قصص و روايات - قصص هادفة :

حكايات منار 9 حب على الورق

حكايات منار بقلم منار محمود

حكايات منار 9 حب على الورق

نهال :انت مش بردان
على :لا مش بردان
نهال :اسفة خليتك تسيب خطوبة منى علشانى بس انا فعلا دماغى صدعت وكان لازم امشى
النهاردة كان عندى دروس كتير
تتخطب ليه هى وانا ثانوية عامة مش تراعى ظروفى
كمان حد يتخطب فى البرد ده
مالو الصيف بس
على :هو اللي اصر مصدق توافق
نهال :اموت وافهم منين انت اكتر حد فينا ساكت
ومنين بيبقي عندك كل التفاصيل كده
المهم احكى احكى الفضول هيموتنى
على :عمتو رجاء كانت بتحكى لماما
انه اتقدملها تلت مرات فى سنة واحدة وهى بترفض من غير متشوفه حتى
نهال :ليه

على :يعنى انتى مش عارفة منى بنت خالتك
نهال :سبنى اخمن مستواه المادى اقل منها
على :لا هما ماديا زى بعض
نهال :شكلا هى احلي بس ما ده طبيعى ما هى البنت واكيد مش عايزاه يكون احلى منها يعنى
يبقي ايه بقي ...اااا...لا مش عارفة قول انت
على :هو كان كلية تجارة
نهال :يعنى علشان هى فى كلية صيدلة ترفضه لانه كان كلية تجارة ايه هتتخطب حسب مكتب التنسيق يعنى
على :كل البنات بتفكر كده
نهال :لا وانت مقطع السمكة وديلها وتعرف بنات اوى يشيخ اتنيل
انت بتتكلم مع حد غيري اصلا ده لما بتعبرنى يعنى وتتكلم معايا
بس عموما يا سيدى لا مش كل البنات كده ولا حاجة
فى حاجات كتير اهم من حكاية الكلية دى تحكم فى موضوع الخطوبة والجواز ده
على :زى ايه

نهال :مش عارفة انا لسه بدرى اوى علي انى افكر فى الموضوع ده بس الاكيد ساعتها انى مش هرفض حد علشان كليته اقل من كليتى يعنى
على :منى كانت بتقول بدرى برضه واتخطبت فى تانى سنة فى الكلية اهيه مش عارف ليه كل البنات بتقول لسه بدرى
وفى الاخر بتتخطب فى البدرى اللى بيقولو عنه ده
وسبحان الله يطلع مش بدرى ولا حاجة
نهال :يعنى متحسسنيش انك خبرة قى البنات
وانا عارفة ان مفيش فى حياتك بنات غير سارة وسلمى اخواتك وبتتعامل معاهم علشان هما اخواتك اساسا لولا كده مكنتش هتعبرهم
كمان لا يا سيدى انا مبقلش كده وخلاص انا مش هتخطب دلوقتى خالص ولا كمان سنتين ولا تلت سنين حتى
بجد لسه بدرى اوى

على :اكيد
نهال :اكيد
مش هتاجد الجاكيت بتاعك
على :لا خليكى لبساه لتبردى
نهال :ماشى انا اصلا مش عايزة اديهولك تقيل كده وبيدفى حاسة انه عازلنى عن الجو اللى حوالينا ده
جنتل مان والله انت يا على
على :شكرا بس تفتكرى منى وافقت ليه
عمتو وهى بتحكى لماما مقالتلهاش غير انها فى المرة الرابعة وافقت تشوفه وهو من فرحته تانى يوم كان عندهم وبعد ما جه وقعد معاها
فضل كل يوم يتصل يسال علي رأيها وهى بعد تلت ايام قالت انها موافقة
فى ظرف اسبوع كان جايب الشبكة ومجهز للخطوبة
بس انا مفهمتش منى وافقت ليه
نهال :اكيد علشان اتقدم اربع مرات
على :مش فاهم

نهال :علشان اتقدملها اربع مرات بعد ما رفضته تلت مرات من غير متشوفه حتى
علشان فرحان بيها ومصر عليها
علشان قدملها اللي متقدرش ترفضه
على :وهو ايه ده اللي متقدرش ترفضه
دى منى شايفة نفسها جدا يعنى ومبيهمهاش حد
نهال :قدملها الاهتمام والحب واتمسك بيها رغم رفضها
ومفيش حد فى الدنيا مهما كان مين يرفض الحاجات دى لما تتقدمله
وطبعا قدملها شبكة غالية وفستان خطوبة محصلش
على :يمكن معاكى حق
نهال :مش يمكن ده اكيد وصلنا البيت وبقالنا ربع ساعة بنلف حواليه انا هطلع بقى
على :لا استنى قوليلي اخر حاجة كتبتيها
نهال :يبنى انا ثانوية عامة والمفروض اركز فى الدراسة بقي
على :ما هو علشان انتى ثانوية عامة ومتوترة

انا عارف انك هتكتبي واكتر من الاول علشان تخففى توترك
نهال :اتعلمتها منك انت اللي علمتنى اتكلم مع الورقة والقلم ويبقو صحابي
ماشي يا سيدى انا كتبت حاجة عن الحياة وحاجة عن الدراسة وحاجة رومانسية تحب ابدءلك بايه
على :اللي عن الدراسة
نهال :
نفسى الاجتهاد يعرفلى طريق
نفسى الامل يكونلى صديق
نفسى فى حاجات كتير اوى
يا رب ارزقنى فيهم التوفيق

على :اللهم امين حلوة اوى
طيب اللي عن الحياة
نهال :
الحياة لا سهلة ولا صعبة ولا مستحيلة
الحياة زى ما هى عيشها من غير تفكير
علشان متلفش فى دواير ملهاش اخر
اعمل اللي عليك وعلى ربك بقى التدبير
ولا خوف ولا حذر هيبعدو عنك قدر
فسيب امورك لربك واحمده عالقليل والكتير

على :معاكى حق حلوة اوى ومعبرة
يلا اختميلي بقي بالرومانسية
نهال :
ومهما ابعد والف وادور
بلاقينى عندك انت البداية وانت النهاية
وكأنى معرفش غيرك
وحياتى صعبة فى بعدك وسهلة وانت معايا
قولى ايه الحكاية

على :حلوة اوى دى بس عن مين
نهال :واحدة صاحبتى متنيلة بتحب ابن عمتها وهو بيحبها
بس هى متفهمش عندها تخلف فى مشاعرها ولا ايه
بتبعد عنه بتتجنب تشوفه هتموت ويقولها انه بيحبها وخايفة يقولها فمبتديلوش فرصة بس خلاص هو حطها قدام الامر الواقع واتقدم عارف كلمتنى فى التليفون تحكيلي وهى صوتها بيرقص من الفرحة وبعدين عيطت

وفى الاخر فضلت تحمد ربنا لانها كانت خايفة يزهق ويروح يخطب حد تانى
على :ولما هى بتحبه عملت كده ليه
نهال :عشان تتاكد من حبه وعلشان خايفة
الحب مش حاجة سهلة علي فكرة
على :بس حكايتها بعيدة شوية عن اللي انتى كتباه
نهال :مش بعيدة ولا حاجة
هى اه كانت بتتجنب تشوفه
بس متابعاه عالانستجرام صوره كلها معاها عالموبايل
طول الوقت فاتحة صفحته
بتحلم بيه علي الاقل مرة كل اسبوع
بتفكر فيه طول الوقت اصلا
تلت اربع كلامها معايا عنه بتقولى انها مش شايفة فى الدنيا كلها رجالة غيره
من كلامها كتبت الخاطرة دى
على :تمام فهمتك

هى قدك فى السن معاكى فى المدرسة
نهال :لا اكبر منى بتلت سنين هى جارتى وانا وهيا بقينا صحاب من سنتين
على :لا بس التلميذ اتفوق على استاذه
كتاباتك احلي واكتر من كتاباتى
نهال :قولى اللي كتبته واحكم بنفسى
على :مكتبتش غير حاجة واحدة
نهال :قولها طيب

على :
مسحوب من قلبى معاكى
بعد ما كنت عاقل وراسى
مع انى مش فاهم حاجة
بس انا فرحان بإحساسى
قلبى بيتنطط من الفرحة
وكل الخوف والوجع ناسى
عاشق للغرق فى تفاصيلك
وجودك معايا بقى اساسى
بحبك وبحبنى وبحب الدنيا
صالحتينى على زمانى القاسى

نهال وهى بتصقف :حلوة اوى
تعبيراتك جميلة وجديدة كمان
بس ايه بقي اعتبر دى قصة حب بتعيشها اخيرا
على :لا كالعادة كلام جه فى دماغى فكتبته وخلاص
نهال :بقالك اربع سنين فى الكلية وخلاص هتتخرج
مش ناوى تحب فى قصة حب بقي وتفرحنى بيك
على :وهو بالنية يبنتى الحاجات دى بتيجى كده خبط لزق من غير متفكرى فيها ولا ترتبيلها
نهال :تمام

انا هطلع بقي شكرا عالتوصيلة والله انت جدع يا علي
اجدع من اكرم اخويا اللي فضل فى الخطوبة ومجاش يرجعنى البيت ده علشان بيظبط واحدة صاحبة منى هناك
انت كده هترجع الخطوبة ولا هتروح
على :مش عارف لسه
نهال :عموما توصل بالسلامة
انا هطلع بقى
سلام
على :سلام

بعد اربع سنين
فى بيت نهال
سميرة :مبروك يا نهال سمية قالتى انك اتقدملك حد كويس ووافقتى وهتتخطبى كمان اسبوع
نهال :الله يبارك فيكى يا مرات خالى
سميرة :هى فين عايزة اباركلها انا جاية مخصوص علشان اباركلها
نهال :فى المطبخ اتفضلى ادخليلها
على :مبروك

نهال :الله يبارك فيك
على :انتى مش قلتى انه لسه بدرى على انك تفكرى فى موضوع الخطوبة ده
نهال :ده كان من اربع سنين يا على
اكيد بعد اربع سنين مبقاش بدرى
على :معاكى حق بعد اربع سنين مبقاش بدرى
ربنا يتمملك على خير
انا همشى
نهال :ليه بس انت ملحقتش تقعد
على :اكرم مش هنا ومفيش غيرك انتى وعمتى فى البيت كمان عندى شغل مهم لازم اخلصه
سلام

بعد سنة
اكرم :تعالى هنا بقولك
نهال :عايز ايه انا تعبانة وعايزة انام
اكرم :لا انتى تفوقيلى كده
خطيبك ايه ده اللي عايزة تسيبيه
نهال :انا مش عايزة اسيبه انا خلاص سبته
اكرم :ليه بقي ان شاء الله عيبه ايه امجد
نهال :عيبه انه زيك يا اكرم فلاتى وبتاع ستات
ميعتمدش عليه وملوش كلمة

اكرم وهو بيرفع ايده علشان يضربها
نهال مسكت ايده :ايدك دى مترفعهاش عليا انت مش من حقك تضربنى انا بابا الله يرحمها معملهاش وهو بابا
فأكيداكيد مش هسيبك انت تعملها
اكرم :ايه مبقلكيش كبير خلاص
نهال :انا كبيرى مات من وانا فى تانية ثانوى يا اكرم
وانت عمرك مكنت ولا هتكون كبيرى
مش سنتين فرق بينا هيخلوك كبيرى
الكبير كبير بتصرفاته وعلشان كده بقولك انا كبيرى مات
اكرم :يعنى ايه مش هعرف امشي كلامى عليكى
نهال :قصدك مش هعرف ارميكى فى النار بايديا
مش هعرف ادمرلك حياتك
البيه اللي انت عايز ترجعنى ليه ده
كل يومين مع واحدة وواخدنى علشان ابقى انا المحترمة اللي هتصون عرضه وهو مصنش عرض حد
وعايزنى اصرف عالبيت كمان
عارف لما قلتله وهو ميصرفش ليه قالي ايه

اكرم :
نهال :مسالتنيش قالى ايه
اكرم :قالك ايه
نهال :قالى وفيها ايه ما انتى بتصرفي دلوقتي علي بيتكم
صاحبك بقي وعارف انك مبتحطش فى البيت جنيه واحد
بص من الاخر كده على جثتى يا اكرم تجوزنى لامجد
انا مش هسيب الجحيم اللي عايشة فيه معاك علشان اروح اعيش في جحيم امجد اللي مش هيفرق فى اي شئ عن جحيمك مش هتجوزه واخلف منه عيال يعيشو حياتهم من غير اب لان اللي زى امجد ده عمره مهيبقي اب ويشيل مسئولية هيفضل انانى وعايش لنفسه وبس

صدقنى انت مفيش فى ايدك حاجة تعملها
وبلاش تخلينى ادخل اعمامك واخوالك في الموضوع
وانت عارف انهم مش هينصفوك لان انا اللي معايا الحق
فخدها من قاصرها واديله شبكته اللي مرجعها معاك دى لانها متلزمنيش وعرفه ان الحالة الوحيدة اللى انت ممكن تجوزنى ليه فيها هى انى اكون جثة هتاخد جثتى وتديهاله غير كده ميحلمش
ماشى انا هدخل انام بقى

تانى يوم
سمية :برضه عملتى اللي فى دماغك وسبتى خطيبك
نهال :متقوليش خطيبك يا ماما اسمها الي كان خطيبك
الحمد لله غورته من حياتى

سمية :يبنتى انتو كنتو كام شهر وتتجوزو
نهال :ماما كلامك ده اللي سكتنى عليه كان زمانى سيباه من كام شهر
ده مش راجل يا ماما مش راجل ده انا ارجل منه
اتجوز واحد انا ارجل منه ليه
انا مش هسيب البيت ده غير علي بيت واحد زى بابا
يصونى زى ما بابا صانك ويربى معايا ولادنا زى ما بابا كان بيربينا معاكى امجد ده خيال مئاته ولا هيبقي ليه لازمة فى حياتى بالعكس هفضل مسئولة عن نفسي لا وكمان هبقى مسئولة عنه وعن البيت كمان
انتى ترضيهالى يا ماما
سمية :يا بنتى طب والناس تقول ايه بعد ما اتخطبتو سنة تسيبيه ليه
نهال :مالى انا بالناس هينفعونى بايه وانا بعيش حياة تعيسة مع امجد

مش الناس دول وكلامهم هما اللي مخلين اكرم مش شايف انه بيعمل حاجة غلط وانه بيعيش سنه زيه زى اي شاب فى سنه
مش الناس دول اللي مخلين امجد واكرم شايفين انهم براحتهم يعملو اللي هما عايزينه ويوم ما يتجوزو ياخدو واحدة محترمة وان ده حقهم اصلا
انا مليش دعوة بالناس يا ماما مليش دعوة بالناس
دى حياتى وانا اللي هعيشها وانا المسئولة عن اللى هيحصل فيها مش الناس
سمية :ربنا يكتبلك الخير يا بنتى ويرزقك بابن الحلال اللي يريحك زى ما انتى مريحانى
عارفة يا نهال انتى وجودك معايا مهون عليا فراق ابوكى لانك نسخة منه فى كل حاجة
نهال :ربنا يرحمه
هغرف الاكل بقي وناكل علشان تاخدى الدوا
سمية :ماشى يا قلب امك

بعد شهر
جرس البيت رن
نهال بتفاجئ :مش معقول على رجعت امتى حمدلله على سلامتك
على :اكرم وعمتى سمية فين
نهال :جوا بتسال ليه
على بابتسامة :هطلب ايدك منهم

 

بعد تلت سنين
فى شقة على ونهال
على :مجرد معرفت من بابا انك فسختى خطوبتك فى ظرف اربع ايام كنت مستقيل من شغلى ومصفى حسابى هناك وحاجز على اول طيارة وراجع مصر
راجع علي بيتكم من المطار
نهال :انا مكنتش مصدقة نفسى لما لقيتك واقف قدامى انت كنت سافرت بعد خطوبتى بكام اسبوع من غير حتى متودعنا واصلا مشفتكش من ساعة ما جيت عندنا مع والدتك تباركولى عليها قبلها بأسبوع
على :لما ماما قالتلي انك هتتخطبي مكنتش مصدق نفسي ولما جيت معاها واتاكدت لقتنى مش مستحمل مش هقدر اشوفك وانتى بتبقي لحد غيرى
نهال :بس انت عمرك مقلتلي انك بتحبنى مع اننا كان المفروض اننا صحاب ده انت كنت اقربلي من اكرم اخويا

على :وانتى محستيش
نهال :حسيت قبل خطوبتى بسنة وفضلت مستنياك تتكلم بس انت متكلمتش سكوتك شككنى في الي كنت حسا بيه وقلت انك لو بتحبنى ايه اللي هيمنعك تتكلم تتطلب ايدى حتى
وانا كنت محتاجة لحد فى حياتى محتاجة حد اعتمد عليه
الحياة كانت صعبة اوى في غياب بابا وفى وجود اكرم اللي زى عدمه علشان كده وافقت علي امجد
لانه اتكلم وقال انه بيحبني واتقدم خد خطوة
خطوة انت مخدتهاش

على :مكنتش قادر اخدها ولا عارف اخدها ازاى
فاكرة صاحبتك اللي كنتى بتقولى انها بتحب وخايفة
بتبعد عنه وفى نفس الوقت عارفة كل اخباره ومراقباه
خايفة يقولها بحبك وعايزاه يقولها
اهو انا كنت زيها كده الحب فعلا مش حاجة سهلة
نهال :بس صاحبتي بنت يا على
وهو لما هى بعدت قرب

لما هى سكتت هو اتكلم لان هو الراجل
انما انا البنت ومكنش ينفع انا اللي اخد اول خطوة
حبك لو معبرتليش عنه مش هحس بيه
لو مخدتش خطوة علشانى هتبقي انت اللي قدمتنى لغيرك بنفسك
سكوتك وخوفك هما اللي خلونى بقيت كان ممكن فعلا ابقي لحد غيرك
انت بتحبنى من امتى
على :من يوم ما وعيت عالدنيا من اول لما مكنتش بلعب مع حد غيرك واحنا صغيرين
لحد ما بقيت مبتكلمش مع حد غيرك لما كبرنا
كل كلامى اللي بكتبه عنك وليكى

انا مكنش ليا صحاب غيرك انتى والورقة والقلم
وحتى الورقة والقلم بكلمهم عنك
كنت بحبك مع نفسى وبعبر عن حبى على الورق
وانتى امتى وازاى حسيتى انك بتحبينى
نهال :انت كنت طول عمرك صاحبى واخويا واقربلى من اكرم
اللي كنت بكتبه مكنش عنك
بس عارف ساعة لما ادتنى الجاكيت بتاعك لما كنا راجعين من خطوبة منى انا كنت هرجعلك الجاكيت بعدها
بس لما عرفت انك خدت برد وعييت بسببي
لقتنى

فرحت انك حصلك كده علشانى فمرجعتش الجاكيت
وبقيت كل ما احس انى لوحدى كل ما اكون محتاجة من اكرم اخويا حاجة وميعملهاش
البسه وافتكر انك ادتهولي انا البسه وخدت برد علشانى
كنت بلبسه حتى في الصيف
بس مع الوقت بقيت محتاجة انك تعمل علشانى اكتر من كده وانت مكنتش بتعمل
لما سافرت انا اتضايقت خصوصا انى مودعتكش حتى
بس مع الوقت اتعودت على غيابك

حسيت انك ممكن تكون سافرت علشانى
بس مكنش فى ايدى حاجة اعملها كنت شايفة ان لو ده السبب يبقي كنت المفروض تمنعنى اعمل كده مش تهرب
شفت ان مدام مدافعتش عن حبك ليا يبقي متستاهلنيش
تفكيرى فيك قل كتير خصوصا انك مكنتش بتكلمنى خالص
بس لما جيت بعد ما انا فسخت خطوبتى وشفتك قدامى حسيت انك واحشنى اوى
ولما قلتلي انك جاي علشان تطلب ايدى

جاي من المطار علي بيتى بشنط سفرك علشان تطلب ايدى وانت بتتكلم مع اكرم وماما
حسيت انى بحبك حب كبير اوى اتحط فى قلبى ليك
يمكن انا كنت مستنية منك تاخد الخطوة دى علشان احبك
صحيح سمعنى الشعر اللى انت كتبته وانت جاى فى الطيارة وقتها
على :مبتطلبيش منى اسمعك غيرها مع انى كاتب عنك حاجات كتير بس حاضر يا ستى انتى تؤمرى

انا اضحى بكل حاجة علشانك
ومستحيل اقدر اضحى بيكى
ولو مش هتسمعينى ومش هتيجى
لاخر عمرى هفضل اناديكى
حياتى هتكون معاكى وولادى منك
وغصب عنك انتى ليا وانا ليكى

نهال :هو غير انى بعشقها مش بس بحبها
بس انا طلبتها منك لهدف
على :هدف ايه بقى

نهال :اشكرك انك قد كلامك وانك مرضيتش ولادك يكونو غير منى واستحملت انى بقالنا سنتين ونص متجوزين وانا محملتش لانى عندى مشاكل ومحتاجة اتعالج
وانك صابر علي كلام والدتك ولومها ليك
شكرا يا على مع ان كلمة شكرا قليلة عليك
على :هى ماما قالتلك حاجة تانى تضايقك
متزعليش يا نهال انتى عارفة ان ماما بتحبك بس هو الموضوع ده مهم عندها بكرة ربنا يرزقنا بولاد يفرحونا ويفرحوها وكلامها ده كله يختفي حقك عليا يا حبيبتى
نهال :انا مش متضايقة منها انت ابنها الوحيد وحقها تبقي عايزة تشيل ولادك وتفرح بيهم

كمان مش محتاجين نستنى بكرة
على :يعنى ايه
نهال :يعنى انا حامل اخيرا الحمد لله
ربنا استجاب دعانا وبقيت حامل
على سجد لربنا شكر :الف حمد وشكر ليك يا رب
مبروك يا حبيبتى الف مليون مبروك
تعالى ننزل نفرح ماما وبعدها نروح لعمتى سمية نفرحها
الحمد لله والله انا كنت عارف ان ربنا هيفرحنا وهيمن علينا وتبقي حامل كنت عارف انه برحمته وكرمه مش هيرد دعانا
نهال :الحمد لله يا على الحمد لله

كل حاجة بتيجى فى وقتها اللي ربنا كاتبه
وانا كان مكتوبلى اتخطب لامجد وبعدين اسيبه
مكتوبلى ان على يتجوزنى ويعترفلى بحبه بعدها
مكتوبلى انى مبقاش حامل غير بعد جوازنا بسنتين ونص
واصبر انا وعلى وربنا يرزقنا باحمد ومروة ومازن ونيرة
ومكتوب لاكرم اخويا يتجوز ومراته بعد ما يتجوزو بسنة ونص تخلعه وتهرب مع امجد اللى المفروض انه صاحبه
وتسيبله ولادهم التوأم كريم وريم
امجد فضل وراها لحد ما خلاها عملت كده
خان صاحبه بس اكرم غلطان امجد مراعاش حرمة بيوت كتير اكيد مكنش هيراعى حرمة بيته اللى زى امجد دول مينفعش نديلهم الامان ابدا
كمان ربنا يمهل ولا يهمل واكرم غلط كتير ولعب بقلوب بنات كتير واذى بنات كتير
المشكلة انه كان بيحبها بجد

لما عملت فيه كده انطفى حسيته عجز عشرين سنة على عمره
وبقى عايش علشان ولاده وبس
ماما كانت بتراعيهم معاه وانا كمان
وبعد اربع سنين ماما ماتت
بعدها بكام شهر اكرم اتجوز علشان ولاده
كان لازم يكونلهم ام تهتم بيهم وانا مكنش ينفع علشان كنت جبت احمد وحامل فى مروة
هو كمان مكنش بيقدر على بعدهم لو جم باتو معايا
اتجوز وربنا كرمه بواحدة كويسة كانت اتطلقت من جوزها علشان مبتخلفش بس الحمد لله ربنا كرمها بعد جوازها من اكرم وجابو بنت اكرم سماها نهال على اسمى
ومراته بتربي التلاتة وبتعاملهم زى بعض هى فعلا انسانة كويسة انا حبيتها وانا وهي بقينا اصحاب واخوات

اكرم بعد اللي حصله اتغير مية وتمانين درجة
بقي شخص تانى شخص احسن كتير
بقى اخويا الكبير بقى كبيرى بعد بابا الله يرحمه وضهرى وسندى فى الدنيا
ماما سامحته علي غلطه فى حقنا قبل كده
وانا كمان سامحته اللي حصله كان صعب
والحمد لله هو اتعلم من الي حصله
اكيد كان مكتوبله انه يحصله علشان يتوب ويرجع لربنا

اوقات مبنبقاش عارفين حكمة ربنا فى اللي بيحصلنا
بس حتى لو مش عارفينها ده ميمنعش ان فى حكمة من اللي بيجرالنا مهما كان صعب او قاسى او مؤلم
الاكيد ان فى حكمة من كل حاجة بتحصلنا
كل حاجة بتحصلنا بسبب ولسبب
ووقت ما ربنا يأذن هنعرف السبب ده
وهنفهم حكمة ربنا من اللي حصلنا
اللي اكيد خير لينا
لان رب الخير لا ياتى الا بخير

قصص مشابهة:
الآراء والتعليقات على القصة
قصص و روايات مختارة