قصص و روايات - قصص رومانسية :

رواية فارس عشقي الجزء الثاني للكاتبة سحر فرج الفصل الثاني

رواية فارس عشقي للكاتبة سحر فرج الجزء الثاني كاملا

رواية فارس عشقي الجزء الثاني للكاتبة سحر فرج الفصل الثاني

قفلت همس الموبيل مع فارس ورمته على السرير علشان تروح تشوف مين اللى بيخبط على الباب .
قربت همس من الباب وفتحت وفعلا زى ما توقعت الفطار اللى كانت طلبته جبوه .
همس خدت منهم الاكل وشكرته وقفلت وراها الباب بالمفتاح .
وحطته على التربيزة اللى فى البلكونه اللى الفيو منها روعه وفى منتهى الجمال وقعدت واكلت وشربت عصير فريش كمان .
وبعد حوالى ربع ساعه بعد ما خلصت فطارها دخلت على السرير وراحت فى سابع نومه .

فى الفيلا عند مامت فارس اللى كانت صحيت من بدرى وفطرت هى وجوزها وبعدها قررت انها تتصل بفارس وتصبح عليه زى كل يوم .
الام لفارس ... صباح الخير يا حبيبى ولا اقول مساء الخير الظهر قرب يأذن اهو .
فارس بحب ... صباح الفل يا ست الكل اى حاجه منك حلوة يا قلبى .
اخبار صحتك ايه واخبار السيد الوالد ايه .
الام .. الحمد لله يا حبيبى وبابا قاعد جنبى اهو بيصبح عليك هو كمان .
فارس .. سلميلى عليه يا حبيبتى وان شاء الله هاخلص شغل الشركه واجى عندكم على طول .

الام .. وانا مستنياك يا روحى ومجهزالك كل الاكل اللى انت بتحبه واكيد هاتقضى معانا اليومين اللى همس مسافرة فيهم زى المرة اللى فاتت .
فارس .. ان شاء الله يا حبيبتى .. سلام بقى دلوقتى علشان فى عميل مهم وصل بره وانا لازم استقبله بنفسى .. مش عاوزة اى حاجه اجبها وانا جاى يا امى .
الام .. تيجى بالسلامه يا حبيبى وربنا يحفظك يا نور عيونى .. لو هاتجيب بقى هات شويه حلويات من اللى بابا بيحبها .
فارس .. ويخليكى ليا يا ست الكل انتى وبابا عيونى حاضر يالا سلام .
وقفل فارس مع والدته ومسك التليفون الخاص بالمكتب بتاعه ورد على السكرتيرة اللى بلغته بوصول العميل وطلب منها انها تدخل العميل المهم اللى عاوز يقابله وكان فارس فى انتظاره .

وفعلا بعد اقل من دقيقه واحده دخلت السكرتيرة ومعاها العميل لاوضه فارس
والعميل طلب من البودى جارد بتوعه انهم ينتظروه بره المكتب لحد ما يخلص مقابلته مع فارس .
فارس قام وقف واستقبله بنفسه ورحب بيه وطلب منه انه يتفضل يقعد فى صالون صغير جنب المكتب للعملاء .. وقعد هو كمان وطلب من السكرتيرة قبل ما تخرج انها تطلب من البوفيه عصير للعميل او قهوة زى ما يحب .
فارس .. تحب تشرب ايه حضرتك ؟
العميل .. قهوة مضبوطه لو سمحت .

فارس بنظرة للسكرتيرة امرها انها تبعت القهوة والسكرتيرة بطبيعتها فهمت من نظرته هو يقصد ايه واستأذنت وخرجت وقفلت الباب وراها .
فارس ... اهلا بحضرتك .
العميل .. اهلا بيك وانا سعيد انى قابلت شخصيه معروفه فى السوق زيك .. انا كل شغلى كله بره مصر وبقالى سنين عايش فى اوربا وسمعت عنك حاجات كتير جدا.
وقررت بعد السنين دى كلها انى ارجع مصر واحول كل شغلى للسوق المصرى .. والوحيد اللى هايقدر يساعدنى هو فارس الحسن بعد ما سألت وعرفت انك اقوى وافضل واحد فى المجال ده .

فارس ... انا اسعد انى قابلت حضرتك ... ومتشكر جدا للكلام الحلو ده وكتير عليا اوى .. انا انسان عادى جدا وكل اللى انا فيه ده بفضل والدى واخويا الكبير الله يرحمه .. هما اللى اسسه الشركه دى ومن خلالها بقت مجموعه كبيرة جدا بتضم شركات كتير فى مصر والوطن العربى وانا كملت المسيرة بتاعتهم ووصلت لكده بفضل الله.
العميل ... ده تواضع كبير منك واتمنى اننا نشتغل مع بعض الفترة الجايه كلها .
فارس ... انا اتمنى ده يا عز باشا وان شاء الله شركتنا تكون عند حسن ظنك .
بس كان عندى سؤال مهم نفسى اسأله لسياتك
عز ... اه طبعا اتفضل وانا تحت امرك .

فارس .. هو حضرتك ليك علاقه بعيله الجبالى او بالتحديد كان ليك علاقه بفهد الجبالى ولا مجرد تشابه اسماء .
عز عدل نفسه على الكرسى وقال ... مين فهد الجبالى .. انا سمعت الاسم ده قبل كده بس ماليش علاقه بيه ابدا ولا من قريب ولا من بعيد اكيد تشابه اسماء ..
فارس خد نفس كبير وقال ... طب الحمد لله طمنتنى .
عز من تغير ملامح فارس قال ... شكلك بتكره الانسان ده اوى .

فارس بدبلوماسيه حب يغير الموضوع وقال ... ويا ترى حضرتك بدات فعلا فى نقل الشغل ولا لسه لمصر .
عز خد باله ان فارس غير الموضوع وماحولش يحسسه انه فهمه كويس ورد عليه وقال .. اه انا فعلا بدات رسميا فى نقل كل الشغل لمصر وحاليا انا نازل فى فندق معروف وبحاول ادور على منطقه هاديه وقريبه لمقر الشركه الجديد علشان اشوف فيلا كبيرة واعيش فيها .
فارس ... ويا ترى الاسرة وافقت على النقل كده بسهوله .

عز ... انا لسه متجوزتش وعايش لوحدى طول السنين الى كنت عايش فيها برة مصر لانى مجتش مصر من سنين طويله جدا وتعليمى كله كان فى اوربا .
فارس .. انا اسف مكنتش اعرف .
عز قام وقف وطلب انه يستأذن علشان وراه شغل كتير ولازم يمشى .
فارس وقف وسلم عليه وبلغه انهم هايجهزه اجتماع رسمى بينهم هما الاتنين وبين المديرين للشركه فى وقت قريب علشان يبدؤوا الشغل مع بعضهم .
فجاه الباب اتفتح ودخل عادل وفارس عرفهم على بعض .

عادل بنظره غريبه لعز مكنش عارف ايه سببها .. مد ايده ليه وسلم عليه .
عز استاذن وخرج ودخل فارس اللى كان مستغرب نظرات عادل لعز .
فارس ... ايه يا عم انت .. بتبص للراجل كده ليه كأنه عدو ليك .
عادل ... مش عارف والله يا فارس حتى انا مش عارف انا ببصله كده ليه ومش مستريحله اول لما عينى جت فى عنيه .

انا كنت مفكر عز الدين الجبالى ده راجل كبير فى السن .. وطلع العكس ده قريب اوى من سننا .. اومال الامبراطوريه بتاعته دى لحق يعملها امتى .. وايه كميه البودى جردات اللى كانوا مستنيينه بره المكتب دول .
ده انا كنت جاى بظروفها ليك ولما شوفت كده بره جالى فضول اشوف مين اللى معاه الرجاله دى كلها .
فارس ... تصدق يا عادل .. انا برضه حسيت باحساس غريب اوى .. بس عكس الكلام بتاعك ده .. بس مش قادر احدد بالضبط الاحساس اللى انا حسيته ده ايه بالضبط .
وتصدق فيه ملامح من اخويا الله يرحمه .

عادل ... لاااااا انت كده بتستهبل .. اش جاب لجاب .. اخوك كان احلا يا عم انت .
فارس .. مش عارف والله يا عادل .. حسيت بكده وحسيت ان فى شىء بيربطنا ببعض ايه هو مش عارف مع اننا اول مرة نتقابل .
عادل .. طب يالا يا اخويا ورانا شغل اد كده خلينا نفوق ليه واظن اطمنت على الست همس .. ياريت نفوق بقى للشغل .
فارس .. ماشى يا عم يالا اسبقنى على اوضه الاجتماعات وخلى كل المديرين بتوع الفروع والمهندسين يحضروا بسرعه علشان نبدا ننسق مع شركه عز الجبالى الشغل الجديد اللى هانفذه مع بعض .

عادل .. ماشى يا باشا هاروح انا وما تتاخرش علينا يالا سلام .
وفعلا مشى عادل وساب فارس فى المكتب .
لكن فارس قعد على مكتبه وبدا يفتكر كل كلمه قالها عز واد ايه هو شخصيه قويه وليها نفوذ كبير .. واحساسه اللى حس بيه اول ما عيونه جت فى عيون عز .. حس بمليون علامه استفهام جواهم وايه السبب ؟

وبعد عده ساعات وفى روما وبالتحديد فى الفندق بعد مرور عدة ساعات من نوم همس .. كانت بدأت تفوق على خبطات على الباب ... فحاولت انها تقوم من السرير وقربت من الباب وفتحت .. واتفاجأت ببوكيه ورد كبير اودام الباب ومفيش حد واقف .
رفعت البوكيه من الارض وقفلت الباب تانى وقربت من التربيزة اللى فى وسط الاوضه ولمحت كارت مع الورد ومكتوب فيه .
( حمد الله على السلامه . منورة روما كلها ).

استغربت همس اوى من البوكيه ومن الكلام الى فى الكارت بس .. دماغها راحت لفارس على طول انه هو اللى عمل ليها مفاجاه وبعت لها البوكيه ده .. فقررت انها تمسك الموبيل وتتصل بيه على طول .
وفعلا عملت كده واتصلت على فارس اللى كان خلص شغله وكان راكب عربيته ورايح على مامته .
فارس كان سايق العربيه وسمع صوت الموبيل بيرن وفرح اوى اول لما عرف انها همس .
فارس ... روح قلبى ... صح النوم يا عمرى.
همس بدلع .. وحشتك .

فارس ... مووووووت .. وهاتجنن عليكى يا حبيبتى .
همس ... وانت كمان يا روح قلبى وحشتنى اوى .. خلصت شغل ولا لسه .
فارس .. انا يا دوبك لسه نازل من الشركه ورايح اقضى اليومين دول عند ماما .. مش قادر اقعد فى الشقه من غير ما تكونى انتى فيها يا همسى.
همس ... للدرجه دى يا فارس بتحبنى .
فارس .. واكتر من كده كمان يا حبيبتى .

همس .. ربنا ما يحرمنيش منك ابدا يا حبيبى وتفضل تحبنى اوى كده طول عمرك .
فارس ... انا مقدرش احب غيرك ابدا يا همس .. انتى قدرى وحبيبتى وعمرى كله يا همسى .
همس ... وانت كمان يا قلبى .. متنساش تسلم على مامتك وباباك كتير .. وانا هاروح اخد شور وانزل الف شويه فى البلد .
فارس .. ماشى يا حبيبتى .. وخلى بالك من نفسك .
همس .. حاضر يا قلبى .. يالا سلام .

فارس .. سلام يا حبيبتى واول لما ترجعى كلمينى علشان اطمن عليكى يا همس .
همس .. تمام .. يالا سلام .
فارس .. سلام يا روحى .
قفلت همس ولسه بتلف نفسها .. شافت بوكيه الورد اللى على التربيزه وافتكرت انها اصلا بتتصل بفارس علشان تسأله عن الورد .. وقالت لنفسها .. من كلامه الحلو نسيت اسأله بس اكيد فارس هايكون مين يعنى .. على العموم شكرا يا فارس عشقى.
وفتحت الشنط وطلعت لبس ليها ودخلت على الحمام علشان تاخد الشور .

وفى الفيلا اللى بتجمع الشباب كلهم .. كانت رغد فى شقتها ومجهزة السفرة باحلى اكل بيحبه عادل وكانت فى انتظار وصوله من الشركه .
وافتكرت انها نسيت السلطه فى التلاجه فراحت علشان تجبها من المطبخ .
عادل كان وصل وفتح باب الشقه واول لما دخل شم ريحه الاكل الحلو الى على السفرة .. فراح فى اتجاه الريحه وشاف الاكل اللى على السفرة وقال ... الله الله ايه الاكل ده كله .. احنا عندنا عزومه ولا ايه يا حبيبتى ؟

رغد .. رغد انا جيت يا حبيبتى انتى فين .. وساب مفاتيح العربيه والموبيل على السفره وراح على المطبخ اللى توقع ان رغد تكون لسه بتجيب باقى الاطباق .. واول لما وصل للمطبخ .. اتصدم اول لما شاف رغد على الارض واقعه وجنبها طبق مكسور والسلطه على الارض فى كل مكان .
عادل جرى بسرعه ناحيتها وقعد جنبها وحاول يفوقها بس للاسف رغد مش عاوزة تفوق .. فشالها من الارض وراح على اوضه النوم وحاول انه يفوقها بالبرفان بس للاسف برضه مش عاوزة تفوق وكان هايتجنن على منظرها ده ومش عارف يعمل ايه وحس انه دماغه وقفت عن التفكير خالص واول حاجه جت فى باله ينادى سلمى اخته وجنه اخت رغد .

وفعلا جرى ناحيه باب الشقه وفتح الباب وبظروفها قابل جنه فى وشه كانت جايه لرغد .
جنه .. مالك يا عادل فى ايه ومال وشك عامل كده ليه .. فى حاجه .
عادل بلهفه .. كويس انى شوفتك ياجنه انا كنت لسه هانزلك .
جنه بضربات قلب سريعه من منظر عادل وشكله .. فى ايه يا عادل انطق .

عادل .. انا رجعت من الشغل ولقيت رغد واقعه على الارض ومغمى عليها وحاولت افوقها مش عاوزة تفوق.
جنه بصدمه .. رغد اختى .. وجريت على جوا وعادل نزل ينادى سلمى بسرعه من تحت .
وفعلا دخلت جنه لرغد وشافتها بالمنظر دا وبدات تعيط على منظر اختها وتحاول تفوقها ودققتين وجه عادل وسلمى وشريف اللى طلعوا بسرعه اول لما عادل بلغهم باللى حصل لرغد .

وانتظر شريف بره الاوضه ودخلت سلمى وعادل وحاولوا انهم يفوقها و بعد شويه فعلا فاقت رغد بس كانت تعبانه ودايخه وجسمها متلج فطلبت سلمى من عادل انه يتصل بالدكتور بسرعه .
وفعلا عادل راح ناحيه السفره ومسك الموبيل واتصل على الدكتور .
وبعد اقل من ربع ساعه كان وصل الدكتور ودخل وبدأ يكشف على رغد وكانت موجوده معاها سلمى وجنه اللى كانت مش مبطله عياط خالص .
وعادل وشريف كانوا بره وكانوا قلقانين على رغد وبالذات عادل اللى كان هايتجنن على مراته .
وفجاه باب الاوضه اتفتح وخرج الدكتور وعلى وشه ابتسامه بسيطه .

جرى ناحيته عادل وشريف بالهفه .
عادل .. خير يا دكتور مراتى مالها وايه اللى حصل لها ده بالضبط .
الدكتور .. اهدى يا استاذ عادل متقلقش .. وكل اللى حصل للمدام ده شىء عادى جدا لاى ست حامل .
الف مبروك المدام حامل فى شهرها التانى ولازم تتغذى كويس وهاكتب لها على شويه فيتامينات وكالسيوم لزوم الحمل .
عادل مش مصدق الكلام اللى سمعه من الدكتور والفرحه مكنتش سيعاه وقال .. انت بتتكلم جد والله .. رغد حامل وانا هابقى اب .

الدكتور .. وهو الكلام ده فيه هزار يا استاذ عادل .. الف مبروك وانا هاكتب الروشته وياريت المدام تبدا تاخدها من النهارده .
عادل قبل ما الدكتور يكمل كلامه دخل جرى على الاوضه وراح ناحيه السرير الى كانت نايمه عليه رغد وقعد جنبها .
سلمى ... الف مبروك يا عدوله ويتربى فى عزكم يا حبيبى .
جنه .. الف مبروك ليكم واخيرا هابقى خالتوووو .
سلمى .. وانا كمان هاكون عمتووو مش انتى لوحدك يا اختى .

عادل قرب من رغد وباس ايديها .. ولما سلمى شافت المنظر ده غمزت لجنه انهم يسيبوهم لوحدهم شويه .
وفعلا فهمت جنه نظرة سلمى ليها وخرجوا بره الاوضه وقفلوا الباب .
عادل بفرحه ... الف مبروك يا حبيبتى .. كده تخضينى عليكى .. انا كنت هاموووووت من كتر الخوف لما شوفتك واقعه على الارض .
رغد .. الله يبارك فيك يا قلبى .. معلش حقك عليا .. انا كنت جهزت كل حاجه على السفرة وكنت راحه اجيب السلطه من التلاجه وفجاه حسيت ان الدنيا بتلف بيا ومحستش غير وانا فى السرير .

عادل قرب اكتر واكتر وقبل ما تكمل كلامها خطف شفايفها فى بوسه رومانسيه جميله .
بس للاسف دخلت سلمى كالمعتاد وقالت ... احم احم نحن هنا يا شباب مش وقته خالص الكلام بتاعكم ده .
عادل .. يا سلام عليكى وعلى رخامتك .. دايما تيجى فى اوقات رخمه زيك .. اظن فيه باب تخبطى عليه يا مدام .. عاوزة ايه يا هانم .
سلمى بضحك .. سورى يا هندسه .. انا اتصلت بماما وقولتلها وفرحت ومكنتش مصدقه وفرحت جدا جدا يا عدوله .
وانا هاسيبكم لوحدكم بقى وهانزل انا وشريف على شقتنا علشان نتغدى ولو عزتم حاجه ادينى الووووو .
وجنه كمان هاتنزل علشان عمر زمانه جه من النادى .
براحتكم بقى يا قطاقيط.

وبسرعه كان عادل ماسك خداديه من جنب رغد وحدفها فى وش سلمى اللى جريت بسرعه قبل ما تيجى فيها .
وعادل رجع تانى جنب رغد ولسه هايضمها لحضنه دخلت سلمى تانى وقالت .. طيب اجبلكم تتغدوا
قام عادل بسرعه وكان عاوز يحصلها ويمسكها لولا انها خافت من منظره وجريت بسرعه وفتحت باب الشقه وقفلت وراها ...

الفصل التالي
جميع الفصول
روايات الكاتب
روايات مشابهة
الآراء والتعليقات على الرواية
W