كانت برغم دة كله الا انها كانت سعيدة جدا والسعادة ماليه وشها وملامحها وهو بيجرى بيها على الحصان فى العزبة كلها كانت حاسه بأحساس وشعور غريب وجديد من نوعة عمرها ماحست بيه ناحيه خطيبها الاولانى بالرغم انها كانت بتحبه الا ان العلاقة كانت ما بينهم باردة جدا كانت فعلا خلاص كأنها ملكت الدنيا وهى بين ايد جاسم وفضلوا مع بعض وهو بيدور بيها لحد ماالنهار طلع عليهم هدى شويه ووقف بالحصان ونزل ومسكها من خصرها ونزلها بالراحه .

جاسم بابتسامه : تعرفى اول مرة اشوفك سعيده ومبسوطه كدة .
مايسه بارتباك : اااااااا انا مش عارفة مالى ايه اللى بيحصل لى ...... سكتت شويه وبعدين كملت كلامها جاسم ممكن اطلب منك طلب وارجوك تنفذة ليا ؟
جاسم بجديه : اكيد طبعا اتفضلى .
مايسه : ارجوك ابعد عنى بلاش تقرب منى اكتر من كدة .
جاسم بصدمه : انتى خايفة منى يامايسه ؟
مايسه بضيق : الصراحه اه ماخبيش عليك خايفه اقرب منك اوى فى يوم احبك وتكون بتلعب بمشاعرى .
جاسم صعق من كلامها معقول تكون فكرتها عنه كده .

جاسم بضيق وعدم تبرير علشان يخرج نفسه من الموقف دة : مايسه انتى لازم تعرفى حاجه مهمة اوى انا بعتبرك مجرد صديقه مش اكتر .
مايسه ظهر فى عينيها الحزن لكن استجمعت نفسها لانها مش بتحب تظهر ضعفها قدام اى حد مهما كان .
مايسه : عارفة وعلشان كدة بقولك بلاش تخلينى احبك ارجوك انا مش مستعدة قلبى ينجرح من تانى .
جاسم بأحاسيس مرتبكه : على فكرة انتى واخده عنى فكرة غلط خالص انا صحيح عرفت بنات كتيرة اوى بعدد شعر راسى لكن اوكد لك ان مافى واحده منهم ملت عينى .
مايسه باستغراب : مش ممكن طب وداليا ؟

جاسم بضيق لما ذكرت اسم داليا : صدقينى لحد دلوقتى انا نفسى مش عارف احساسى ايه من ناحيتها انا ساعات كتير بحس انها بتحبنى وساعات تانيه اشوفها انانيه ومش بيهمها غير مصلحتها وبس المهم سيبك منها...... سكت شويه وبعدين كمل كلامه : اه بالحق فى حاجه مهمة كنت عاوز اقولك عليها .
مايسه : اة اوى اتفضل قول .
جاسم : بعد يومين ان شاء الله هانعمل مسابقه خيل هنا فى العزبة وهانخصص لها مكان معين اية رايك لو تكونى موجودة وتشجعينى .
مايسه : طبعا اكيد هابقى موجودة .....سكتت شويه وبعدين كملت: اممممم طب وشغلك مش هاتروحه .
جاسم : لا طبعا اكيد هاروح الشغل اليومين دول قبل ميعاد المسابقة .

مايسه : ماتقلقش ان شاء الله هأكون موجودة هى المسابقة هاتبدأ الساعة كام ؟
جاسم : يعنى على الساعه 4 العصر .
مايسه : ربنا معاك وبالتوفيق ان شاء الله .
جاسم : ياااااااارب دعواتك بقى اه بالمناسبه انا نسيت اشكرك على الصورة وعلى الوردة الجميله كمان وبتمنى انك تسمعى كلامى وتفتحى معرض باسمك انا عاوزك ناجحه وسعيدة فى حياتك .
مايسه بسعادة : ان شاء الله عن اذنك بقى لان زمان بابا وماما صحيوا وعلشان اجهز لهم الفطار ..... وسابته ومشيت وهو متلخبط والحيرة اللى شغلت قلبة .

داليا كانت صحيت وشافتهم وهما بيتكلموا وكانت بتجز على اسنانها لكن الحمد لله انها ماشافتهمش وهما راكبين مع بعض الحصان والا كانت الامور اتعقدت اكتر عدى النهار كله كانت مايسه فى الشقه اللى فيها هى واهلها وكانت بتتجنب انها تشوفه اوحتى تلمحه ولو شافته كانت بتتجاهل تبصله كانت عاوزة تهرب من المشاعر اللى سيطرت عليها عاوزة تقتل قلبها قبل ماتحبه وتتعلق بيه وهانى جه فجأة وكأنه طوق نجاة علشان مش تشوفه قدامها .

هانى : وحشتينى ياماما وحشتنى يابابا وحشتينى يابت يامايسو .
مايسه كانت بتحاول تبان قوية علشان محدش يلاحظ ارتباكها .
مايسه : وانت اكتر ياهانى وحشتنى اوى .
هانى : وانتوا اكتر ياحبيبتى ..... وقعد معاهم شوية وبعدين سأل عن ندى .
هانى : امال فين ندى ماشوفتهاش من ساعة ماجيت .

مايسه: مش عارفة ممكن تلاقيها واقفه عند حوض الورد .
هانى : احمممم طب عن اذنكم اروح اطمن عليها وارجع ... وسابهم ومشى وراح لندى
جاسم كان واقف قريب من الشقه اللى فيها مايسه نفسه يشوفها وهى اللى كانت بتحاول تهرب منه بأى طريقة ممكنه حتى لما عملت لهم الاكل بعتته مع واحدة من العاملات اللى فى العزبة ومرضيتش تروح بنفسها ودة فى حد ذاته جننه وبقى قلقان عليها .

داليا جت وراه : حبيبى مالك قلقان ليه انت بتدور على حاجه هنا ؟
جاسم انتبه : ها لا ابدا ياداليا مافيش .
داليا بخبث : عليا انا برضه دة انا داليا حبيبتك بتخبى عليا قولى بقى ارجوك مالك سرحان وقلقان ليه .
جاسم بحدة : قلتلك مافيش حاجه ياداليا .
داليا : حبيبى اهدى طب ايه رايك تيجى نتمشى انا وانت فى العزبة شوية .

جاسم بزهق : طيب ماشى اتفضلى ......... جاسم سرح وفكر فى الكلام اللى قلته مايسه له الصبح انها خايفه تقرب منه وتحبه فيلعب بمشاعرها او يكسرها قد ايه كره الفكرة دى انها بتبصله انه ممكن يكون زى خطيبها السابق وائل كل دى اسئله محيراه وملخبطاة بس الاكيد انه كان مبسوط وسعيد جدا الفترة اللى قضاها وهى معاة على الحصان قبل ماحد يصحى ويشوفهم مع بعض لحد ماداليا خرجته من شرودة دة .

داليا : حبيبى انت مش معايا خالص
جاسم بضيق : عاوزة ايه ياداليا ؟
داليا : حبيبى انت معايا ومع ذلك مش حاسه بوجودك .
جاسم : ماانا معاكى اهوة عاوزة ايه تانى .
داليا بغل : لا انت مش معايا خالص بدليل انى عماله بكلم فيك من الصبح وبرضه مابتردش عليا ودى مش اول مره قد كدة امرها يهمك اوى ؟
جاسم : ها مين دى اصلا انا مش فاهم الصراحه .

داليا بغيظ : انت هاتستعبط انت عارف وفاهم كويس اوى انا بتكلم عن مين .
جاسم بتنهيدة وزهق : بقولك ايه ياداليا خليكى دوغرى ومن غير لالف ولادوران تقصدى مين بكلامك دة .
داليا بكره وحقد : اقصد اللى ماتتسماش اللى اسمها مايسه .
جاسم بحده وغضب : تانى وتالت وعاشر انا بسالك فى ايه بينك ومابينها ليه مش بتحبيها ليه كميه الكرة والغل اللى جواكى دة لها انا لازم افهم الاسباب ومش هامشى من هنا غير لما اعرف كل حاجه .

داليا بتتصنع الكدب : اوك هاحكيلك كل حاجه بص ياسيدى من واحنا صغيرين كان الكل بيحبها وبيقرب منها وبينبذونى مع العلم انى مش اقل منها فى حاجه بالعكس انا احلى منها بكتير المهم فضلنا مع بعض لحد الثانويه .........سكتت شويه وبعدين عيطت بدموع التماسيح وبكدب : اهىء اهىء كان فى واحد فى مدرسه البنين اللى جنبنا كان بيحبنى وهى طلعت خطافة وخطفته منى وبعدها مش شوفتها غير فى العزبة هنا عرفت حبيبى ليه بعاملها كده لانى خايفه لاتخطفك منى .

جاسم ببرود : اطمنى هى بالنسبه ليا مش اكتر من صديقه وبس .
داليا بنتهيدة : بتمنى ان يكون اهتمامك فعلا مجرد صداقه وبس .
جاسم : طيب عن اذنك بقى ياداليا .
داليا ومسكته من دراعه : استنى بس رايح فين .
جاسم : راجع الشركه علشان ورايا شغل كتير لازم اخلصه قبل ماتبدأ المسابقه .

داليا : اوك حبيبى بس مش تتأخر لانك بتوحشنى .

وقربت منه وباسته من خدة وهو بعدها عنه ومشى وهو مش قادر يبطل تفكير فى مايسه اللى ظهرت فى حياته وشقلبت كيانه وهل فعلا كلام داليا صحيح من انها كانت بتحب واحد قبل خطيبها ولا الكلام دة كله كدب وهل فعلا زى ماقالت داليا ان امرها يهمه طب ازاى وهو بيقول انها مجرد صديقه اللخبطه اللى جواة مش عارف لها اول من اخر ومش عارف مين فيهم الصح ومين فيهم الغلط مين الصادق ومين الكداب ركب عربيته وطلع على القصر الاول لحد ماوصل اوضته وحط الصورة اللى رسمتها مايسه له وفضل يتأملها شويه وبعدين نزل مره تانيه وطلع على الشركه علشان يتابع الشغل .

ونروح عند هانى وندى .
هانى : ازيك ياندى عامله ايه دلوقتى احسن .
ندى التفت له وهانى مد ايدة علشان يسلم عليها لكنها اترددت كتير تسلم ولالا وبعدين يدوب مدت ايدها وسلمت بسرعه وبعدين بعدت ايدها : حمدا لله على السلامه ياهانى انت جيت امتى؟
هانى : لسه واصل من شوية المهم طمنينى عليكى .
ندى : الحمد لله تمام طمنى اخبار شغلك ايه والرحلات عامله ايه معاك .
هانى بضحك : طالع عينى وعين اللى خلفونى بس الحمد لله اهوة كويس ..... سكت شويه وبعدها اتكلم: ندى .
ندى : نعم .

هانى : لو قلتلك انك وحشتينى هاتصدقينى .
ندى بمشاعرها الجديدة اللى حستها من ناحيه هانى وبصت للارض بخجل واتكلمت بكسوف : وانت كمان ياهانى .
هانى بحب : ندى انا انا انا بحبك اوى ومن زمان بس كنت متردد انى اقولك كدة لانك ساعتها كنتى مرتبطه بحازم
ندى : انت بجد انسان طيب جدا ياهانى ويمكن اسلوبك وتعاملك مع اهلك خلانى اثق فيك واحترمك بس انا عاتبه عليك .
هانى : لسه بس انا عملت ايه ؟

ندى بعتاب : يعنى لو كنت وحشتك بجد كنت سألت عنى طول الاسبوع اللى فات دة .
هانى بضحك :معلش حقك عليا بس انا مقدرش على زعلك .
ندى : لااوعى انا مخصماك .
هانى بضحك : مش ممكن يعنى ياربى يوم مااحب احب طفله.
ندى بغيظ : طالما انت شايفنى طفله خلاص ماتكلمنيش .

هانى شدها من دراعها وبصلها بحب : لااوعى انا بزعل على زعلك ..... سكت شويه واتنهد : انتى وحشتينى اوى ياندى
ندى : هانى سيب دراعى وبطل هزار بقى علشان محدش يشوفنا .
هانى بمكر وبص فى عينيها وقرب منها اوى : ايوة انتى معاكى حق بس اعمل ايه بحبك .
ندى بكسوف ووشها فى الارض : وانا كمان .
هانى بسعادة : الله اكبر قالتها لا قوليها تانى ياندى الله يخليكى .
ندى : بحبك .

هانى بصوت عالى : اسمعوا يابشر حبيبتى قالتلى بحبك .
ندى : وطى صوتك ياهانى واعقل يامجنون .
هانى بهمس : بعشقك ياندوشتى .
ندى : اسكت بقى لانى عارفة انك مش هاتجيبها البر غير وانت متعلق فى ايد جاسم وبابا .
هانى بضيق : ليه بس بتفكرينى اللهم اخذيك ياشوشو .
ندى بضحك : مجنون.
هانى : طب تعالى بقى ياقلب المجنون علشان عاوز اقولك كلمه فى بقك اقصد كلمه فى ودنك .

فضل هانى وندى يضحكوا مع بعض ويهزروا بس كانت داليا قريبه منهم وسمعت ضحكهم وهزارهم وطبعا مكدبتش خبر وراحت تبلغ محمد .

داليا بمكر ومسكنه : عاجبك كدة ياعمى .
محمد بضيق : نعم فى ايه يابنت السويفى .
داليا : يرضيك اللى بتعمله ندى هى والواد اللى شغال هو وعيلته فى العزبة .
محمد : واد مين دة ؟
داليا : الواد اللى اسمه هانى وتقريبا له اخت اسمها ايه ياربى اسمها ايوة افتكرت اسمها مايسه صح .
محمد : مالهم يابنتى اظن انا عارف تربيه ندى بنتى ومربيها صح .
داليا مطت شفايفها واتكلمت بكدب: لا ياعمى ده كان مقرب منها وكان عاوز يعنى استغفر الله العظيم يبوسها وكدة دول بستغفلوك ياعمى وانت مش دريان .
محمد بحدة : اولا لسه مااتخلقش اللى يستغفلنى يابنت السويفى وتانى مرة ماتدخليش فى اللى ملكيش فيه وبعدين ايه بيستغفلونى دى لو سمحتى اعملى احترام للمكان اللى انتى موجودة فيه ولو المكان مش عاجبك ممكن ابعتلك السواق يرجعك الفيلا لو عاوزة .
داليا بتصنع الحزن : بقى دى جزاتى ياعمى انى بوعيك وخايفه على ندى دى حتى زى اختى بالظبط ويعنى مش عاوزاها تعمل حاجه كدة ولاكدة لاقدر الله .1

محمد بحدة وضيق : خلاص خلصتى كلامك بس فى حاجه مهمه اوى بقى علشان نبقى واضحين اولا ندى بنتى متربيه على الخلق والدين والالتزام ثانيا بقى مش هأسمح لجنس مخلوق انه يتكلم عنها ربع كلمه ثالثا وهو دة الاهم لو بنتى غلطت فأنا اللى اعاقبها واظن لحد كدة والكلام خلص واتفضلى ارجعى مكان ماكنتى وانا هاتصرف بنفسى معاها .

داليا بمسكنه : انا اسفه والله ياعمى ماقصدش طبعا انى اشوة سمعتها بس زى ماقلتلك انى خايفه عليها مش اكتر ومش حابه حد يلسن عليها بالكلام وبعتذر لحضرتك كمان مرة عن اذنك بقى ......... وسابته وبعدت بعيد علشان تعرف تتكلم مع شريف .

محمد راح لحد المكان اللى كانت ندى وهانى قاعدين فيه وعمالين يضحكوا ويهزروا مع بعض .
محمد بغضب : الله الله بقى هو دة اللى اتفقنا عليه ياندى بتكسرى كلامى وبتعيدى نفس غلطتك القديمه .
هانى : لو سمحت ياعمى اسمعنى بس .
محمد بحدة : انت بالذات تخرس خالص ومش عاوز اسمع نفسك .
هانى : ياعمى حضرتك فاهم غلط .
محمد : قلتلك مش عاوز اسمع نفسك مش كفايه جاى وشايفكم عمالين تضحكوا وتهزروا ولا على بالكم ....... قرب من هانى ومسك هدومة واتكلم بحدة : هانى يابن عم طه غور من وشى الساعه دى لانى مش طايقك ولاطايق ابص فى خلقتك .

ندى : يابابا ارجوك اهدى واسمعنى انا وهانى كنا قاعدين بمنتهى الادب وماتجاوزش حدودة معايا وبعدين انا بحب هانى .
محمد : عارف بس مافيش ارتباط رسمى مابينكم واللى انتوا عملتوة دة غلط وسبق وقلتلك قبل كدة مالكش دعوة ببنتى وكمان مش عاملين اى احترام لوجودى.
هانى : خلاص ياعمى يبقى نعمل ارتباط رسمى واخطبها من حضرتك رسمى ارجوك ياعمى اسمعنى بس
محمد : مش عاوز اسمع حاجه خلاص وبص بقى يابن عم طه هى كلمه ومش هاكررها تانى مالكش دعوة ببنتى نهائى لحد ماتبقى جاد فى كلامك وتجى انت وابوك تخطوبها منى رسمى غير كدة ملكش كلام معايا .

ندى بضيق : انا عرفت مين اللى سخنك علينا بس وربنا ماهاسكت ولااعديها لها ماشى يازفته الطين ياللى اسمك داليا وربنا ماهرحمك .
محمد : مش كتر خيرها انها حذرتنى من القرف اللى بتعملوة دة.
هانى : على العموم ياعمى انت سمعت من طرف واحد منها هى وسبق وقلتلك انى بحب بنتك وعمرى ماهاضحك عليها وبنتك اهى قدامك والاكيد انها هى كمان بتحبنى حضرتك بقى ليه تسمع كلام من واحدة منفسنه زيها وبعدين هى ملهاش حق انها تتدخل فى اللى ملهاش فيه وبأى صفه تتدخل اصلا.

محمد : بصفه انها تبقى خطيبه ابنى وخايفه علينا .
هانى بضيق : مع احترامى الكامل لحضرتك بس برضه ملهاش انها تتدخل فى حاجه ماتخصهاش وعلى العموم انا بتأسف لك واوعدك انى مش هاضايقك ولاهاضايق بنتك وكلامك على عينى وراسى وهانفذة ولو على رقبتى ...... بص لندى بحزن : عن اذنكم ارجع مكان ماكنت ........ وجه علشان يمشى وبعدين وقف ولف ورجع تانى كمل كلامه : طب ممكن ياعمى ابقى اطمن على بنتك حتى ولو مكالمه .

محمد بزهق : لا مش موافق يلا بقى اتكل على الله شوف كنت رايح فين .
هانى : ماشى ..... هانى ودع اهله ورجع تانى لمكان اقامته لحد مايستأنف رحلاته من جديد ..
ندى بعد مامشى هانى كانت قاعدة وحيدة وبتعيط وحزينه ومهمومة شافتها مايسه وراحت لها .
مايسه : مالك ياندوش بتعيطى ليه حبيبتى .
ندى بغل وغضب : الزفته اللى اسمها داليا تصورى وقعت بينى وبين بابا وهانى ووصلت له كلام مش مظبوط عننا واخد موقف من هانى واخوكى مشى زعلان .
مايسه بمكر : امممممم قولتلى بقى هى الحكايه كدة طب الجميل زعلان على كلامها ولازعلانه على زعل هانى .
ندى : اصلى اصلى انا انا اصلى بحبه اوى يامايسه انا نفسى مش عارفة حبيته امتى وازاى وليه بس باختصار اخوكى انسان مهذب ومحترم بعكس حازم خالص .

مايسه : انا واثقه من حبك له حبيبتى وعارفة انه هو كمان بيحبك بس فى ملحوظه هانى غلط علشان قعد معاكى لوحدكم كان ممكن يقعد معاكى مثلا وانتى عندنا وقدام بابا وماما وساعتها عمو محمد ماكنش هيمانع بس زى ماقلتلك اللى عمله هانى غلط علشان كدة شافته داليا ووصلت لعمو كلام مغلوط انتو حتى مش مخطوبين وحطيتوا نفسكم فى موضع شبهه معلش حبيبتى باباكى معاة حق على العموم شوية والامور هاتهدى وتصفى .
ندى بتريقه : هاتصفى هه ماظنش ان ممكن الامور تصفى طول ما الزفته دى موجودة هنا .
مايسه : اد كدة بتكرهيها ؟
ندى : انا احب العمى ولااتصورهاش .
مايسه فى قرارة نفسها : ومين سمعك ...شويه واتكلمت : معلش ياندوش ربنا يعدلها من عندة يلا قومى امسحى دموعك دى وتعالى معايا نتمشى شوية ......... فضلت مايسه تهون عن ندى بس يفضل الكرة والغل مابين مايسه وداليا فى القلوب .

فى شقه محمد منصورى اللى فى العزبة كانت داليا قافله على نفسها باب الاوضه وبتكلم شريف .
داليا بهمس : الا قولى ياشريف انت بتكره هانى البحراوى اللى شغال معاك فى المطار
شريف : اسكتى دة انسان غتييت ورخم صحيح هو اعلى منى رتبه بس انا مابطقهوش .
داليا بحقد وغل : امممم . ويبقى اخو مايسه
شريف : بتفكرى فى ايه يادودو .ومين مايسه دى ممكن توضحيلى .
داليا : باختصار ياسيدى مايسه دى تبقى غريمتى من واحنا صغيرين وكمان شايفاها اليومين دول بتقرب من جاسم وهو كمان بيتقرب لها ودة فى حد ذاته معصبنى جدا .
شريف : طب ايه المطلوب منى ؟

داليا : تخلص منهم هما الاتنين هى واخوها .
شريف : وبعدين ؟طب انتى هاتستفادى من دة بأيه ؟
داليا بمكر وخبث : لامن ناحيه انى هاستفاد فاهستفاد كتير اوى منها اخلص من مايسه ومنها اعمل فركشه مابين ولاد المنصورى .
شريف : برضه مش فاهم انتى عاوزة توصلى لاايه بالظبط يادودو .

داليا : عاوزاك تدخل المسابقه زى ماقلتلك قبل كدة وتبقى خصم لجاسم وتهزمة وبعدها تفضل تقرب من مايسه وتحاول تبعدها عنه بأى طريقه ولو حليت فى عينك يبقى احسن برضه وفى الحاله دى كمان ممكن تخلص من هانى بما انه غريمك انت كمان وبأى طريقه تعجبك او مثلا تلبسه مصيبه المهم تخلص منهم وتسيبلى انا بقى جاسم اسويه على نار هاديه .

شريف بمكر : دة انتى طلعتى داهيه ياخربيت شيطانك .
داليا بضحك وخبث : تلميذتك يااستاذ .......... وضحكوا بشر.

عدى يومين بالظبط والوضع مستتب جاسم خلص الشغل اللى كان وراه ورجع العزبة من تانى علشان يستعد ويهيىء نفسه للمسابقه وهيأ الجزء اللى هايتعمل عليه السباق المتفق عليه وكان شريف راح فى التوقيت دة العزبة وجاسم اول ماشافه قبض على ايدة بقوة لدرجه ان عروق ايدة بانت والدم غلى فى عروقة وراح ناحيته وبص له والشرر بيطق من عينه .

جاسم بحده وغضب : ولك عين كمان تيجى هنا كمان اما انت انسان بجح بصحيح .
شريف : اهدى ياجاسم بيه حيلك عليا شوية مش كدة وبطل اسلوبك المتعجرف دة معايا علشان مزعلكش منى وبعدين انا هنا علشان المسابقة بتاعه الخيل واكيد طبعا المسابقه متاحه للجميع فارجوك بلاش اهانه ليا وبطل التعالى اللى انت فيه دة .
جاسم بحده : وهو انت لسه شوفت حاجه ده انا هاربيك ياشريف....... داليا راحت ناحتيهم .
داليا :حبيبى اهدى كدة امال ريلاكس خلى اسلوبك متحضر .
جاسم بغضب وجاب اخره : الله الله وكمان لكى عين تدافعى عنه .

داليا بسرعه : لا طبعا حبيبى الموضوع مش كدة اطلاقا بس المسابقة فعلا متاحه للكل بليييييز خليك جنتل مان وبطل اسلوبك دة .
جاسم بصلهم هما الاتنين والشرر بيتطاير من عينه : كدة ماشى ياداليا اشبعى بيه ... وسابهم ومشى وهو على اخرة منهم
داليا : استنى بس ياحبيبى اسمعنى بس .
شريف شدها لحد مابقت فى حضنه : سيبك منه خليكى معايا .
داليا بضيق : مش وقته خالص ياشريف ....... وسابته هى كمان ومشيت .
شريف بتوعد : كدة ماشى ياداليا بكره هاتيجى تبوسى الايادى بعد مايرميكى سى جاسم دة رميه الكلاب.

بالليل بدا كل فارس يستعد لركوب حصانه علشان يبقى فى مواجهه التانى وكل فارس معاة رمح للمبارزة ومع اشارة البدأ بدات المسابقة وكان جاسم وشريف فى مواجهه بعض وداليا كانت بترسل اشارة بعينيها لشريف علشان يهزمة جاسم ركب حصانه وبدأ يجرى بالراحه فى الاول كان الحصان ماشى بهدوء وبطريقه احترافيه بعدها بشويه بقى فى حاله هياج من الحصان وبيجرى وبينط بطريقه غريبه جدا وفجأة الحصان بدأ يصدر صوت صهيله وبينط لحد ماجاسم فقد السيطرة عليه ووقع من على ضهر الحصان واتشقلب كذا مرة ووقع على وشه وبقى فى حاله ذهول سيطرت على الكل اضطروا بعدها يوقفوا المسابقة مؤقتا على مايحاولوا يسيطروا على هياج الحصان لكن للاسف الحصان كان فى حاله غير طبيعيه بالمرة ومحدش قادر يمسكه .مايسه لما شافت جاسم وقع فى الارض شقهت ونزلت جرى عليه راحت لحلبه السابق علشان تشوفه جرى له ايه لقت وشه كله دم .

مايسه : جاسم جاسم انت كويس رد عليا ارجوك ......... وجابت منديل وفضلت تمسح الدم من على وشه .
جاسم فتح عينه بصعوبة ولقى مايسه بتبصله وتبكى .
جاسم مسك ايدها وابتسم : انا كويس يامايسه متخافيش عليا ... وقام وسند عليها .
مايسه برجاء : علشان خاطرى بلاش تجازف وتكمل المسابقة دى انا خايفه عليك .1

جاسم : قلتلك متخافيش .
واصر انه يركب الحصان كمان مرة وبالرغم من تحذير مايسه له لكن للاسف ماسمعش كلامها وركب الحصان وهو لسه فى حاله الهياج دى ودى كانت فرصه لشريف انتهزها وطلع بحصانه بسرعة وهجم عليه ووقع الحصان برمحه ووقع جاسم للمرة التانيه والحصان طلع جرى برة الحلبه ومايسه للمرة التانيه بتحاول تروح له تفوق فيه لكن المرة دى جاسم غاب عن وعيه بعد ماتعب وطبعا علشان داليا محدش يشك فيها راحت له وعملت نفسها مخضوضه عليه وبتمثل الزعل والحزن علشانه.

داليا بحزن مصطنع: جاسم حبيبى رد عليا مالك .
مايسه بصتلها باحتقار وبتحذير : عارفة ياداليا لوحسيت او شكيت مجرد الشك انك لكى يد فى اللى حصل لجاسم النهاردة صدقينى محدش هايعتقك من ايدى .
داليا بارتباك : انا لا طبعا وهو انا هأذى حبيبى ليه دة جاسم حبيبى ونور عينيا .
مايسه : مش عارفة ليه حاسه انك كدابه على العموم لما نشوف الدكتور هايقول ايه ويطمنا عليه الاول وبعدين نبقى نتحاسب .
وفعلا محمد وطه اخدوا جاسم وطلعوا بيه على اكبر المستشفيات والكل راح وهما قلقانين عليه واكتر اللى كانوا قلقانين عليه هو طه وبنته ومحمد ابوة اما داليا وشريف فكأن الامر بالنسبه لهم عادى ومش فى بالهم لحد ماطلع الدكتور من عندة .
محمد بلهفه : طمنى يادكتور ابنى عامل ايه دلوقتى .

الدكتور : الحمد لله جت سليمه هو حاليا عندة كسر فى ايدة اليمين وكسر فى رجله الشمال وعندة ارتجاج بسيط فى المخ يومين وهايبقى كويس وهو هايفضل مشرفنا يومين فى المستشفى وبعدها لازم يأخد راحه تامه علشان الكسر يلم بسرعة بس اللى اناعاوز اعرفة هو حصل ايه بالظبط علشان لو الموضوع فيه تعمد انه يتاذى بالشكل دة فأنا مضطر ابلغ البوليس .

مايسه اتكلمت بسرعه : كان داخل فى مسابقة لركوب الخيل فى عزبة باباة وكان فى مواجهه بينه وبين شريف الحصان بتاع جاسم فضل فترة ماشى وبيلف كويس وفجأة الحصان هاج ونطرة وقعه على الارض ووشه جاب دم حذرته انه يركب الحصان لكن للاسف اصر انه يركبه تانى ويكمل المسابقة دخل عليه شريف بالرمح وخبط الحصان وقعه ووقع جاسم للمرة التانيه لكن بعدها فقد وعيه .

شريف بتريقه : انتى عاوزة تتهمينى بأى اتهام وخلاص انى السبب فى اللى حصله اكيد لا طبعا لان كل فارس خيل لما بيدخل المسابقة بيبقى معاه رمح كنوع من المواجهه فما تتهمنيش بحاجه غير صحيحه وكلام مرسل .
الدكتور بشك : والله اللى انا شايفه انها كانت محاولة قتل وزى ماقلت لازم ابلغ الشرطه بس فى حاجه مهمة اوى لازم تعرفيها ياانسه لما جاسم وقع مرتين ماكنش بسبب الرمح اللى كان فى ايد شريف الحصان كانت فى حاله هياج لان فى حد حطله منشطات فى الاكل بتاعه وعلشان كدة كان هايج ومش على طبيعته ونفس الكلام دة هايقوله الدكتور البيطرى لما يكشف على حصان جاسم بيه بس سؤالى بقى مين اللى بياخد باله من الحصنه كل يوم وبيشرف عليها .

طه رد بسرعه : انا يادكتور وكام واحد معايا بس اقسم بالله ماجيت جنب الحصان بتاع جاسم بقالى اكتر من اسبوع .
الدكتور : الحصان اتحط له المنشطات النهاردة بس قبل المسابقة بيجى ساعتين كدة بس لازم نعرف مين اللى له مصلحه انه يحاول يخلص من جاسم لانى كطبيب لايمكن اسكت عن اللى حصل بسهولة .

شريف كان مرتبك مابيتكلمش خالص وداليا وقفت جنبه وهمست فى ودنه .
داليا بهمس :انا قلتلك اهزمة مش تخلص عليه .
شريف بضيق : مش وقته الكلام دة ياداليا .

جاسم كان بدأ يفوق ومسك ايد الدكتور وبنبرة تعب : انا مش بتهم حد يادكتور .
الدكتور : ايوة ياجاسم بس انا متأكد من كلامى وكان فى حد عاوز يقتلك ويخلص منك بس ستر ربنا ان ده محصلش .
جاسم بص لداليا وشريف نظرات ناريه وبعدين بص للدكتور وكمل : بس انا معنديش الاثبات دة انا مش بتهم حد من العزبة صدقنى يادكتور انا فعلا مابأتهمش حد .
الدكتور : بالرغم من اعتراضى على كلامك دة بس زى ماتحب على العموم حمدا لله على سلامتك والف سلامه عليك .
جاسم : الله يسلمك يادكتور ......... الدكتور استاذن منهم ومشى علشان يتابع باقيه مرضاة .
جاسم بص للكل :لو سمحتوا الكل يتفضل يطلع برة ومش عاوز حد معايا غير بابا .......... الكل فعلا اصر الصمت وسمعوا كلامه وخرجوا كلهم وفضل محمد جنب ابنه .
محمد : حمدا لله على سلامتك يابنى .
جاسم بتعب : الله يسلمك يابابا .

محمد : جاسم خليك صريح معايا يابنى انت خرجت الكل علشان نتكلم انا وانت مع بعض قولى انت تعرف مين اللى عمل فيك كدة صح ؟
جاسم : الصراحه يابابا مش متاكد هو أنا بشك فى أكتر من شخص بس طبعا لانى تعبان ومكسور فمش هاقدر اتعقب اللى عمل كدة وإيه مصلحته من انه يخلص منى.
محمد بخوف : اوعى يابنى يكون اللى فى بالى صح .
جاسم بتريقه : تقصد يعنى عم طه او مايسه مثلا لاطبعا يابابا دول بعاد اوى عن اللى حصل .
محمد عينه اتسعت على اخرها : تقصد يعنى .......... طب ليه ؟
جاسم : ماانا لسه قايل لحضرتك انى مش متأكد من احساسى لكن اطمن يابابا لازم اعرفة على العموم دة مجرد تخمين مش اكتر ولازم اتأكد بنفسى علشان مظلمش حد .
محمد : طيب هاتعرف ازاى ؟
جاسم : حاليا معرفش ازاى بس ان شاء هحاول وافضحه كمان .
محمد : خد بالك من نفسك يابنى انا مش مستعد اخسرك .
جاسم : ربنا يسترها بقى يابابا .

خلصت حلقتنا وفى ناس ياما الغل والحقد مالى قلوبهم ومستعدين يبيعوا نفسهم علشان خاطر الفلوس والجاة وممكن يقتلوا كمان والنفس الامارة بالسوء .... بس ياترى جاسم عرف فعلا مين اللى عمل فيه كدة ولا زى ماقال انه مجرد تخمين بس الاكيد ان لسه فى الكتير والكتير منتظر ابطالنا وبالتحديد منتظر لجاسم وعيلته ومايسه وعيلتها ..

الفصل التالي
جميع الفصول
الآراء والتعليقات على الرواية