قصص و روايات - قصص هادفة :

حكايات منار 5 الوردة البيضا

حكايات منار بقلم منار محمود

حكايات منار 5 الوردة البيضا

انا ماجد تمنية وعشرين سنة مش دكتور ولا مهندس ولا مدرس ولا حتى لاعب كورة زى كابتن ماجد
انا شيف طباخ يعنى وبحب كلمة طباخ دى ومبتكسفش منها انا طباخ ومبتحرجش من شغلي انا اخترته بمزاجى ودافعت عنه 
والدى وصحابى وقرايبي واى حد يعرفنى هما اللي بيتحرجو يقولو انا بشتغل ايه كأنى بشتغل رقاصة
انا اخيرا فتحت مطعم الوردة البيضا وحلمى اتحقق 
بس انا فى الحسابات زفت بقرة فى اي حاجة فيها ارقام 
فقررت انى محتاج حد يساعدنى في حسابات المطعم 
نشرت اعلان فى الجرايد وحتى عالنت 
بس المطعم صغير وكمان مش ناس كتير طموحها فى الحياة تمسك حسابات مطعم 
اتقدم ناس مش مناسبين 

ياما معندهمش خبرة وشكلهم مش بتاع شغل 
ياما عايزين مرتب كبير انا مقدرش ادفعه 
ياما هما لما جم معجبهمش المكان وحسو انه مش من قيمتهم فمشيو بقي علشان يمسكو منصب مدير بنك تقريبا 
هو المطعم صغير بس مش للدرجة دى يعنى 
انا غلطان انى عايز حد كلية تجارة يمسك الحسابات 
انا بحب التخصص بس شكلى كده هقبل بحد يكون بيفهم فى الحسابات وخلاص 
وقبل ميأس جه الامل فى صورة مية خمسة وخمسين سنتى دخلو المطعم لما شفتها قلت هترفض اكيد لبسها باين منه انها ماديا تمام جدا والشغل هنا مش هيثير اهتمامها 
بس لقيتها بتتفرج عالمطعم بانبهار شديد وفرحة كانها هتشتريه 
وبعدين جت لعندى وقدمت نفسها 
امل :انا امل كنت كلمت حضرتك علشان اقدم فى الوظيفة 
ماجد :ايوه ده المكان انتى هتمسكى الحسابات هنا اي حاجة ليها علاقة بالضرايب او حتى اسعار الاكل 
يعنى المفروض نقدم الوجبات بقد ايه علشان نكسب ومنخسرش بس يدوب نكسب انا مش عايز نبالغ في المكسب وعايز ناس كتير تاكل هنا 
ده كله هيبقي مسئوليتك 

امل :يعنى باختصار اي حاجة ليها علاقة بالحسابات اي جاجة فيها ارقام هتبقي اختصاصى 
ماجد :ايوه بالظبط كده 
والمرتب هيبقي...وده مبلغ قابل للزيادة مع الربح اللي هيدخلهولنا المطعم
انتى هيبقالك صلاحيات كتير قراراتك فى الغالب هتتنفذ بالظبط انا مش هعرف اناقشك فيها 
هو اينعم انا هعمل فيها صاحب المكان واتكلم معاكى ونعمل اجتماعات نناقش فيها اوضاع المطعم والمكسب والخسارة بس صدقينى ده هيبقي علشان منظرى قدامك وقدام بقية اللي شغالين معانا في المطعم بس 
انما انا لا افقه شئ فى اللى هنتناقش فيه وعلشان كده عملت اعلان الوظيفة ده 
امل بابتسامة :بالنسبة للمرتب انا عارفة هو قد ايه حضرتك كاتبه في الاعلان ومش هاجى هنا واعمل متفاجئة بيه واقولك انه قليل ومحتاج يزيد 
وبما انه هيزيد مع زيادة ربح المطعم فانا كده اتطمنت لان ربح المطعم هيزيد باذن الله 
ماجد :واثقة فى نفسك اوى 

امل : مش بس فى نفسى فيك كمان 
انا جيت هنا اول ما المطعم اتفتح وكلت الاكل طعمه حلو جدا 
المطعم مشكلته الوحيدة فى الادارة ودى مشكلة انا هحلها 
انما الاكل او حتى ديكور المكان بجد تحفة وملهمش حل 
احنا هنشكل فريق ناجح ان شاء الله 
ده طبعا فى حالة انك قبلت توظفنى 
ماجد بابتسامة :قبلت جدا انتى معانا من النهاردة 
وخلاص انا هلغي الاعلانات اللي كنت عاملها 
اهلا بيكى وسطنا يا امل 
امل :اهلا بحضرتك خلاص انا من بكرة هاجى 
وهشوف الحسابات اللي كانت قبل كده وياريت كمان حضرتك تعرفنى بتشترو الحاجات اللي بتطبخو بيها بقد ايه واسعارها للناس قد ايه والكهربا والمية وايجار المكان 
علشان دى حاجات مهمة علي اساسها هتبقى اسعار الوجبات بعد كده 
ماجد :لا المكان ملكى ومش ايجار 
واضح انك شاطرة فى شغلك خلاص بكرة انا هجبلك الاوراق وهقعد معاكى اعرفك نظامنا الغلط اللي انتى هتصلحى وتنقذينا لاننا بنخسر يا امل والأمل فيكى 
امل بابتسامة :متقلقش كله هيتظبط وهيبقي تمام
بعد اذنك بكرة من بدرى هكون هنا 

تانى يوم 
امل :انت مخلي اسعار الاكل قليلة اوى مطبيعى تخسر 
انت بتخلي السعر علي اساس المواد اللي انت بتشتريها من بره علشان تطبخها ونسيت ان في غاز وكهربا ومية ومرتبات للناس اللي شغالة معاك كمان في وجبات بتخرج ومش مدفوع حقها اساسا 
ماجد :عدلي في الاسعار زى ما تحبى اهم حاجة زى مقلتلك مش عايز مبالغة في سعرها انا عايز بس نكسب مش هنحقق ثروة احنا من اسعار الوجبات 
بالنسبة للوجبات اللي مش مدفوع حقها دى فهتفضل زى ما هى ومش هتتغير 
امل :تمام انا النهاردة او بكرة بالكتير هقدملك لستة بالاسعار الجديدة 

بعد اربع شهور 
امل :بما ان الحمد لله وضعنا المادى بقي احسن ايه رايك تجيب اتنين شباب ونخلي في خدمة دليفرى وممكن نزود واحد كمان يساعدك في المطبخ مع اللي بيساعدوك 
الدليفرى مكسبه حلو وكمان ناس كتير ممكن تكسل تاكل بره او حتى ميبقاش عندها وقت 
ماجد :مش انتى شايفة ان ده صح يبقي انا موافق من بكرة نعمل اعلان نطلب العمال الزيادة 
بس انتى كده مرتبك مش هيزيد انا كنت ناوى ازود مرتبك الشهر ده 
امل :مش لازم يزيد دلوقتى 
ماجد :انتى مبتشتغليش علشان الفلوس صح 
انتى لو الفكرة في الفلوس بقدراتك دى مكنتيش هتشتغلي معانا هنا 
امل :ده حقيقي 
ماجد :امال بتشتغلي ليه 
امل :علشان كل واحد فينا لازم يكون في حاجة بيعملها علشان يفيد الناس وعلشان ميبقاش كل ايامه شبه بعضها فاضية انا مش محتاجة فلوس انا محتاجة اكون بعمل في حياتى حاجة مفيدة وعلشان كده بشتغل معاكم هنا
ماجد :مختلفة انتى يا امل افكارك مختلفة بجد 
امل :شكرا بس دى مش افكارى دى افكار بابا هو علمهالي وانا بنفذ اللي هو علمهولي مش اكتر 
ماجد :والدك واضح انه انسان عظيم 
يا ريت والدى كان زيه 

امل باستغراب :ليه بتقول كده 
ماجد :هتعملى الاعلان امتى علشان نطلب عمال زيادة 
امل :بتغير الموضوع علشان متجاوبش ماشي حقك 
دلوقتى اعمله واعلق ورقة بره وعلي الصفحة اللي عملتها للمطعم علي الفيس بوك هنشره كمان بسرعة جدا هنلاقي العمال اللي احنا محتاجينهم عايزينهم بس يكون عندهم موتوسيكلات علشان نضمن انهم يكونو بيعرفو يسوقوها 
وهنزود مرتباتهم بما ان الموتوسيكلات هتبقي بتاعتهم ومش احنا اللي جايبنها 
ماجد :تمام معاكى حق 
بعد شهر 
ماجد :عطسي ..امل خلصتى قايمة الاسعار ...عطسي ..الجديدة 
امل :يرحمكم الله بعد الحمد 
اه خلصتها 

انت خدت دوا شكلك عندك برد جامد 
ماجد بتعب :عطسي ..اه خدت..عطسي ..بس مجابش نتيجة 
امل :جدتى الله يرحمها كانت علمتنى وصفة شوربة حلوة اوى للبرد في عناصر كتير مفيدة بتخلي البرد يروح بسرعة 
تحب اقولك الوصفة وتعملها بس انت شكلك تعبان قوى 
متسبنى اعملها انا هي مش هتاخد وقت وصدقنى انا بعرف اعملها طعمها هيكون حلو عملتها لناس كتير قبل كده وعاشو بعدها مجرالهمش حاجة 
ماجد وهو بيضحك :عطسي...طيب طمنتينى انى مش اول حد تجربيها فيه ..عطسى ..موافق طبعا..عطسي ..انا مش هعرف ..عطسي ..اعمل حاجة بالبرد ده 
امل :تمام هى اصلا مبتاخدش وقت طويل في عمايلها 
فى مطبخ المطعم 
امل :كلها ربع ساعة وتستوى ان شاء الله هتبقي كويس 
ماجد : شكلك وانتى بتطبخى فكرنى بامى دايما لما كنت اعيا كانت بتعملي شوربة وتقعدنى فى السرير وفوقى بطاطين البيت كلها علشان ادفى
عارفة حنانها عليا هو اللي كان بيدفينى مش الشوربة والبطاطين الدنيا كانت دافية اوى لما امى كانت فيها 
ودلوقتى بقت برد بقت برد اوى برد مدفيهوش بطاطين ولا شورب الدنيا بحالها 
امل بحزن :والدتك كانت ام عظيمة وجميلة الله يرحمها يا ريت امى كانت زيها 

ماجد :عرفتى منين انها ماتت 
امل :من نظرة الحزن في عينيك ونبرة صوتك 
ماجد :ليه بتتمنى والدتك كانت تبقي زى امى
امل :الشوربة استوت هغرفلك طبق تاكله كله علشان تبقي كويس 
ماجد :حاضر 
بس متغيريش الموضوع وجاوبى سؤالى 
امل :وانت كنت جاوبت سؤالى لما سالت 
ماجد :خلاص نعمل صفقة عادلة جدا 
جاوبينى وهجاوبك احنا خلاص بقا بينا عيش وشوربة 

امل بابتسامة :موافقة بس احكيلي انت الاول عن والداتك عايزة اعرفها وقولي ليه بتتمنى لو كان والدك زى بابا 
ماجد :امى كانت جميلة اوى من جوا ومن بره 
كانت زى الوردة مكان متتحط تخلي المكان اللي هى فيه حلو وتملاه ريحة جميلة 
كانت اسم علي مسمى كان اسمها وردة وهى كانت وردة
كانت حنينة وهادية وطيبة ومفيش فى حياتها غيرى 
انا وملك اختى وبابا حياتها كانت علشانا وبس 
علي عكس بابا كانت في حياته حاجات كتير اوى حاجات اهم مننا بس ماما مكنش عندها اهم ولا اعز مننا 
لما كان بابا يزعقلي وانا صغير او حتى يضربنى ماما كانت تيجى تحضنى وتطبطب عليا وتقولى ان بابا بيحبنى وبيعمل كده من خوفه عليا وتقولي انها هتعملي حاجة انا بحبها مرة تعملي كيكة شيكولاتة مرة رز بلبن مرة كاسترد شيكولاتة مرة تخلي الغدا سمك لانى بحبه مع انها كانت ناوية تعمل فراخ وانا كنت بقف معاها في المطبخ وهى بتعملي الحاجات دى امى هي اللي علمتنى ان الاكل بيفرح وبيهون وبيجبر الخاطر 
لما ماتت ومفضلش معانا في البيت غير ابويا فهمت انه مش الاكل اللي بيعمل كده الاهتمام هو الي بيعمل كده.

امى كانت بتهتم بيا ودى كانت طريقتها في الاهتمام
لما ملك كانت بتعيط علي ماما لانها حاسة انها لوحدها لقتنى بقولها انى هعملها البسبوسة اللي هي بتحبها 
بطلت عياط لما مسحت دموعها وخدتها من ايدها ودخلنا المطبخ
انا كنت بقف مع ماما في المطبخ كتير بس مكنتش بعمل حاجة بايدى كنت عارف طريقة البسبوسة بس عمرى معملتها وقفت انا وملك ساعتها انا كان عندى ستاشر سنة 
وهى كان عندها اتناشر سنة
وقفت اجرب وانا لايص وهى بتضحك جامد وفى الاخر عملت اللي المفروض أنها بسبوسة هى الشربات بتاعها كان مسكر ذياة والبسبوسة نفسها كانت مستوتش كويس 
بس انا وملك كلنا الصنية كلها وفضلنا نتكلم عن ماما طول ما احنا بناكل ونتكلم بسبوستها اللي كانت احلي من اللي انا عاملها دى الف مرة خلصناها ووديت ملك اوضتها تنام 
وبوست راسها وانا بغطيها وبقولها انها مش لوحدها لانى معاها وانى مش لوحدى لانها معايا احنا عندنا بعض 
نامت من كتر التعب من غير مترد عليا
وقتها ماما كان بقالها عشر ايام ميتة وملك مكنتش بتعرف تنام كويس يومها نامت كويس ومن يومها وانا جنبها 
وكل متضايق من حاجة اعملها بسبوسة

مع التكرار البسبوسة بتاعتى بقت بسبوسة بجد 
وملك بقت بتحبها من ايدى وانا كل ما ماما كانت توحشنى كنت ادخل المطبخ واعمل اكل 
كنت بسال الست هنية الشغالة اللي بابا جابها لما ماما ماتت علشان تاخد بالها من البيت 
اسالها مثلا لو في حاجة مش عارفها او اشوف برامج طبخ 
بس كنت بنفذ بطريقتى انا دايما مع انى باخد منهم الوصفة بس فى الاخر كنت بعمل حاجة مختلفة كان بيبقالي تاتش مختلف بيميز الاكل اللي بعمله ملك كانت بتقولى كده 
كمان بتقولى انها بعد اكل ماما بتحب الاكل اللي انا بعمله
وقتها انا كنت بقيت ثانوية عامة وبابا بالاجبار دخلنى علمى رياضة علشان ابقى مهندس 
حاولت اقنعه انى مش عايز ابقي مهندس مقتنعش 
قلت احطه قدام الامر الواقع ومجبش مجموع هندسة 
ادانى بالواقع في وشى ودخلنى هندسة خاص 
فضلت ست سنين فيها مش خمسة 
وبرضه لما اتخرجت جبلي شغل فى مكتب هندسي بتاع واحد صاحبه بعد تلت شهور لقتنى مش قادر 
انا مش مهندس وعمرى مهكون 

قلت كده لبابا بعد ما قدمت استقالتى من المكتب 
وخدت كورسات في الطبخ وقريت كتب كتير عنه 
وبدات اعمل اللي انا بحبه بقيت طباخ اشتغلت في مطاعم وقاعات افراح فضلت اربع سنين اشتغل لحد ما جمعت فلوس أقدر بيها افتح المطعم ده 
احنا ماديا كويسين بس انا مكنتش هطلب من بابا فلوس هو مكنش هيوافق لانه شايفنى بضيع مستقبلى وبعمل حاجة تافهه ومش من مقامى عمره مسالنى انا عايز ايه عمره مفهمنى ولا حتى حاول يفهمني 
وانا كنت محتاج اثبتله واثبت لنفسى انى هنجح وانى بعمل حاجة ليها قيمة 
فتحت المطعم وسميته الوردة البيضا على اسم امى
والبيضا علشان لون قلبها اللي مشفتش فى طيبته وحنيته

ملك الوحيدة اللي كانت بتشجعنى وواقفة جنبي ومؤمنة بيا انما بابا وصحابي شافونى بعمل حاجة ملهاش لازمة 
انا كنت خطبت بعد ما اتخرجت علي طول لما قلتلها انى مبحبش شغلي وانى هسيبه وهبقى طباخ فسخت الخطوبة شافت انى مستهتر ودماغى فاضية وهى متقدرش تأمنى علي مستقبلها 
هو ايه الاحسن اكون مهندس فاشل ولا طباخ شاطر في شغلي 
يلا ربنا يسعدها بقي اتجوزت ومعاها ولدين وبنت دلوقتي 
هي كانت بنت صاحب بابا اللي انا كنت بشتغل معاه
اتجوزت مهندس برضه
ملك اختى بقي اللي دخلت هندسة مش علشان بابا 
لو علي بابا يبقي كانت هتخش معهد اساسا 
بس هى بتحبها فعلا دخلتها علشان تحقق حلمها هى
واتجوزت مهندس زميلها اتخطبو وهما في اخر سنة 
واتجوزو بعد ما اتخرجو علي طول 
من تلت شهور خلفت ولد وبنت تؤام سمتهم وردة وماجد 
قالتلي انها معندهاش اسمى اغلي مننا تسميها 

البيت دلوقتى مفيهوش غير انا وبابا ومراته 
بالمناسبة اتجوز مرتين من بعد موت ماما وما شاء الله كل مرة بيجبلنا واحدة اسوء من اللي قبلها 
بس هو حر انا كان اهم حاجة عندى ملك مخلتش واحدة في اللي اتجوزهم تقرب منها فهمتهم من الاول انهم في البيت ده ملهمش غير بابا وان ست البيت بعد ماما هى ملك وبابا اكد علي كلامى لانه كان عارف ان لو ده محصلش انا هاخد ملك ونعيش بره 
وهو مكنش عايزنا نسيبه احنا برضه ولاده في الاول وفي الاخر بعد ما ملك اتجوزت انا بقيت مركز في شغلي بروح البيت عالنوم مش حاسس ان ليا حد هناك اروحله
ساعات بفكر اسيب البيت واعيش لوحدى
خصوصا ان انا وبابا عمرنا مكنا قريبين بس اللي مانعنى انى كنت عايش مع امى هناك مش قادر اسيب ذكرياتى معاها وامشي 
بس يا ستى دى اجابة سؤالك وفي نفس الوقت قصة حياتى

امل :البرد خف معتسطش من اول ما بدات تتكلم ولا مرة الشوربة بتاعتى جابت نتيجة 
ماجد :تسلم ايدك طعمها فعلا حلو 
بس مش الشوربة بس الادوية اللي خدتها مغعولها ابتدا
وكمان علشان مركز في اللي بحكيه 
كفاياكى غرور بقي الغرور مقبرة 
امل :ده مش غرور دى ثقة بالنفس 
كمان الحق عليا انا كنت سبتك ببردك بمناديلك 
ماجد :خلاص بهزر ايه الواحد ميعرفش يهزر معاكى 
لا بجد الشوربة حلوة انا هحطها في المنيو هتعجب الزباين خصوصا اللي عندهم برد 
انا شفت الوصفة وانتى بتعمليها 

اول مرة من وقت طويل يعدى عليا يوم مطبخش فيه 
امل :علشان تعبان بس معلش من بكرة ان شاء الله ترجع تانى تطبخ وكمان اللي انت مختارهم يساعدوك في المطبخ فعلا شاطرين واكلهم حلو الشغل ماشي زى ما هو ومفيش تقصير 
كان نفسي اجاوب سؤالك النهاردة بس وقت الشغل خلص ولازم اروح 
متبصليش كده انا مبهربش بكرة اجاوبك تمام 
ماجد :تمام
تانى يوم 
ماجد :انا هروح اجيب شوية حاجات للمطعم تيجى معايا انتى قلتى انك هتجاوبى سؤالى النهاردة 
امل :وانا مبرجعش فى حاجة قلتها
تمام هاجى معاك بس انت هتجيب ايه 
ماجد :اطقم كوبايات وأطباق جديدة للمطعم 
امل :تمام يلا بينا 

فى العربية 
ماجد :هو انا ممكن اسالك سؤال هموت واساله من يوم ما جيتى تشتغلى معانا 
امل :للدرجة دى السؤال شاغلك اتفضل اسال
ماجد :انتى ليه لابسة دبلة رجالي مش فاهم انتى كده مخطوبة ولا مخطوفة ولا ايه ظروفك 
امل :اجابة سؤالك ده جزء من اللي هحكيهولك خلينى احكيلك من الاول احسن 
ماجد :تمام احكى
امل :انا بابا هو كل حاجة في دنيتى ابويا وامى وصاحبي ومعلمى كل حاجة اعرفها في الدنيا عرفتها منه انا تربيته بابا طيب وحنين وحكيم زى اسمه هو اسمه حكيم وهو حكيم فعلا طول عمرى نفسى افهم اتجوز ماما ازاى وليه شاف فيها ايه يخليه يختارها دونا عن كل ستات الدنيا ويتجوزها انا عن نفسي معرفش هو اكيد شاف فيها حاجة انا مش شايفاها ويمكن ماما نفسها مش شايفاها فى نفسها
بابا هو اللي بيعملي كل حاجة بيزاكرلى وبيجبلى هدومى لحد ما كبرت وبقي لازم اجيبها بنفسي بيودينى للدكتور لما اعيا وبيجبلى الدوا وبيدهولى بنفسه 
فى اي اجتماع او مناسبة فى المدرسة هو اللي كان بيجى معايا 
امى بتطبخ بس اكلها بالنسبالى ملوش طعم وميفرقش عن اكل اي حد تانى يمكن علشان مبتعملوش بحب
هى اللي بتغسل بس الهدوم اللي بتغسلها دى بابا اللي كان بيبقي معايا وانا بجبها
امى ملهاش دور في حياتى 
هى بتشتغل وبتعمل شغل البيت هدفها كان انها تنجح بره وجوا ونجحت في شغلها بتترقى والبيت دايما نضيف 
بس كل الحاجات دى بتعملها بعقلها مش بقلبها كانها في سبق ولازم تكسب دايما بتلف حوالين نفسها وبتعمل حاجات كتير علشان كده كانت مشغولة عنى 
عن انها تقرالي حكاية قبل منام او تنزل معايا تجبلى هدومى او تسهر جنبى وانا فى ثانوى بذاكر

بابا وانا فى اجازة تانية كلية مات عمل حادثة بالعربية وحالته كانت خطيرة ومكملش يومين فى المستشفى ومات
وقتها انا حسيت ان حياتى اتهدت فوق دماغى ابويا كان حجر اساس حياتى وخلاص راح وحياتى اتهدت من بعده
فضلت شهر مبخرجش من اوضتى وشهرين مبخرجش من البيت اساسا رجعت اخرج لما الدراسة بدات كنت بروح الكلية وارجع منها افضل فى اوضتى لحد ما اروح الكلية تانى يوم باكل اللي يخلينى اعيش ومبنمش اكتر من تلت ساعات في اليوم 
امى وسط كل ده كانت رجعت شغلها بعد وفاته باسبوعين وانا محاولتش تخرجنى من اللي انا فيه مكنتش تعرف عنى حاجة كنا اتنين اغراب عايشين تحت سقف بيت واحد
انا عارفة ان كل الناس عندها قلوب علشان تعيش 
بس كتير كنت بفكر ان امى معندهاش قلب 
عاملة زى الماكنة بتشتغل بس في البيت وبرا البيت 
ماكنة مفيهاش قلب ولا روح
الدبلة اللي انا لابساها دى دبلة بابا من يوم ما مات وانا لابساها لانه كان دايما لابسها ومكنش بيقلعها من ايده ابدا
امى قلعت دبلتها بعد ما مات بتلت شهور تخيل 
بعد وفاة بابا بسنة وكام شهر لقيت ماما بتقولى انها هتتجوز واحد زميلها في الشغل طلب ايدها وهى وافقت بتقولى من باب العلم بالشئ مش بتاخد رايي وموافقتى من عدمها مش فارقة هى خلاص خدت قرارها 
وقتها انا قلتلها هى حرة تعمل اللي هى عايزاه 
وجيت انا اعيش هنا مع جدتى لامى 

عايشة لوحدها وماما حتى بعد ما بابا مات مجتش نعيش معاها علشان شغلها مينفعش تسيبه 
ماما محاولتش تمنعنى حتى ان اجى اعيش مع جدتى كان سهل عليها انى اسيب البيت 
نفسي اعرف امى حبت مين فى حياتها 
هى محبتنيش ومحبتش بابا حتى جدتى والدتها
محبتهاش امال حبت مين بس نفسي افهم
المهم انا لما جيت اعيش مع جدتى كنت في اخر سنة ولانى كلية تجارة وعندى تلت ايام بس كلية فى الاسبوع مكنش صعب اوى انى اروح واجى من بيت جدتى 
لما رحت اعيش مع جدتى رجعت احس تانى انى عايشة 
جدتى كبيرة في السن وكانت محتاجة حد يهتم بيها بقيت بهتم باكلها وبادويتها هى عندها شغالة في البيت 
فانا كنت بهتم بيها وشغل البيت مسئولية الشغالة 
بابا كان يقدر يجيب لماما واحدة تساعدها فى شغل البيت بس هى دايما كانت بترفض 
انا في بيت جدتى حسيت ان في لحياتى هدف وفي حد اعيش علشانه اعيش معاه انا كنت عايشة لوحدى في بيتنا من بعد موت بابا ماما وجودها كان ولا يزال زى عدمه
يوم التخرج بتاعى جدتى اللي جت معايا علشان مبقاش لوحدى

بعد ما اتخرجت ماما قالتلي انى اقدر اشتغل معاها في الشركة اللي هى شغالة فيها جوزها يبقي مديرها وسهل اوى يشغلنى طبعا انا رفضت عرضها 
هو مكنش عرض للشغل بس هو كمان كان في عرض للجواز كانت بتقولى علي ابنه اكبر منى بعشر سنين مطلق بس معندوش منها اطفال ومدام ماديا كويس ومفيش اطفال يبقي ليه لا 
عارف انا مشفتش جوزها ولا مرة سبت البيت قبل ما يتجوزو بالمناسبة الشقة بتاعتنا هى باعتها لانها كانت ورثها من بابا وانا ورثت فلوس بعد ما اتجوزت باعتها وراحت عاشت معاه ومخدتش رايي حتى
انا اتجنبت انى اشوفه وكان نفسي افهم ازاى فكرت انى ممكن اتجوز ابنه واشتغل معاهم وانا مش متقبلاه بالشكل ده
وابنه ده كمان علي اى اساس يعنى كان هيتجوزنى وهو ميعرفنيش 
المهم يا سيدى انا رفضت عرضها للشغل وللجواز فورا ومن دون تفكير 
اشتغلت في مكتب محاسبة لمدة سنة ونص بس صاحب المكتب باعه وبقيت انا من غير شغل 
دورت علي شغل كتير اوى

بس ملقتش شغل مناسب هنا فى اسكندرية 
وانا مينفعش اشتغل في القاهرة علشان جدتى 
فضلت تمن شهور بدور ومفيش حاجة مناسبة لحد ما لقيت الاعلان بتاعك الشغل عندك كان مناسب بالنسبالى 
مواعيده تمام ومش كل ايام الاسبوع والمرتب كان اخر حاجة افكر فيها لان انا مش محتاجة وجدتى كمان 
مفيش فى حياتى حاجة غير جدتى والشغل وبس 
وبروح بعد الشغل على طول علشان جدتى متقعدش لوحدها وكمان هي تعبانة اوى اليومين دول
ربنا يشفيها ويباركلي في عمرها ومتحرمش منها 
لو جرالها حاجة انا بجد هبقي ماليش حد
ماجد :ربنا يخليهالك 
وصلنا المكان اللي هنشترى منه 

فى المحل 
ماجد :انتى واقفة كده ليه نقى معايا 
امل :ايه ده انت جايبنى اختار معاك انا فكرتك بتحب تعمل كل حاجة بنفسك
ماجد :لا مش دى الفكرة انا بس مكنش فى حد يختار معايا ملك لما جيت افتح المطعم كانت حامل والحمل تاعبها ومينفعش تيجى معايا واكيد صحابي مكنش عندهم اهتمام ينقو معايا حاجات المطعم 
علشان كده كنت بختار كل حاجة بنفسي لوحدى 
بس انتى معايا اختار لوحدى ليه 
امل :تمام ايه رايك فى الطقم ده 
ماجد :حلو عجبنى انا كمان واضح ان زوقنا شبه بعض 
بعد تلت ساعات
امل :ياه الموضوع طلع صعب لفينا كتير 
حلو انك بتهتم بكل حاجة تخص المطعم مهما كانت بسيطة
ماجد :مطعم الوردة البيضا ده حلمى ومينفعش اي حاجة تخصه متكنش علي اعلى مستوى ممكن
امل : بما اننا بنجاوب اسئلة بعض النهاردة 

سؤال بقي ايه الوجبات الي من غير فلوس اللي بتطلع من المطعم دى الكميات اللي بتطلع مش قليلة وفارقة معانا في الحسابات لو خدنا فلوسها ربح المطعم هيعلي كتير
ماجد :متقوليش لحد بس انا بوديها ملاجئ للأيتام وبوزعها علي غلابة فى الشارع
امى كانت دايما لما نكون في مشكلة او حد فينا تعبان انا او ملك او بابا عنده مشكلة في شغله 
تعمل اكل كتير وتدى منه للبواب بتاع عمارتنا وتقوله ياخد منه لعياله ويوزع الباقى عالفقرا والغلابة 
وتقولى الرسول صلى الله عليه وسلم قال "اطعمو الطعام "وان في مقولة بتقول كثرة اللقم تزيح النقم 
وفعلا لو كان مشكلة بتتحل بعد ما هى كانت بتعمل كده
انا بقي لما بقي عندى مطعم قررت انى هعمل كده بشكل مستمر مش بس لما يكون عندى مشكلة 
وعلشان كده الحمد لله دايما ربنا معايا ومبيسبنيش
امل بابتسامة :ربنا يجازيك خير علي اللي بتعمله
وصلنا انا همشى ميعاد الشغل خلص وانا لازم اروح لجدتى
بعد اسبوعين 
تليفون المطعم بيرن 
ماجد :ايوه يا امل انتى مجتيش امبارح ليه
ان لله وانا اليه راجعون البقاء لله ربنا يرحمها
مفهوم طبعا لا يومين ايه خليكى اسبوع او اسبوعين لو عايزة هو انتو عاملين عزا اجى اعزى كان امبارح بس
البقاء لله ربنا يرحمها ويصبرك علي فراقها

بعد اسبوع 
ماجد :جيتى ليه كنتى خليكى اسبوع كمان 
امل :انا هناك لوحدى انا هبقي احسن لما اشتغل
ماجد :تمام 
وقت الغدا 
ماجد :يلا علشان تاكلى
امل :مليش نفس
ماجد :لا مش هينفع كمان انا عملتلك الفراخ المشوية اللي انتى بتحبيها والحلو ام علي
امل :انت عرفت منين انى بحب الحاجات دى
ماجد :لما بيكون يومها في المنيو مبتاكليش غيرها مع ان بيكون في حاجات تانية بس انتى دايما لما يكون يومهم بتاكليهم يلا بقي انا جعان ومفطرتش ولو ماكلتيش معايا مش هتغدى
امل :لا خلاص هاكل بس مش كتير 
ماجد :المهم تاكلى

بعد شهر 
امل وهى بتتكلم فى التليفون وصوتها عالى :ماما انا مش هسيب بيت جدتى ناس ايه اللي هتتكلم لو فارق معاكى كلامهم تعالي عيشى معايا انما انا مش هسيب بيت جدتى مهما حصل الحمد لله انها كتبته باسمى كان زمانك بعتيه هو كمان زى ما بعتى بيتنا
ماما قصر الكلام انا مش هسيب بيت جدتى فارق معاكى كلام الناس وكالعادة انا مهمكيش ولا فارقة معاكى
تعالي انتى عيشي معايا بس طبعا انتى مش هتسيبي شغلك وجوزك وبيتك وتيجى تعيشي معايا فخلاص بقي سيبي الوضع زى ما هو وكل واحد فينا يعمل اللي يريحه والناس كلامهم ملوش لازمة انا مش فارق معايا ولو فارق معاكى تعالي انتىى عيشي معايا وسكتيهم
انما انا مش هسيب حياتى هنا
اه انتى مشغولة لا عادى اقفلي ومش لازم نتكلم بعدين 
لان كلامى مش هيتغير مع السلامة يا ماما
ماجد بخوف :امل انتى كويسة

امل وهى بتعيط :لا انا مش كويسة انا مش كويسة خالص انا تعبت انا ليه مفيش حد بيحبنى وبحبه بيفضل جنبي 
ليه بيسبونى لوحدى انا عارفة ان ده قضاء ربنا وانا مش معترضة بس انا تعبت والله تعبت بقي ونفسي ارتاح 
وامى في الاخر عايزانى اروح اعيش معاها لمجرد ان الناس متتكلمش عليها انها ازاي سيبانى اعيش لوحدى ده كل اللي فارق معاها كلامهم 
مش انى لوحدى مش انها كالعادة مش جنبي
ماجد بتوتر :هى ممكن تجبرك تروحى تعيشي معاها
امل بعصبية :لا هى مش ممكن تجبرنى على اي حاجة في الدنيا مش من حقها طول مانا مش فارقة معاها بالشكل ده يبقى مش من حقها يا ماجد
متقلقش المطعم ده انا هفضل ماسكة حساباته ومش هسيبه انا حياتى مش لعبة في ايدها تتحكم فيها بمزاجها 
متخافش انا مش هسيب شغلى فى المطعم
ماجد :انا مش خايف تسيبي المطعم انا خايف تسبينى انا 
وارجع تانى لوحدى امل متعمليش كده
امل :معملش ايه 
ماجد :متسبنيش 

انا كنت مفكر ان مطعم الوردة البيضا هو كل احلامى ومش هعوز حاجة من الدنيا تانى 
بس لما انتى جيتى اشتغلتى معايا فيه لما شاركتينى حلمى وساعدتينى في شغل المطعم اللي لولاكى فعلا كان ممكن يقفل المطعم كان محتاجك وانا نفسي كنت محتاجك حياتى كان ناقصها وجودك يا امل
اكتشفت ان المطعم مش كل اللي انا عايزه من الدنيا
لما عملتيلي شوربة جدتك لما كنت تعبان حسيت بالدفا 
دفا زى اللي كنت بحسه لما كانت امى بتهتم بيا وانا تعبان
البرد اللي انا حاسس بيه من يوم وفاتها بدء يقل لحد ما اختفى وبقا وجودك بيحسسنى بالدفا 
انتى عارفة ساعتها كان اول مرة حد يهتم بيا من يوم ما هى ماتت 

ملك انا اللي كنت بهتم بيها كنت بعوضها عن غياب ماما وبابا وانا محدش كان بيهتم وكنت فاكر ان بعد امى خلاص محدش هيهتم بس انتى اهتميتى
وبقيت حاسس انى مش لوحدى وعلشان كده طلبت منك تيجى معايا وانا بنقي حاجات للمحل وكنت عارف انك هتوافقى كنت عايزك معايا ونختار سوا
لانى بقيت حاسس انى خلاص مش عايز اعمل اي حاجة لوحدى تانى
ولما اعيا ويجيلي برد مش عايز اخد دوا بنفسي واعمل لنفسي شوربة عايزك انتى اللي تعمليهالى يا امل 
تقبلي
امل :اقبل ايه 
ماجد :تقبلي تشاركينى حلمى فى المطعم تقبلى تدينى الدوا لما اعيا وتعمليلي شوربة تقبلي تشاركينى حياتى كلها
تقبلي اكون معاكى ومتبقيش لوحدك تقبلي تدينى فرصة اعوضك عن غياب والدك وجدتك 
تقبلى تتجوزينى يا امل
امل :
ماجد :امل تقبلى تتجوزينى 

امل :
ماجد باحباط :لو محتاجة وقت تفكرى خدى وقتك وانا مستنيكى ومش همل ولا هزهق
امل :افكر فى ايه اللي انت بتقوله مش محتاج تفكير 
انا كمان محتاجة وجودك وتعبت من وحدتى
ومش عايزة حد غيرى يعملك كل اللي انت قلته ده
ولا عايزة حد غيرى يشاركك حياتك ولا حد غيرك يشاركنى حياتى 
ماجد بابتسامة :يعنى موافقة
امل بابتسامة :موافقة جدا جدا جدا
بس انا مش هقلع دبلة بابا هلبس دبلته ودبلتك مع بعض
ماجد :وانا مكنتش هقولك تقلعيها تمام البسي الاتنين مع بعض

ماجد قال لوالده انه عايز يتجوزنى وهو ووالده اتقدمو لعمى وطلبو ايدى منه 
لما قلت لماما حاولت تعترض وتقولى انى ممكن اتجوز حد احسن من ماجد بس انا قلتلها انى متمسكة بماجد
وانها مختارتش معايا حاجة قبل كده في حياتى علشان تختارلي دلوقتى الانسان اللي هرتبط بيه 
قلتلها ان ماجد انسان محترم واخلاقه عالية وانى هكون سعيدة معاه وهى طبعا ميهمهاش غير سعادتى 
هى فهمت انها مش ممكن تغيرلى رايى
قالتلي اه طبعا وباركتلي 

وكانت موجودة يوم ما ماجد طلب ايدى من عمى 
عمى وهى جم بيت جدتى وماجد ووالده جم طلبونى منهم في بيت جدتى 
اتخطبنا بس لان مكنش ينفع نتجوز وجدتى معداش على وفاتها شهرين انا طلبت كده وماجد قبل وعملي اللي انا عايزاه 
اتخطبنا ست شهور وبعدين اتجوزنا
وخلفنا وردة ومالك ونيرة انا اللي اصريت نسمى وردة علشان ماجد علشان والدته الله يرحمها انا كمان بحبها من كلامه عنها من حبه ليها انا كمان حبتها 
مطعم الوردة البيضا مبقاش حلم ماجد لوحده بقي حلمى انا كمان انا بعت شقة جدتى وشاركت ماجد ووسعنا المطعم انا مكنتش عايزة ابقي شريكة بس ماجد اصر يخلينى شريكته وسجل نص المطعم باسمى في الشهر العقارى 

وبعدها اديت ماجد فلوس ورثى من بابا وهو كمل عليها بورثه من والده لانه مات بعد ما اتجوزنا بست سنين وفتحنا للمطعم فرع تانى وبرضه سميناه الوردة البيضا
وانا برضه شريكته بالنص مع انه فلوسه كانت اكتر من فلوسي بس هو اصر وقالي انه شريكته فى حياته كلها مش في المطعم بس 
وبعدها باربع سنين فتحنا فرع تالت بنفس الاسم طبعا واحنا الاتنين شركا فيه برضه
انا وماجد شركا في كل حاجة المطاعم والبيت وتربية ولادنا احنا شركا في الحياة كلها بكل ما فيها 
محدش فينا بيعمل حاجة من غير التانى 
وخلاص مبقاش حد فينا لوحده

الآراء والتعليقات على القصة