قصص و روايات - قصص رومانسية :

رواية زين للكاتبة سحر فرج الفصل التاسع

رواية زين للكاتبة سحر فرج بجميع فصولها

رواية زين للكاتبة سحر فرج الفصل التاسع

وادى اللى خبطك يا ستى لو عاوزة تعاتبيه انه انقذ حياتك وجابك المستشفى وكان المفروض يمشى ويسيبك وانتى بين الحياه والموت عاتبيه براحتك بقى اتفضلى ...

زين استغرب جدا من كلام حسام اول لما دخل فبصله ! وبص لى ليل وحس بشىء غريب اوى معرفش ايه هو وقال .. مساء الخير وابتسم وعيونه ركزت اوى على ليل وعلى الحزن اللى واضح في عيونها ودموعها اللى نازله وخاف لاتكون تعبانه او بتتألم فقال .. مساء الخير وحمد الله على سلامتك وانا اسف على كل اللى حصل .. ويارب تكونى بخير دلوقتى .. احب اعرفك بنفسى انا زين الجبالى وده اخويا عمر .
وجينا علشان نطمن عليكى بعد العمليه .

ليل عيونها جت فى عيونه بكل وجع والم ومدت ايديها ومسحت دموعها اللى كانت نازله وقالت .. الله يسلمك انا كويسه وانا اللى اسفه على اللى حصل منى انت ملكش اى ذنب .. بس ! ياريتك ما انقذتنى وكنت سيبتى امووت واستريح

زين باستغراب وعلامه استفهام كبيرة بص لحسام اوى وكأنه بيقوله فى ايه ؟! وعيونه ركزت تانى مع ليل وقال .. اسفه على ايه بس يا انسه ... ؟ وليه بتقولى كده .. مهما الواحد بيعدى عليه مشاكل طول الوقت لازم يتحمل ويصبر ويبقى عنده ثقه فى الله ويحاول يقاوم وما يستسلمش كده ويضيع حياته فى لحظه لان مفيش اى حاجه مستهله ابدا انى اخسر روحى علشان اى حاجه تزعلنى .

حسام رد وقال .. قولها يا زين قولها .
ياما بنقابل مشاكل كتير وبندعى ربنا انه يحلها المهم نعمل اللى علينا ونتحمل ونرضى بالمكتوب ونصبر ونسيبها على ربنا .

ليل اتنهدت جامد وقالت .. للاسف يا دكتور حسام ساعات كتير الدنيا بتقفل ابوابها فى وشك وتاخد منك اقرب الناس اليك فى لحظه وبعدها بتقابل مشاكل كتير فوق طاقتك وتحس ساعتها اد ايه انت وحيد ومش قادر تقاوم اى شىء .. على العموم يا استاذ زين انا السبب فى الحادثه دى ..انا اللى مكنتش مركزه خالص للطريق وللعربيات .

فجاه وقبل ما ليل تكمل كلامها جت ممرضه وطلبت من حسام انه ينزل للطوارىء حالا علشان فى حاله حرجه .. فشك الممرضه وبص لاكل وقال .. اعذرونى يا جماعه لازم انزل للطوارىء حالا زى ما سمعتوا .. فاستأذن حسام من عمر ومن زين وكمان ليل وسابهم وخرج من الاوضه .

عمر اخيرا اتكلم وحاول يخفف حاله الحزن والوجع اللى موجوده دى فقرب من ليل وابتسم ومد ايده وقال بسرعه .. انا عمر الجبالى وتحت امرك فى اى شىء والف سلامه عليكى ولو محتاجه اى حاجه انا موجود .
اعتبرينى زى اخوكى الصغير بالضبط والمرة الجايه وانتى بتعدى الطريق ابقى خلى بالك يا جميل .

زين استغرب من كلام عمر السريع ده وبصله وقال بشويش عليها يا بنى ادم انت كل ده كلام ورا بعضه .. اهدى شويه يا عم انت ! انت داخل مسابقه ولا ايه فى الرغى متنساش انها تعبانه ومحتاجه الهدوء والراحه مش الرغى ده كله يا رغاى انت

عمر بص لى ليل وقال .. بزمتك يرضيكى الكلام ده انا رغاى يا انسه ليل .. عجبك اللى اخويا زين بيقوله ده طيب انا هاسكت خالص اتفضل حضرتك اتكلم بهدوء يا استاذ زين

ليل غصب عنها ابتسمت وبصت لعمر وقالت .. الصراحه انت اتكلمت كتير اوى وبسرعه ومفهمتش معظم كلامك
زين ابتسم على ابتسامتها الرقيقه والبريئه اللى هى ابتسمتها وعيونه جت على عمر وقال .. ايه رايك اهى قالتلك اهى مفهمتش اى حاجه من كلامك .. نقطنا بسكاتك بقى احسن والتزم الصمت .
عمر .. اشطى انا هاسكت خالص اهوووو حتى لو طلبتم منى انى اتكلم مش هارد عليكم وانتى بالذات يا ست ليل بكرة تيجى وتتحايلى عليا وتطلبى منى ان اتكلم معاكى وساعتها ولا هاعبرك

ليل ضحكت لاول مرة من سنين طويله من قلبها لدرجه انها وهى بتضحك اتألمت من الجروح اللى ماليه معظم جسمها وبصت لعمر وقالت انت مضحك جدا على فكرة.

عمر مش هارد عليكى

زين بص لى ليل وقال .. المهم سيبك من الواد عمر ده وقوليلى لو محتاجه اى حاجه انا موجود اهو بلغينى .. ولو عاوزة تتصلى باهلك وتبلغيهم بكل اللى حصل تليفوناتى تحت امرك و انا مستعد ابعت عمر بنفسه بالعربيه ويجبهم لحد هنا علشان ميتعبوش نفسهم فى الطريق .

ليل بحزن تانى ردت وقالت .. متشكرة جدا ليكم وشكرا ليكم لحد كده تعبتكم كلكم معايا .
زين استغرب ردها فقال .. متقوليش كده انتى تعبانه وزى ما انا شايف انك لوحدك ومحدش من اهلك عرف باللى حصل معاكى لحد دلوقتى ولازم تطمنيهم عليكى.

ليل .. ان شاء الله يا استاذ زين وشكرا لاهتمامك .
زين ابتسم وبص لعمر كأنه بيقوله استعد و يالا بينا وبعدها بص لى ليل ومد ايده فى الجاكيت بتاعه وطلع كارت من بتوعه وقال .. دى كل ارقامى يا انسه ليل انا هاستأذن دلوقتى علشان اسيبك ترتاحى ولو عزتى اى شىء اتصلى بيا على طول او بلغى الممرضه او الدكتور حسام وهو هايتصرف على طول ويتصل بيا .
ليل كانت بدأت تحس بالم رهيب ووجع وظهر على ملامح وشها وده اللى لاحظه زين فقرب منها وقال .. انتى كويسه ؟!

ليل بألم مقدرتش تستحمله بدأت تتوجع جامد وغصب عنها ! ااااااااااه .. اااه مش قادرة .. مش قادرة
جرى عليها عمر هو وزين بسرعه وحاولوا يعرفوا منها فى ايه بالضبط وايه اللى بيألمها بالمنظر ده وهى للاسف مقدرتش ترد من شده الوجع .
زين بسرعه بص لاخوه عمر وقال .. بسرعه انده الممرضه او دكتور حسام من بره بسرعه يا عمر .
وفعلا عمر خرج بسرعه من الاوضه و زين قرب من ليل وقال .. ارجوكى اهدى واستحملى يا انسه ليل وقوليلى حاسه بأيه بالضبط ! حسام هايجى حالااااا ارجوكى استحملى .

ليل بوجع وبدموع ردت وقالت .. مش قادرة .. مش قادرة ااااه ألم فظيع فى كتفى .. ااااه .
سيبونى اموووت سيبونى اموووت .. ليه انقذتنى .. لييييييه .
تعالالى يا بابااااااا تعالالى يا باباااااااا وخدنى علشان استريح .

تلت دقايق بالضبط ووصل حسام بسرعه ومعاه الممرضه بتاعته ودخل اوضه ليل وقرب منها وشافها بتتألم جدا من شده الوجع فاطلب من زين وعمر يستنوا بره ويقفلوا الباب وراهم .. وفعلا خرج زين وعمر وقفلوا الباب وراهم وبدأ حسام يسأل ليل وقال .. خير يا انسه ليل حاسه بأيه بالضبط وفين بالتحديد شاوريلى عليه .

ليل بكل وجع وألم بصت للدكتور حسام وقالت .. مش قادرة يا دكتور حسام حاسه بوجع رهيب فى كتفى الشمال لدرجه انى مش قادره اتنفس من كتر الالم .. ارجوك يا دكتور ادينى اى مسكن .. ااااااه مش قادرة .

حسام بدا يهديها وبدأ يكشف عليها فى الجزء اللى بيألمها وبعد ما خلص كشفه طلب من الممرضه انها تديها حقنه مسكنه فى المحلول وده هايوقف الالم اللى هى حاسه بيه ده وكمان هايخليها تنام شويه .
ليل بصت بكل وجع لحسام وقالت بألم .. خير يا دكتور ايه سبب الالم الفظيع ده اللى انا حاسه بيه .

حسام رد وقال .. يا ليل انتى طالعه من حادثه كبيرة وده شىء متوقع جدا وعامل حسابه .. كل اللى انا طالبه منك انك تهدى خالص ومفعول الحقنه اول ما تخديها هايبدأ يهدى الالم والوجع ده خالص وانا طلبت من الممرضه انها تديكى حقنه شديده شويه وهاتستريحى بعدها على طول .
وانا هانزل مكتبى دلوقتى ولو عزتى اى شىء منى اطلبى من الممرضه فورا وهاكون عندك على طول .
وفعلا الممرضه ادت لى ليل الحقنه فى المحلول وفضلت جنبها شويه لحد ما الحقنه بدأت تعمل مفعول وراحت ليل على طول فى النوم .

واول ما الدكتور حسام فتح الباب وخرج من الاوضه بتاعه ليل شاف زين وعمر واقفين اودام الباب وعلى وشهم قلق وتوتر بسبب اللى حصل مع ليل .
زين قرب منه وبكل قلق سأل حسام وقال .. طمنى يا حسام الانسه ليل مالها وايه سبب الالم الرهيب اللى هى حست بيه ده ؟
حسام رد وقال .. اطمن يا زين ومتقلقش هى هاتبقى كويسه بعد الحقنة اللى هى خدتها دلوقتى وكل ده شىء متوقع وانا عامل حسابه بعد حادثه امبارح الكبيرة دى .

عمر بصله وقاله .. يعنى مفيش حاجه تقلق يا دكتور حسام وكلها كام يوم وهاتبقى كويسه ولا انت شايف ايه ؟
حسام ابتسم ورد وقال .. اطمن انت كمان يا عمر .. اسبوع بالكتير وهاتبقى احسن من الاول وهاتبقى زى الحصان المهم نفسيتها لانها اهم شىء واهم من العلاج نفسه اللى هى هاتخده ... خدوا بعضكم وروحوا على الفيلا دلوقتى وقفتكم ملهاش اى لازمه اطلاقا .. هى خدت حقنه شديده وهتنام لحد بكرة الضهر .

زين اطمن شويه وابتسم وبص لحسام وقال .. انا مش عارف اشكرك ازاى يا حسام بتعبك معايا دايما ومش دلوقتى بس لاااا من ساعه ما كنت واقف نفس الوقفه دى معايا زمان و هنا فى نفس المكان ونفس المستشفى ولولا وقفتك ومساندتك جنبى ساعتها انا مش عارف كان هايبقى مصيرى ايه ومش عارف من غيرك كنت عملت ايه .. ربنا ما يحرمنى منك . وكمان كان ممكن الانسه ليل تبلغ الشرطه .

عمر ضحك وقال .. فعلا حسام وقف معانا كتير كتر خير .. ومن ناحيه ليل وانها تبلغ الشرطه عندك حق يا زين كنا زمانا دلوقتى فى ( س و ج ) وكان زمان اسامينا على كل القنوات وكمان السوشيل ميديا .
حسام ضحك وقال .. يا جماعه انا معملتش اى شىء تشكرونى عليه ده شغلى يا زين ولا انت ناسى انى دكتور .. وبعدين يا سيدى عد الجمايل من هنا ورايح

زين ضحك ورد وقال ... لا فاكر كويس انك دكتور يا صاحبى المهم ! سكت شويه كده وقال .. بس قولى الاول ايه حكايه ليل دى يا حسام انا حاسس ان وراها موضوع كبير اوى .. واللى مستغربه جدا ! ايه اللى يجبها فى مكان زى ده باليل لوحدها وايه كميه الحزن والالم اللى فى عيونها ده .. وليه لحد دلوقتى محدش من اهلها جه ولا هى اتصلت بحد ليها علشان تطمنه عليها ليه كل ده يا حسام قولى ؟!

حسام رد وقال .. كل اللى انت سألته ده انا كمان سألته لنفسى واستغربت جدا وعرضت عليها انها تكلم اهلها من موبيلى وتطمنهم بس هى ...
وقبل ما يكمل كلامه جت ممرضه وبلغته ان استشارى القلب عاوزه ضرورى فى مكتبه .
فرد عليها وقال بلغيه انى هاروحله فورا .

وبص لزين وقال .. انا مطر امشى واسيبكم دلوقتى وانتم كمان يالا روحوا ملهاش لازمه وقفتكم هنا ونكمل كلامنا بعدين .. وفعلا خدوا بعضهم هما التلاته وراحوا ناحيه الاسانسير وركبوا ونزل حسام الدور التانى اللى فيه قسم القلب والاوعيه الدمويه وهما كملوا فى الاسانسير للارضى وخدوا بعضهم وخرجوا من المستشفى وراحوا على العربيه وركبوا ورجعوا على الفيلا .

وفى مكان تانى خالص فى ارقى احياء القاهرة
وعلى فيلا كبيرة فخمه جدا تشبه القصر كان فيه يافته صغيرة على الباب مكتوب عليها فيلا العاصى .
كان فى بودى جاردات واقفين بيحرسه البوايه الضخمه دى .. وعربيات كتير واقفه وخلف البوابه دى كان فيه جنينه كبيرة جدا مليانه اشجار كتير وانواع مختلفه من الزهور وحمام سباحه وعلى بعد حوالى 300 متر كان مبنى عالى من تلت ادوار وفى نصفه باب طويل عباره عن تحفه فنيه وواقف عليه بودى جاردات.

وفى احد غرف الفيلا كانت شاهى العاصى قاعده على سريرها بتقلب فى موبيلها .
وبدور على تطبيق تويتر والفيس بوك عن صفحه زين الجبالى .
اللى كان شاغل كل تفكيرها الفترة الأخيرة دى وبالذات من ساعه ما طردها من المحاضرة بتاعته .
واللى بيعاملها بطريقه هى مش متعوده عليها من كل اللى حواليها .
كله بيقدم ليها دايما فروض الطاعه وكل اللى هى بتطلبه بينفذ ليها على طول .

شاهى كانت بنت وحيده ومدلعه وابوها اكبر رجل اعمال فى مصر والشرق الاوسط ومعروف جدا جدا .
عايشه هى وباباها ومامتها جوا الفيلا دى واللى معظم وقتهم بيقضوه بره كلهم .
الاب مشغول دايما بشغله وبشركاته وسفرياته .. والام دايما مع اصحابها ومقضياها حفلات وخروجات ونادى معظم وقتها .

ولكده شاهى دايما حاسه بفراغ وبتحاول تشغل الفراغ ده بالفسح والسهر لوش الصبح مع اصحابها .
وكان صديقها الوحيد المقرب ليها عن امها وابوها واللى بتحكيله كل شىء يخصها كان عمها الصغير .
باب اوضتها خبط وهى ماسكه الموبيل وبتقلب فيه وانتبهت لخبط الباب وقالت ادخل .

الشغاله ابتسمت وقربت منها وقالت .. العشاء جاهز يا شاهى هانم تحبى اجيبه لحضرتك هنا ولا على السفره .
شاهى من غير ما تلتفت للشغاله وكملت تقليب فى الموبيل قالت .. مش عاوزة اتعشى اخرجى برة واقفلى الباب وراكى .

الشغاله من غير اى تعليق لفت نفسها ولسه هاتخرج من الاوضه .. شاهى اتعدلت وقامت وقفت وقالت .. استنى ولا اقولك جهزيلى عصير توت
ونزليه تحت عند حمام السباحه وانا نازله وراكى على طول .
الشغاله بكل ادب ردت وقالت .. حاضر يا هانم .. تؤمرينى بحاجه تانيه؟

شاهى نفخت واتنهدت وهى بتقلب فى الموبيل وردت وقالت .. لااااا روحى انتى .
وفعلا نزلت الشغاله ورجعت شاهى قعدت على طرف السرير وبتكلم نفسها وبتقول .. ازاى شخص زى ده وفى مكانه ده وملوش اى اكونت على اى تطبيق من التطبيقات دى كلها .
غريبه اوى .
ده انا ملقتش غير صفحه كبيرة جدا تخص اسم شركته واكيد بدام مش ليه اى اكونت حد غيره هايبقى مسؤول عنها من الموظفين .

بس هاتروح منى فين يا زين يا جبالى .. انا هافضل وراك و هاعرفك مين هى شاهى العاصى وقامت وقفت من على السرير ورمت الموبيل عليه وخدت بعضها ووقفت اودام دولبها وطلعت المايوه الخاص بيها اللى كان عبارة عن قطعتين وغيرت لبسها ولبسته ورفعت شعرها بتوكه لفوق ونزلت على تحت
عند حمام السباحه وفى لحظه كانت ناطه فيه .

وفى اسكندريه وبالتحديد فى جنينه القصر
كانت سميحه ام زين وسماح اختها قاعدين وبيتكلموا فى حاجات كتير من ضمنها الحفله اللى هايعملوها خلال ايام بمناسبه عيد ميلاد زين بالقاهرة زى ما اتعوده كل سنه يعملوها رغم عدم موافقه زين عليها.
سميحه بصت لاختها وقالت .. اومال شاهندا راحت فين مش باينه بقالها كام ساعه يعنى من ساعه ما اتغدينا يا سماح ؟

سماح باستغراب ردت وقالت .. انتى نسيتى ولا ايه يا سميحه .. مش شوشو قالت انها هاتخرج تقابل صاحبتها ويلفوا مع بعض يشتروا شويه حاجات بالعربيه .. وانا متاكده انها رايحه تشوف هديه لزين علشان عيد ميلاده .
بس عملت نفسى مش عارفه حاجه علشان محرجهاش .

سميحه اتنهدت وبصت لاختها وقالت .. انا مش عارفه بس الواد ده هايفرحنى امتى بجوازه هو وشاهندا .. ويحس ويقدر حب شاهندا ليه .. بس ياما قولتلك يا سماح اتكلم معاه واعرفه حقيقه مشاعر شاهندا ناحيته وانتى رفضتى ده .. وقولتى خليه يعرف ويحس بنفسه من غير ما ندخل بينهم .
قال ايه علشان يكون واخدها بقرار منه هو مش مجرد ضغط منى أنا علشان ياخدها .

سماح ردت وقالت .. وفعلا هو ده اللى المفروض يحصل يا سميحه .. انتى مفكرة انى لما اشوف بنتى دايما اودامى حزينه ومكسورة وزين مش حاسس بيها او حتى بيحاول ياخد باله منها ده شىء بيعجبنى . بالعكس ده بيقتلنى وبيوجع قلبى عليها .
بس ارجع واقول مسيره يعرف اد ايه هى بتحبه وبتتمناه من وهى لسه عيله صغيره .
ومش عوزاها تعيش اللى احنا عشناه زمان انا وانتى.

سميحه بحزن ردت وقالت .. عندك حق يا حبيبتى وكفايه اللى حصل معانا زمان واحنا صغيرين وبابا جوزنا غصب عننا من ناس منعرفهاش كانوا شركاته فى شغل كتير يخصهم من غير ما ياخد رأينا فى اى شىء علشان ميحصلش معانا اللى حصل مع هدى اختنا .
واتنهدت اوى وبكل حزن قالت .. فاكرة لما صحينا من النوم فى يوم من الايام ولقينا هدى خدت كل لبسها وهربت وسابت البيت .. وماما وقعت واغمى عليها لما عرفت الخبر ده .

كانت صدمه كبيرة جدا عليها وعلينا وعلى بابا وفضلت على الحاله دى كام شهر لحد ما ماتت .
وبابا من بعد هروب هدى وهو منعنا اننا نخرج من البيت نهائى او حتى نرجع ونكمل دراستنا.

سماح بحزن ردت وقالت .. ياااااااه يا سميحه .. رغم كل السنين اللى عدت دى وعمرى ما قدرت انسى اليوم ده خالص وكأنه حصل امبارح .
وافظع يوم عمرى ما قدرت انساه فى حياتى ابدا بعد هروب هدى بيومين لما حد اتصل بى بابا على تليفون البيت وبلغه انهم لقيوا شنطه على شط البحر وفيها جواب ولبس لهدى ومكتوب فيه انها فضلت الموت عن الحياه .

ورغم صدمه بابا من الخبر ده خرج بسرعه لوحده من غير ما ياخد اى حد فينا او يقولنا انه كدب وخرج وهو مصدوم وحزين رغم غضبه منها بسبب هروبها وفضلنا كلنا مصدومين ومرعوبين ومش مبطلين عياط وبندعى ربنا ان الخبر ده يكون غلط وان هدى تكون لسه على قيد الحياه .

سميحه بحزن ردت وقالت .. يااااااه يا سماح
انا اليوم ده عمرى ما قدرت انساه ابدا .. اليوم ده حول حياتنا كلها لسواد وحزن كبير .
هدى فضلت انها تموت لمجرد ان بابا رفض الشخص اللى قلبها حبه واختاره .
بحجه انه فقير ومعندوش اهل ولا عزوة يليقوا بيه وبماكنته فى المجتمع وسمعته بين معارفه واهله .

ياااااه يا سماح .. انا لو اقدر اقولك هما كانوا بيحبوا بعض اد ايه .
كانت دايما بتحكيلى انا كل حاجه بينهم لانى كنت اقرب ليها عنك وكانت بتخاف تحكى اودامك اى شىء لا تقولى لماما او بابا زى عاويدك زمان .. و...ولسه هاتكمل كلامها ويكملوا حكايه هدى واللى حصل معاها زمان شاهندا كانت وصلت بعربيتها وركنت العربيه وطلعت كام شنطه فى ايديها وراحت وسلمت عليهم وهى مبتسمه .

شاهندا بابتسامه جميله بصت لهم وقالت .. مساء الخير يا حلوين .. أنتم لسه سهرانين ليه لحد دلوقتى .
سماح حاولت تغير ملامح الحزن اللى على وشها وابتسمت وقالت .. هو انا اقدر انام او يجيلى نوم من غير ما اطمن على امورتى الحلوة انها رجعت بالسلامه .
مع انى قولتلك متتأخريش او خدى السواق معاكى علشان اطمن بس انتى مردتيش .

شاهندا باستغراب ردت وقالت .. يا سلام يا ست موحه ده على اساس انى لسه صغيرة وهاتخطف وانا لوحدى ولا ايه .. وبصت لخالتها سميحه وقالت .. ما تقولى حاجه يا خالتوا لأختك هو انا صغيرة ولا ايه علشان تخاف عليا بالمنظر ده .

سميحه بحب ردت وقالت .. يا حبيبتى هى قلقانه عليكى وبتخاف عليكى مش اكتر وبعدين فين الصغيرة دى انا اودامى ست البنات كلها عروسه زى القمر وفعلا نخاف عليها .

شاهندا رفعت حاجب ونزلت حاجب وقالت لااااا انا طالعه اوضتى علشان مش هاخلص منكم انتم الاتنين .. يالااا تصبحوا على خير .
وفعلا خدت بعضها وطلعت على اوضتها وبعدها على طول طلعت سميحه وسماح كل واحده على اوضتها بعد ما اطمنوا على شاهندا انها وصلت بالسلامه .

وفى سرايه الحاج صفوان فى قلب الصعيد كان الشباب كلهم متجمعين فى جنيه السرايه سهرانين مع بعض بعد ما اتعشوا واطمنوا ان الحاج صفوان والحاجه انعام ناموا واباهتهم وامهاتهم كمان فقرروا انهم يكملوا باقى سهرتهم فى الجنينه .
وبظروفها كان مقضى اليوم ده معاهم سليم ابن عمتهم نعمه الله يرحمها هو ومراته الدكتورة ضحى .

كل واحد فيهم كان قاعد جنب مراته
قصى وفرح جنب بعض و عدى وهدى وفارس وسلمى وفهد وملك وكلهم كانوا حوامل وعلى آخرهم لانهم فى شهورهم الأخيرة الا هدى وملك كانوا متأخرين عنهم بحوالى شهرين .

عدى برخامه بصلهم وقال .. انا مش عارف بس احنا قولنا وقررنا انها هاتكون سهرة رجالى انتم ايه اللى حشركم فى وسطنا كده زى الغرة وكابسين على نفسنا يا هوانم .
هدى مراته وبتكون بنت عمته واخت سليم زغدته فى كتفه وقالت .. يا سلام يا اخويا بقى احنا زى الغرة ولازقين فيكم يا عدى وبصت للبنات وقالت سامعين يا بنات الواد ده بيقول علينا ايه ؟

فهد برخامه هو كمان بصلهم واحده واحده وقال فعلا يا هدى عدى جوزك عنده حق .. احنا كنا عاوزين السهرة للشباب بس .. الجنينه كبيرة اهى ما تروحوا تقعدوا وتتجمعوا بعيد عننا شويه فى اى ركن حبكت يعنى تلزقوا جنبنا بالمنظر ده .
قصى بصلهم وقال .. جرى ايه يا عم انت وهو خفوا شويه على البنات هما عملوا ايه يعنى وبعدين حد يطول يقعد جنب مراته حبيبته ام عياله ان شاء الله فى جو رومانسى زى ده .

سليم ابتسم وقال .. قولهم يا قصى قولهم اصل العيال دى غاويه الصرمحه والسهر لوحدهم لوش الفجر انا مش عارف هايعقلوا امتى ويحمدوا ربنا على النعمه اللى فى ايديهم .
عدى بعصبيه بصلهم وقال .. نعم يا حبيبى انت وهو انتم هاتعملوها عليا طيب هما وهبل وهايكلوها لكن انا لا انا عدى ده انتم زمانكم قاعدين جنبهم ومش طاقينهم اصلا .

فارس بصدمه لااااا اتكلم على نفسك ياض انت وهو واعقلوا كده انتم الاتنين ده كلها كام شهر وهاتبقوا ابهات .
عدى بتحدى بصله وقال .. ولو معقلناش ايه اللى هايحصل يعنى يا استاذ فارس .
فارس بتحدى ووعيد عيونه جت على قصى وعلى سليم اللى فهمه على طول هو بيفكر فى ايه وبص فى الاخر على عدى وفهد وقال احنا هانقولك حالا هانعمل ايه .. والله زمان يا عدى انت وفهد وانتم اللى هاتجيبوه لنفسكم انتم الاتنين .

ولسه هايقوم ويقف هو وسليم وقصى .. بس عدى وفهد حسوا انهم اتفقوا عليهم وقاموا بسرعه وجريوا من اودامهم .
قصى كان اسرع وجرى وراهم وبعده فارس وسليم وفضلوا يجروا ورا بعض كلهم والبنات ميته من كتر الضحك على منظرهم .
عدى .. يا لهوووووى .. الحق ياض يا فهد دول بيجروا ورانا بجد هانهبب ايه قولى .

فهد بينهج من كتر الجرى فى الجنينه الكبيرة بتاعه السرايه وفضل يجرى وعدى معاه وقاله مش عارف يا ابوا لسان طويل .. قولى هانعمل ايه ومنظرهم كده ناوين على نيه سودا .
عدى بكل خوف .. يااا لهووووى .. يا خرابى .. يا وقعتك السودا يا عدى يا ابن ام عدى .. عااااااااا الحقينى يا أمااااا.

البنات كانت ميته من الضحك وقاموا وقفوا كلهم وراحوا وراهم علشان يشوفوا اخرتها ايه معاهم لحد ما وصلوا عند حمام السباحه وقعدوا يتفرجوا عليهم من بعيد لبعيد وهما بيلفوا الجنينه زى التراك .
لحد ما فجأه قصى وسليم استخبوا بسرعه ورا نخله كبيرة عند حمام السباحه والبنات شافوهم ومحاولوش يظهروا كده علشان فهد وعدى يقعوا فى الكمين اللى هما عملينه .

عدى هو وفهد كانوا لسه بيجروا وشافوا ان فارس وقف فجاه وقعد يستريح على الارض من كتر الجرى اللى بيجريه وراهم وان قصى وسليم اختفوا هما كمان فتوقعوا انهم قعدوا هما كمان فى فى اى حته يستريحوا .. فهدوا الجرى خالص وفضلوا ينهجوا وقربوا ناحيه البنات لما شافوهم عند حمام السباحه وكأنهم هما اللى فازوا .
ولسه هايقربوا منهم ويقعدوا ياخدوا نفسهم جرى بسرعه سليم وقصى ومسكوا عدى قبل ما يجرى ولسه هايجروا على فهد هو كمان قام من خوفه منهم جرى وللاسف اتزحلق ووقع فى حمام السباحه .

عدى بصوت عالى جدا .. عاااااااا سيبونى .. سيبونى يا خمامين مش هالعب معاكم تانى .. يا لههههوى .. يا لهووى يا خسارتك يا عدى يا ابن ام عدى .. عااااااا
الكل عمال بيضحك عليه وعلى كلامه وفجاه شالوه هيلا بيلا هما الاتنين وحدفوه فى حمام السباحه مع فهد .
وفجاه سمعوا شباك اتفتح واترزع وسمعوا صوت الحاج صفوان من شباك اوضه نومه بيزعق وهو بيقول .. انت يا بهيم يا اللى اسمك عدى اخرص وروح اتخمد احسنلك .. اقسم بالله لو نزلتلك يا حمار انت وهو لا هابيتكم زى زمان فى الزريبه مع البهايم .. قبر يلمك منك ليه.

وفى بيت سعاد اللى كانت سهرانه هى وعيالها بيتفرجوا على التلفزيون فجأه سمعت خبط على الباب بشويش وده اللى خلاها تستغرب وتخاف .. فقامت وراحت ناحيه الباب وبصوت كله خوف قالت .. ميييين .. ميين بيخبط .

حسان من بره رد وقال .. انا يا سعاد يا اختى افتحى .. افتحى بسرعه .
اطمنت سعاد وخدت نفسها وفتحت بسرعه لحسان اخوها واول لما فتحت شافته واقف اودام الباب وحالته غريبه ومبهدله.
سهاد ابتسمت وقالت .. اهلا يا حسان .. فينك يا ابنى اليومين دول .. ولا انت خوفت و اختفيت علشان المضروبه اللى اسمها ليل واللى عملته معاها ؟

حسان ذقها ودخل وقفل الباب وراه وقال .. يا اختى اوعى دخلينى الاول واقفلى الباب بدل ما حد يسمعنا ونبقى نتكلم جوا وتسألى براحتك .. اه اختفيت علشان اللى ما تتسمى اللى اسمها ليل .. قولت لا تكون راحت للى اسمه الاسطى حسن ده وبلغت عنى علشان اللى عملته .. وفضلت اراقب البيت من بعيد بقالى يومين واتاكدت انها معملتش كده .. فقولت ارجع واعرف منك الاخبار لان موبيلى الظاهر وقع منى ومش عارف وقع منى فين بالضبط .

سعاد ردت وقالت .. تعال اقعد الاول واستريح وخدلك دوش وغير لبسك ده لما احضرلك لقمه تاكلها شكلك ميت من الجوع وبعدين احكيلك على كل اللى حصل .
حسان بخوف رد وقال .. لااااا استريح ايه واكل ايه انا مش مطمن من البت دى هى واللى اسمه حسن الزفت ده .. قوليلى بس حد جه حد اتصل عرفتى حاجه عنها .. قولى اى حاجه علشان اخد بعضى وامشى .

سعاد باستغراب ردت وقالت .. يا ابنى اهدى واقعد واطمن مفيش اى حاجه حصلت لده كله .. وبعدين انت كنت عملت ايه يعنى لده كله وايه الدليل على اللى انت عملته معاها حتى لو عملت .. وليه ما تقولش انها هى اللى اتحرشت بيك وكانت بتغريك وبتتدلع وبتتمايس معاك وانت اللى مردتش علشان خاطر العيش والملح والعشرة اللى بينكم وعلشان خاطر ابوها .

يا حسان يا اخويا اقلب عليها التربيزة انت قبل ما هى تقلبها عليك وتوديك فى داهيه
.. دى حتة بت ولا راحت ولا جت وملهاش اهل خالص تتحامى فيهم .
وبعدين لو اتزنقت اوى اتجوزها .. مش انت عاوز كده يا روميووو .

حسان اتنهد وابتسم بخبث وقال .. معقوله الموضوع سهل كده وانا اللى من خوفى كبرته .. معقول بعد ده كله فى الاخر توافق انى اتجوزها .. وجز على شفايفه وقال .. يااااااه ده انا هابقى اسعد انسان فى الكوووووون كله .
وفجاه سمعوا رزع جامد على الباب لدرجه ان العيال اترعب هى وسعاد وحسان من شده الخبط..

الفصل التالي
جميع الفصول
روايات الكاتب
روايات مشابهة
الآراء والتعليقات على الرواية
W