قصص و روايات - قصص هادفة :

حكايات منار الحكاية 26 بعنوان اختيارات وثمنها

حكايات منار بقلم منار محمود

حكايات منار الحكاية 26 بعنوان اختيارات وثمنها

انا سهام ده اسمى ونفسي ربنا يجعلى نصيب منه ويرمى سهم واحد بس في قلب صفوان ابن عمى ويحبنى
ولو كتير عليا كفاية سهم في عقله ويقتنع بيا يشوفنى بس
وانا صغيرة كنت بخاف من صفوان اوى لو شفته وانا بلعب ابطل لعب وابص في الارض

لو جه فى قاعدة انا موجودة فيها اقوم
مكنتش بعرف اتكلم معاه كنت بخاف منه وبخاف اغلط قدامه
الفرق بينا سبع سنين بس انا كنت بخاف من صفوان يمكن اكتر مبخاف من ابويا
صفوان هو اللي خلانى البس حجاب من اولي اعدادى
لما قالى فورا سمعت الكلام مع ان بابا وماما كانو شايفين ان لسه بدرى وانى صغيرة
بس انا بخاف اكسر لصفوان كلمة مبعرفش اصلا.

صفوان هو اللي خلانى ابطل العب في الشارع وقال انى كبرت ومبقاش ينفع
صفوان اللي خلانى امشى فى الشارع زى العسكرى لا اضحك ولا صوتى يعلا
لما كبرت فضلت بخاف من صفوان بس مش عارفة ازاي بقيت كمان بحبه بفرح لما بشوفه بستنى اشوفه
هموت واعرف شكله هيبقي عامل ازاي لو ضحك انا عمرى مشوفته بيضحك وابتسامته بتطلع في المناسبات بس
عرفت ان غير الخوف في حاجة اسمها هيبة انك تبقي بتحب الشخص وبتخاف منه وبتعمله حساب
وبعد ما كنت بخاف من صفوان بس بقيت كمان بحبه.

بقيت بهابه صفوان ليه هيبة فظيعة
وكمان طول بعرض لما بقف جنبه بحس انى مليش وجود مش جايبه ربعه حتى عصفورة واقفة قدام اسد
صفوان متسمى علي اسم جدى الله يرحمه وواخد كتير من طبعه ومن شكله انا موعاش علي جدى بس اهلي بيحكو عنه
ومصدقاهم انه شبه جدى صفوان مش شبه عيال اليومين دول صفوان شبه رجالة زمان الرجالة اللي بجد
صفوان في عينيا هو الراجل الوحيد فى الدنيا وبقية الناس عيال شوية عيال وهو بس الراجل اللي فيهم
وهو مش شايفنى ست هو مش شايفنى من اصله.

انه يحبنى حلم مستحيل طيب علي الاقل يشوفنى
هو لازم يشوفنى انا مليش راجل غيره خصوصا بعد موت بابا وانا فى اولى جامعة
انا مبعرفش اتخيل حياتى مع حد غيره فعلا مبعرفش
مبفكرش ان غيره ممكن يبقي جوزى وان ولادى هو مش هيبقي ابوهم مبقدرش اتخيل انى اقضى حياتى مع حد غيره
الدنيا مفيهاش غير صفوان ليا دنيتى مفيهاش غيره
هو كمان لازم يتجوزنى هو الولد الوحيد عند عمى واخواته البنات تلاتة اكبر منه وانا بابا وماما مجابوش غيرى
حتى عمتى هناء عمتى الوحيدة عندها بنت متجوزة وولد خاطب
يعنى صفوان ملزم يتجوزنى انا بنت عمه ومفضلش غيرى وغيره.

صفوان هيتجوزنى عمى مش هيسيبه يتجوز غيرى وانا بنت اخوه الوحيده وميضمنش لو جوزنى لحد غريب يعاملنى ازاى
كمان هيخاف اللى يتجوزنى يبقي طمعان فيا
عمى وابويا شركا في معرض موبيليا صفوان هو اللي ماسكها دلوقتى لوحده بعد موت بابا وعمى كمان صحته بقت علي قده وميقدرش ينزل المعرض بقي تعب عليه
كمان عمى بيحبنى فعلا بيحبنى زى بنته خصوصا بعد موت بابا ومرات عمى كمان بتحبنى وبنات عمى كمان بيحبونى
كلهم بيحبونى ما عدا صفوان
انا مستنية يتجوزنى مع انى عارفة انه هيكون بيسمع كلام عمى بس انا قابلة وراضية
صفوان لا بيحبنى ولا بيحب غيرى.

يعنى علي الاقل مش هغير من واحدة تانية عرفت تاخد قلبه اللي انا معرفتش اخده
كمان انا بحبه حرام اتجوز غيره وافضل بفكر فيه
اصلا مش هعرف والله مهعرف
الدنيا بالنسبالى كلها كأن كل اللي فيها بنات وصفوان هو الراجل الوحيد ومينفعش اتجوز غيره
انا كل يوم الصبح بطلع ادى عمى حقنة مرات عمى قلبها خفيف مبتعرفش وصفوان ايده تقيلة وعمى طلب منى اطلع اديهاله وطبعا انا وافقت
طلعت زى كل يوم خبطت ولحسن حظى زى كل يوم صفوان اللي فتح هو بيبقي نازل المعرض وانا طالعة.

سهام بابتسامة:انا لقتنى معدية قلت اما اجى اخد الجمعية
صفوان بجدية:صباح الخير
سهام:صباح النور

زى كل يوم قالي صباح الخير ونزل صحابى واهلي بيقولو ان دمى خفيف بس صفوان محسسنى ان دمى تقيل عمره ما ضحك علي حاجة قلتها عمره ما ابتسم حتى
وانا لما بشوفه بهزر ليه لانى ببقي خايفة ومتوترة فبقلل خوفى وتوترى بالطريقة دى
فى الاول كنت بسكت ولما كان صفوان بيقولي صباح الخير او السلام عليكم او حتى كل سنة وانتى طيبة فى العيد
كنت بفضل اتهته واتلجلج وفى الاخر مبقولش حاجة
وبعدين بقيت بهزر بدل ميشوفنى عيلة هبلة وجبانة
كان لازم اتكلم فبقيت اهزر ودايما انا اللي ببدء بالكلام او بالهزار بقيت بهاجم بدل ما ادافع
وببدء انا والطريقة دى جابت نتيجة والحمد لله

هو اكيد شايفنى تافهة بس اهو تافهة ارحم من هبلة وجبانة وعيلة صح
انا تالت سنة كلية السن قسم فرنساوى
بعد ما خلصت تالت سنة في الاجازة عمى فاتحنى ان صفوان عايز يتجوزنى عملت فيها متفاجئة ومكسوفة ونزلت شقتنا جرى دخلت اوضتى فضلت اتنطط.

اخيرا جه اليوم اللي بقالي كتير مستنياه
تانى يوم بالليل عمى ومرات عمى وصفوان نزلولنا علشان يتقدمو رسمى فضلت طول اليوم بجرب في هدومى وفي الاخر لقيت ان الخمستاشر فستان اللي عندى والعشر جيب والعشرين بلوزة مش مناسبين ونزلت اشتريت فستان جديد
واخيرا ميعادهم جه عمى ومرات عمى وماما خرجو وسابونا انا وصفوان في الصالون علشان نتكلم
انا ولا كنت عارفة ابدء بالكلام واهزر كالعادة ولا عارفة اتكلم جد ولا عارفة اقول اي حاجة اصلا بس صفوان اتكلم
صفوان:مش حبا تسالينى في حاجة
سهام بلجلجة:ل...ل...لا ..وانت.

صفوان:انا مربيكى علي ايدى واعرف عنك كل حاجة فمش محتاج اسال في حاجة
احنا هنتجوز كمان شهرين انا شقتى خلصانة وهاخدك المعرض تنقى العفش اللي يعجبك والاجهزة والحاجات دى هننزل سوا نجيبها وحاجاتك التانية مرات عمى وانتى تنزلو تجيبوها
تمام بالنسبالك ولا عندك مشكلة
سهام:والله انا مكنتش عايزة اكمل تعليمى اصلا
حلو انا موافقة
صفوان:مين قال انك مش هتكملى تعليمك
سهام:سبحان الله مش انت اللى قلت هنتجوز كمان شهرين
صفوان:وفيها ايه نتجوز وتكملي اخر سنة واحنا متجوزين
سهام وهى بتشاور بايديها بصوباعين:الاتنين
هعملهم لوحدى اتجوز وادرس

صفوان:اه انتى مش اول ولا اخر واحدة تتجوز وهى بتدرس
انتى مش عايزة تحبى ناجل لبعد ما تخلصى دراسة
سهام بسرعة:لا..قصدى يعنى مفيش مشكلة
صفوان:خلاص مدام اتفقنا هكلم مرات عمى وبابا وماما انا قلت اننا لازم نتفق انا وانتى الاول علشان دى حياتنا احنا وهتكون بنا احنا يا سهام بنا احنا وبس ومحدش هيبقي ليه دخل فيها حتى مشاكلنا هتخلص بينا فهمانى.

سهام بتوتر:فا...فاهمة
صفوان:تمام جدا مبروك
سهام بلجلجة:الله..الله يبارك فيك

لما بحاول اتكلم جد ومهزرش مع صفوان دايما بتلجلج واعك الدنيا عليه هيبة فظيعة والله
طبعا انا وافقت علي اننا نتجوز بعد شهرين لانى مصدقت اصلا كمان لانى مبعرفش اقول لصفوان لا علي حاجة والله لو كان طلب منى اقعد من الكلية خالص لكنت قعدت.

المهم اتخطبنا و عدو الشهرين واتجوزنا انا وصفوان
احنا متجوزين في نفس البيت مع عمى ومرات عمى وامى
بس كل واحد فينا في شقة
بعد جوازنا بتلت شهور كنت طالعة الم الغسيل من البلكونة
وصفوان كان لسه راجع من المعرض
صفوان وهو ماسك سهام من قفاها:رايحة فين انتى كده
سهام:راي..رايحة الم الغسيل
صفوان:وحجابك فين
سهام:سلامة عينك ماهو على شعرى
صفوان:وانتى مسمية اللي على شعرك ومبين نصه ده حجاب
سهام:الطرحة بتتزحلق يا صفوان.

صفوان:يبقي تربطيها كويس او تلبسى واحدة غيرها مبتتزحلقش انما الحجاب الخليجى ده ميتلبسش تانى حتى لو خارجة البلكونة
سهام:الحق عليا طالعة الم الغسيل انا المفروض اسيبهم يتحرقو في الشمس خصوصا الترينج الاديداس بتاعك
صفوان:يولع الترينج ويولع الغسيل كله مش احسن متتعلقى من شعرك ده في نار جهنم
لو شفتك طالعة كده تانى يا سهام هحلقلك شعرك اللي باين ده
سهام:وهتتحمل شكلي بعد ما تعملها ها ده منظر يجبلك كوابيس بالليل وانت نايم يا صفوان
صفوان وهو بيضحك: كوابيس كوابيس انا راضى
سهام:لا يا عم وانا مش راضية بعد كده هشوف طرحة مببتزحلقش اطلع الم بيها الغسيل انا مش مستغنية عن شعرى المهم علي ما تاخد دوش هكون لميت الغسيل وحطيت الغدا علي السفرة.

انا طابعة صور لصفوان علي مج بشرب فيه دايما
طابعة صورتين ليه واحدة بشكله دلوقتى وواحدة قديمة من خمس ست سنين ومطبوع بينهم صورة مكتوب فيها
وانت البداية فى كل شئ ومسك الختام
المج ده معايا بقاله تلت سنين
عملته ولما بكون لوحدى بشرب فيه وافضل ابص علي صور صفوان واكلمهم اقولهم كل الكلام الحلو اللي مش عارفة اقولهولو فى وشه وكل مشاعرى اللي مبقدرش اطلعها قدامه بحكى عنها لصوره
هو مج سحرى يعنى بيبقي لونه اسود واول ميتحط فيه مياه سخنة بيلون وبتظهر الصور
قبل ما اتجوز كنت بشرب فيه واغسله واحطه في اوضتى علشان ماما متعملش فيه حاجة سخنة وتبان الصور
ودايما كنت بشرب فيه بالليل بعد ماما ما تنام
ودلوقتى بعد ما اتجوزت صفوان مخبياه ورا الحلل في المطبخ وبشرب فيه بالنهار وهو في المعرض.

فى مرة كنت بكلم مروة صاحبتى هى مخطوبة وبتحب خطيبها بس هو ميستاهلش
سهام:صباح الفل يا مروة
مروة بصوت مخنوق:صباح النور يا سهام
سهام:مدام قولتى يا سهام مش يا سوسو تبقي مضايقة من حاجة صوتك كمان مخنوق
فيه ايه مالك
مروة:يحيى
سهام:مدام قولتى يحيى يبقي الموضوع مهم وكبير احكى طيب حصل ايه
مروة وهى بتعيط:بيكلم بنات يا سهام وبيخرج معاهم
شفت صور ليهم سوا علي موبايله.

ولما سالته ايه ده قالى ان ده تضيع وقت وطيش ولما نتجوز هو هيبطل كل ده ولما قلتله انا ناقصنى ايه علشان يعمل فيا كده قالي انى مش ناقصنى حاجة وان البنات دى اقل من انى اقارن نفسي بيهم وانى احسن منهم مليون مرة وعلشان كده هو هيتجوزنى انا وهما هو هيبعد عنهم ويرميهم رمية الكلاب ولا هيفرقو معاه في حاجة انما انا وبس اللي بيحبها وفارق معاه وجودها بجد.

سهام:وانتى عملتى ايه
مروة:سيبته ومشيت رجعت البيت وفضلت طول الليل بعيط ومبردش علي مكالماته
سهام:وناوية علي ايه
مروة:مش عارفة
سهام:هو ايه اللي مش عارفة امال مين اللي هيعرف
مروة انتى احسن من كده بكتير زى ما هو قال احسن من البنات دى مليون مرة بس كمان انتى احسن منه هو مليون مرة وعلشان كده انتى تستاهلي واحد احسن منه بكتير.

هو مش هيتغير يا مروة اللي في طبع مبيغيروش وده طبع فيه كمان مش هيعرف يبطل بعد الجواز اللي اتبنا فى سنين مش هيتهد في شهر هيفضل زى ما هو وانتى هتتعذبي معاه وهتعيشي اسوء ايام حياتك معاه وهو بيخونك وبيضيع ثقتك في نفسك وفيه
متعمليش في نفسك كده
مروة وهى بتعيط:بس..بس انا بحبه
سهام:وهو مبيحبكيش مدام مقرف وبيعرف عليكى بنات مقرفة زيه يبقي مبيحبكيش ولا يستاهل تحبيه يا مروة
هو مش عارف قيمتك بس انتى تعرفي قيمة نفسك
وانتى اغلي من كده بكتير وتستاهل واحد غالي زيك واحد بيخاف من ربنا واحد يتقى ربنا فيكى وفي نفسه.

مروة:يعنى اخسره
سهام:يعنى اكسبي نفسك
يحيي واللي زيه خسارتهم مكسب
واللي يختارهم عمره مبيكسب لانهم مش مكسب اصلا
مروة:معاكى حق..بس انا هتعب من غيره
سهام:وهتتعبي اكتر معاه
صدقينى هتنسيه وحياتك هتكمل وربنا هيعوضك اللى زى يحيى دول نسيانهم سهل لانهم ميستاهلوش نفتكرهم من اساسه
مروة:صح اتعب شوية من غيره احسن ما اتعب معاه بقية عمرى
سهام:بالظبط كده
مروة:معلش نكدت عليكى
سهام:بس يا عبيطة احنا اخوات ولو مكنتيش تحكيلي امال هتحكى لمين المهم مضايقيش نفسك يا حبيبتى وابقي كلمينى عرفينى حصل معاكى ايه
مروة:حاضر يا سوسو انتى تؤمرى.

قفلت مع مروة عملت نسكافية وفضلت ماسكة المج وبصا لصور صفوان وعمالة افكر في صفوان وفي حبي ليه
وفجاة لقيت صفوان دخل عليا البلكونة
حاولت اتوه علشان اخرجه من البلكونة وميشوفش المج
سهام:الطرحة مظبوطة اهو ومفيش شعره واحدة باينه
في ايه جاي بدرى النهاردة
صفوان وهو بيقعد علي كرسي:دماغى صدعت جامد وحسيت انى تعبان هاتيلي حاجة للصداع واعمليلى نسكافية زيك...ايه ده
سهام بخوف:اااا...ايه

صفوان:دى صورى انتى حطاهم علي مج ليه كمان انا اول مرة اشوفه
سهام بلجلجة:اصل...اصلي كنت عملهولك هدية
صفوان:وبتشربي فيه ليه بتجربيه علشان تتاكدى انه شغال
كمان شكله مش جديد...ايه الجملة المكتوبة دى
سهام:ععع...عادى جملة بحبها فكتبها عليه ...انا هروح اعملك نسكافية واجبلك حاجة للصداع

وجريت من قدامه وانا مش عارفة لو سألنى تانى هقوله ايه بس الحمد لله هو مسألش انا لما عملتله النسكافية وجبتهوله فضلت اتوه في الكلام وهو مفتحش الموضوع تانى بس خد المج مش انا اتزفت قولتله انى جايبهوله هدية مينفعش اعترض
بعد شهرين كان فرح واحدة صاحبتى قلت لصفوان انى عايزة اروح وهو قالي انه تمام هيودينى
الفرح كان في قاعة في المعادى
فضلنا تلت ساعات تايهين بالعربية ومش عارفين نوصل للقاعة
صفوان بعصبية:دى رابع مرة اعدى من الشارع ده دى متاهة مش شوارع انا زهقت وكل ما بسأل حد يطلع بيفتى
سهام:مش مشكلة اكيد انت هتعرف الطريق
صفوان:انتى مش خايفة لاننا تايهين

سهام:لا انا عمرى ما اخاف وانا معاك كمان احنا مش تايهين انا متاكدة انك هتهرف الطريق وتطلعنا من هنا
صفوان:بس كده هتتاخرى علي فرح صاحبتك
سهام وهى بتضحك:اتاخر ايه يا راجل يا طيب
ده انا مش هلحق الزفة حتى
بس هى تستاهل حد قالها تعمل فرحها في قاعة مش عارفين نوصلها
صفوان:وعادى هى مش هتزعل منك
سهام:لا انا هبقي اعرفها اللي حصل كمان هبقي اروح اباركلها في شقتها
بعد ربع ساعة
صفوان:اخيرا خرجنا
سهام:كفارة
المهم هتخرجنى فين
صفوان:دلوقتى
سهام:اه طبعا انا تأنقت ومش هيضيع تأنقى علي الفاضي
مدام الفرح كده بح يبقي نخرج انا وانت
تيجى ندخل السينما حفلة الميدنايت
صفوان:سينما في نص الليل
سهام:مجربتهاش قبل كده وعايزه اجربها معاك
تحب نروح مكان تانى

صفوان:لا تمام السينما كويسة
وروحنا السينما وبعدها خرجنا اتعشينا بصراحة اتبسطت مش عايزة اكون شريرة بس كويس انى فوت فرح صاحبتى

بعد ست شهور عمى مات صفوان كالعادة كان واقف زى الجبل فى العزا وكان بيقوى مرات عمى واخواته البنات
بس انا كنت خايفة عليه هو طول التلت ايام منامش وكان بياكل اللي يخليه يقف علي رجله بس
بعد ايام العزا مخلصت صفوان كان فى اوضتنا قاعد علي السرير بس كأنه في دنيا غير الدنيا حسيت كانه عجز في تلت ايام بس عدو علي موت عمى صفوان شكله كبر يجى عشر سنين على عمره كان قاعد وكأنه في دنيا تانية غير الدنيا اللي احنا فيها روحت قعدت قدامه علشان اتكلم معاه مكنتش اعرف هقوله ايه بس انا مش متحملة اشوفه كده.

فضلت دقيقة ساكتة وبفكر اقوله ايه وهو تقريبا مش حاسس بوجودى وبعدين مسكت ايده بايديا الاتنين وبعدين بدات اتكلم
سهام:صفوان...علشان خاطرى متقلقنيش عليك عبر عن اللي جواك يا صفوان اتكلم عيط متشلش جواك حزنك
انا قلبي واجعنى علشانك اوى وخايفة عليك انت كده هيجرالك حاجة

وانا مليش غيرك بعد موت بابا وعمى بقيت فعلا مليش في الدنيا كلها غيرك حبيبي انت اقوى واحد في الدنيا كلها وقدام مرات عمى واخواتك انت كنت قوى وصبرتهم وسندتهم وقويتهم
بس انت مش محتاج تتظاهر بالقوة دى قدامى اللي مات ده غالي يا صفوان والغالين لما بيسيبونا بياخدو حتة من قلوبنا معاهم بالله عليك تتكلم تعيط متوجعش قلبي عليك انت عارف انا معيطش علشان عارفة ان انت كمان معيطش والعياط راحة مقدرتش اعيط علي عمى لوحدى وارتاح وانا عارفة انك تعبان وكاتم وشايل وجعك وحزنك كله جواك انا حسا كأن ابويا اللي مات مرة تانية يا صفوان عمى كان زي ابويا والله وربنا يعلم غلاوته عندى انا محستش باليتم من بعد بابا بسببه وبسببك
ودلوقتى مبقاليش غيرك علشان خاطرى متخوفنيش عليك.

وقول حاجة من اللي جواك يا صفوان
صفوان وهو بيحضنها وبيعيط:انا مش مصدق انى مش هشوفه تانى يا سهام مش مصدق انه خلاص مبقاش في الدنيا وانى لو نزلت دلوقتى تحت مش هلاقيه بيقرء في مصحفه زى عوايده مش مصدق انى بقيت مسئول عنكم لوحدى من غيره
انا حاسس انى ضهرى اتقطم انا تعبان انا تعبان اوى
سهام وهى بتعيط وبتطبطب عليه:عمى في مكان احسن يا صفوان هو وبابا فى مكان احسن بكتير ربنا يجمعنا بيهم في اعلي جنانه علي خير وانت هترتاح يا حبيبي ربنا هيربط علي قلبك ربنا هيصبرك وضهرك عمره ميتقطم ابدا لانك راجل وابن راجل يا صفوان انت اقوى راجل في الدنيا كلها والله ومسئوليتنا دى انت قدها وقدود
صفوان انت سامعنى.

لقيته نام غطيته وطفيت النور ونمت انا كمان
تانى يوم صفوان نزل المعرض
صفوان طلع صدقات كتير علي روح عمى مش بس فلوس لا كمان طلع كذا صالون و كذا مطبخ ببلاش اتبرع بيهم لعرايس وعرسان ظروفهم صعبة وكتير كنت بسمعه بيدعى لعمى وهو بيصلي وبعد ما يخلص صلاة
عدا تمن شهور والحياة استقرت
الحياة مبتقفش علي حد مهما كان مين ومهما كانت غلاوته عندنا بس الحياة عمرها ما وقفت ولا عمرها هتقف علي حد ده طبع الحياة انها مستمرة وبتمشى مهما حصل.

انا كنت اتخرجت واشتغلت مدرسة فرنساوى
صفوان معترضش علي حكاية انى اشتغل دى خصوصا اننا لسه مجبناش اطفال وانا فعلا يومى فاضى
وانا فى المدرسة قابلت مدرس كان بيدينى فرنساوى وانا فى ثانوى كان سافر بعد ما انا خلصت ثانوى ورجع وبيشتغل في نفس المدرسة اللي انا اشتغلت فيها بس انا كنت بدرس لاعدادى وهو كان بيدرس لثانوى انا اشتغلت في مدرسة لغات
هو يوم ما شافنى حاول يطول في الكلام بس انا قصرت معاه في الكلام
بعد يومين لقيت صفوان راجع البيت ووشه احمر وهيطلع نار من مناخيره زى التنين المجنح.

صفوان بغضب وصوت عالى:سهام ..سهام...سهااااام
سهام:ايوه يا صفوان في ايه
صفوان:انتى فين دبلتك
سهام وهى بتشاور بايديها:اهى في ايدى
صفوان:ايه الزفت اللي انتى لبساه فوقها ده
سهام:ده محبس
صفوان:ولبساه ليه
سهام:علشان الدبلة واسعة عليا كمان انا لبساه من يوم ما جبناها من سنة ونص وانت مقولتش حاجة حصل ايه دلوقتى
صفوان بغضب:حصل ان جالك عريس النهاردة يطلب ايدك منى
سهام وهى بتضحك جامد:هههههههه لا بجد حصل ايه مضايقك كده
صفوان بغضب بيحاول يتحكم فيه:انا مبهزرش وبطلى تضحكى انا متنيل بتكلم جد.

سهام باستغراب:انا جالى عريس
صفوان:اه تخيلى
سهام:دلوقتى الا ما حصلت قبل ما اتجوزك
صفوان:مين قالك انك مكنش بيجيلك عرسان قبل كده
سهام:هو كان بيجى انتو عمركم مقولتولي ان في حد اتقدملى
صفوان:علشان كنا بنرفضهم من بره بره حتى مرات عمى كانت بتعرف اللي بيحاولو يفاتحوها هى انك محجوزة
سهام:محجوزة لمين
صفوان:انتى هبلة يا بت هيكون لمين ليا طبعا
سهام:من غير متعرفونى
صفوان: وهو انتى كان عندك رأى تانى
سهام:لا طبعا بس انا بتكلم عن حقى فين الديمقراطية فين حقى فى الاختيار
صفوان:فين الفازة اكسرها علي دماغك
هو انتى كنتى هتختارى غيرى
سهام:مفيش غيرك اصلا علشان اختاره.

صفوان:نعم يعنى ايه
سهام:يعنى انا مش مقتنعة ان في رجالة غيرك في الدنيا
وكأنك الراجل الوحيد فيها فانا مضطرة اتجوزك بقي نظرا لعدم وجود بدايل من اصله
صفوان وهو بيضحك:انتى بتضحكينى وانا متعصب
سهام: طبعا لو مضحكتكش وانت متعصب هضحكك امتى يعنى بس مكملتليش ايه اللي حصل مين ده اللي جه يخطبنى من جوزى
صفوان:مدرس كان بيديلك وانتى في ثانوى سافر ورجع وبيشتغل معاكى في نفس المدرسة اللي انتى شغالة فيها بالمناسبة انتى هتسيبي المدرسة دى
سهام:حاضر

صفوان:مش هتقاوحى وتقولي لا وانا ذنبي ايه
سهام:لا انت كده كده مش هتقتنع وانا هسيب المدرسة بس هدور علي شغل في مدرسة تانية انا وانت متفقين علي مبدء الشغل نفسه صح
صفوان:صح
لا واعية وانا موافق بس المحبس ده ميتلبسش تانى علشان مدارى عالدبلة ومش باين انها دبلة
ولو الدبلة واسعة للدرجة دى ننزل نشتريلك غيرها
سهام:تمام موافقة طبعا
احط الغدا ولا عريس الغفلة ده سد نفسك
صفوان وهو بيضحك:والله حرقلي دمى يعنى متجوزك علشان تبقي علي اسمى واخلص من البلاوى اللي كانت بتتقدملك دى وبرضه بعد ما اتجوزتك ما خلصتش من الهم ده.

اعمل ايه بس احبسك في البيت
سهام بسرعة:لا تحبسنى في البيت ايه بس صلي علي النبي في قلبك خلاص بقا هو طيش شباب وراح لحاله والولد عرف غلطته وانه مينفعش يتقدم لبنات متجوزة والدبلة وهنغيرها والمحبس ومش هلبسه
صفوان وهو بيضحك:خلاص اهدى اهدى
سهام:انا بس عندى سؤال علشان كلامك موغوشنى
صفوان بابتسامة:كلامى موغوشك ليه كفالله الشر

سهام:هو يعنى..انا ليه حسا من كلامك انك مضايق..هو طبيعي تضايق مين مش هيضايق لما واحد يطلب منه ايد مراته... انا قصدى يعنى انك غيران...غيران وغيرتك مش من دلوقتى من زمان ..يعنى هو انت ...كأنك كده يعنى بت..اصل اللي بيغير ده لازم يكون بي..المعروف ان الغيرة دى بتكون علي حد انت بتح...
صفوان وهو بيضحك:رجعتى للجلجة ليه بس اهدى
قصدك انى بحبك صح
طيب مانا بحبك وبحبك اوى كمان ومن زمان
سهام وهى بتقع:استنى كده يمكن ميغماش عليا

اغمى عليا وقمت لقيت صفوان بيشممنى برفان وبيرش علي وشى مياه
سهام وهى بتكح:كحكح ..خلاص يا صفوان انت بتفوقنى ولا بتسقى الزرع غرقتنى
صفوان بقلق:انتى كويسة
سهام:اه انا بخير متقلقش
صفوان وهو بيتنفس براحة:الحمد لله وقفتى قلبي كل ده علشان قلتلك انى بحبك
سهام:ايه ده انت قلتها بجد انا مكنتش بحلم
صفوان وهو بيضحك:مفيش حد غيرك بيضحكنى كده في كل وقت
سهام:مكنتش بتضحك علي كلامى قبل كده

صفوان:علشان كنت بحس انى شكلي هيبقي اهبل اوى وانا بضحك صراحة بس لما كنت بفتكره وانا لوحدى كنت بموت من الضحك انا اصلا يومى مكنش ينفع يبدء من غيرك انتى وكلامك انتى عارفة ان انا اللي طلبت من بابا الله يرحمه يطلب منك تطلعى تديله الحقنه
سهام:قول والمصحف
صفوان وهو بيضحك:لا اله الا الله
مينفعش تقولي والمصحف من كان حالفا فليحلف بالله
سهام:استغفر الله خلاص قول والله العظيم
صفوان:والله العظيم
سهام:يعنى انت بتحبنى
صفوان:اه بحبك

سهام:من زمان
صفوان:من زمان جدا
سهام:وكلامى بيضحكك
صفوان بابتسامة:بيضحكنى اوى
سهام:واشمعنى بعد ما اتجوزنا بقيت بتضحك عليه
صفوان:علشان بقينا بنتكلم اكتر من الاول بكتير وكمان احنا عايشين سوا هروح فين اضحك لوحدى اسيبك بتهزرى في الصالة وادخل اضحك في اوضة النوم
سهام وهى بتضحك:لا معاك حق
صفوان:انتى كنتى بتكدبي ساعة المج صح المج قديم
سهام:اه كنت بكدب هو كان معايا من تلت سنين

صفوان:وبرضه كنتى بتكدبي لما قلتى انك كاتبة الجملة لانك بتحبيها انتى كتباها علشانى صح
سهام:اه برضه كنت بكدب الجملة علشانك ومتلقيش غير عليك اصلا
صفوان:لا انا كده بدأت اتوغوش ..يعنى انتى كده بتح
سهام وهى بتقاطعه:يعنى انا بحبك ومن زمان
صفوان بابتسامة: بجد
سهام:بجد جدا
صفوان:يعنى بطلتى تخافي منى
سهام:انا مكنتش بخاف منك انا كنت بهابك ولسه بهابك انت ليك هيبة فظيعة يا جدع مانا مش شيفاك الراجل الوحيد فى الدنيا من فراغ يعنى
صفوان وهو بيضحك:انا بحبك انا بحبك اوى
سهام:وانا كمان بحبك اوى

بعد ست شهور انا بقيت حامل وجبت مالك وبعده باربع سنين جبت قاسم
الحياة اختيارات ايا كان اللي بيحصلنا فيها فهو اختيارنا
من اول علمى ولا ادبي واحنا في ثانوى وبعدها الكلية والشغل وبعدهم الشخص اللي هنرتبط بيه وولادنا وطريقة تربيتهم
حتى لو انجبرنا علي حاجة فاحنا اللي بنختار ننجبر احنا اللي بنختار نسكت ومندافعش عن اختياراتنا التانية
احنا اللي بنختار الجبن والضعف والعجز

بتبقي اختياراتنا ومحدش بيدفع تمنها غيرنا
انا اخترت اتجوز صفوان لانى مكنتش شايفة انى هقدر اعيش حياتى مع حد غيره وعلشان كده كنت قابلة بكل ما فيه
حتى كنت قابلة انه مبيحبنيش ومكنش عندى امل كبير انه يحبنى طبعا ده قبل ما اعرف انه بيحبنى
مروة اختارت انها تسيب يحيى لانها فهمت انها مش هتتحمل حياتها معاه لا هتقدر تثق فيه ولا هتكون سعيدة معاه
ولا هو هيصونها ولا هيحافظ عليها

بعد ما فسخت خطوبتها واحدة واحدة نسيته وبعد سنة اتخطبت لواحد جارهم واتجوزو وخلفت منه ملك ومازن
ويحيى عرفت انه اتجوز وطلق لان مراته متحملتش خيانته الكتير ليها واتجوز تانى وخلف بنتين وولد
يحيي اتقتل واحدة كانت بتخون جوزها معاه جه وشافهم وقتلهم هما الاتنين واتحسبت جريمة شرف خد فيها ست شعور مع وقف التنفيذ ومقضاش يوم واحد فى السجن

مراته سابت القاهرة وراحت عاشت في اسكندرية علشان ولادها خصوصا البنتين اللي كانو بيتعايرو ولسه هيتعايرو بابوهم اللي مات مقتول فى جريمة شرف
ساعتها مروة اتأكدت ان اختيارها كان صح وانها جنبت نفسها وجع كبير لان اختيارها ليحيي هى اللي كانت هتدفع تمنه هى لوحدها او هى وولادهم لو خلفو
الحياة اختيارات واختياراتك محدش هيدفع تمنها غيرك ولا حد هيتحمل نتيجتها غيرك حتى لو انت سبت حد يختارلك برضه انت اللي هتدفع تمنها وانت اللي هتتحمل نتايجها
هتدفع تمن اختيارات مخترتهاش وهتتحمل نتايج اختيارات مش بتاعتك

علشان كده خليك فاكر انك مسئول عن حياتك وعن اللي هيجرا فيها وعلشان كده لازم انت اللي تختار وحاول تختار صح لأن تمن اختياراتك محدش غيرك هيدفعه وحياتك محدش غيرك هيعيشها

الفصل التالي
جميع الفصول
روايات الكاتب
روايات مشابهة
الآراء والتعليقات على الرواية
W