قصص و روايات - قصص هادفة :

حكايات منار الحكاية 24 بعنوان سوء تقدير

حكايات منار بقلم منار محمود

حكايات منار الحكاية 24 بعنوان سوء تقدير

جاسر :يعنى ايه مش هتقدرى تكملى معايا
مروة :يعنى مش هقدر اكمل معاك يا جاسر بجد مش هقدر
بقية حياتى مينفعش اعيشها معاك احنا مينفعش نتجوز
جاسر بسخرية :ليه بقى ان شاء الله
مروة بجدية :علشان الجواز اساسه القبول
وانت مش قابلنى

جاسر :مين قالك انى مش قابلك
مروة :انا بقولك انك مش قابلنى لانك متعرفنيش يا جاسر انا مورتلكش نفسي معرفتكش عليا انا خبتنى منك اللي انت شفتها دى مش مروة
انا مباكلش بالشوكة والسكينة انا مباكلش غير بالمعلقة والشوكة باكل بيها المكرونة بس انا مبلبسش كعب عالي غير في المناسبات وبسببك بقيت بلبسه كتير لما خلاص هيجيلي الديسك انا مش رقيقة انا مش هادية انا رغاية ومبفكرش كتير في كلامى قبل مقوله ومبفكرش اساسا في تصرفاتى قبل ما اعملها انا متهورة وغبية انا بهزر طول الوقت.

جاسر بصدمة :انتى بتقولى ايه
مروة :بقولك الحقيقة انا كدبت عليك
اللي انت بتتعامل معاها بقالك اربع شهور دى مش انا
دى الشخص اللي انا قررت اكونه
بنت هادية عاقلة ووقورة مخطوبة لانسان ناجح وذكى وعارف هو عايز ايه عملى ومبيضيعش وقت
انا اسفة انا مكنتش بخدعك قد ما كنت بخدع نفسي
انا مستحيل اكون الشخصية دى مستحيل اكمل حياتى كده
مش هعرف الموضوع متعب فعلا انا بفكر طول الوقت في تصرفاتى وكلامى حسا انى بنهج طول الوقت كانى ببذل مجهود كبير
انا مش مروة اللي انت تعرفها

انا مارو
جاسر باستغراب :مارو
مروة بابتسامة :اه مارو البنت المجنونة اللي لسانها جايبلها الكافية اللي عقلها موديها في داهية و بتمشي ورا قلبها عميانى مارو اللي انت مستحيل تقبل بيها يا جاسر
واللي مستحيل تقبل بيك
زى مقلتلك الجواز اساسه قبول وانا وانت مفيش بنا قبول
جاسر :انا مش فاهمك
مروة :صح ولا انا كمان فهماك
انا فعلا مش فاهمة انت ازاى عايش كده ازاى بتخطط لكل حاجة كده مش مستوعباك
وعلشان كده بقولك احنا مننفعش لبعض
انا فعلا اسفة على اللى عملته

وصدقنى قبل ما اكون اسفة ليك انا اسفة لنفسي
بص انا اسفة لينا احنا الاتنين
جاسر :انتى ليه عملتى كده من الاول
مروة :علشان كنت مفكرة انى محتاجة اتغير وكنت مفكرة انى غلط
جاسر :وايه اللي حصل
مروة :اكتشفت انى مش محتاجة اتغير لانى مش غلط ولانى مش اقل من اي حد وان شخصيتى ليها مميزاتها حتى لو كانت عيوبها موديانى في داهية
جاسر :واكتشفتى ده ازاى
مروة :انا مش مبسوطة بقالى اربع شهور حسا انى تقيلة اوى كان فيه حمل علي اكتافى
معاك بتصرف بالظبط عكس طبيعتى وحسا انى بكدب عليك وعلي نفسى

ومع بقية الناس بضبش لا عارفة اكون مروة ولا عارفة اكون مارو بقيت مسخ في الوسط بينهم نسخة مشوهة من الاتنين
محستش انى رجعت خفيفة غير لما قررت اقبلنى زى ما انا من غير التغييرات المملة الخنيقة دى
جاسر :وانا من ضم التغييرات المملة الخنيقة دى
مروة :لا انت مش من ضمها
الغلطة فعلا غلطتى من الاول غلطتى لوحدى
انا كان لازم اؤمن بنفسي اكتر من كده وادافع عن نفسي اكتر من كده واتمسك بنفسي اكتر من كده
انا كنت كانى بحاول اغير جلدى ودى حاجة متعبة فعلا انت مش متخيل الحكاية صعبة قد ايه
مكنتش هتحمل اكمل حياتى بالصعوبة دى

واكيد مكنتش هقدر افضل بخدعك وبكدب عليك ومخبية نفسي الحقيقية منك اصلي ممكن اقدر اعمل كده شهر سنة ولا اتنين انما العمر كله مستحيل واكيد هبانلك علي حقيقتى
وانت مش هتقبل مارو وبصراحة يعنى من غير متحس بالاهانة مارو كمان مش هتتقبلك
جاسر :بتتكلمى عن نفسك كانك حاجة كبيرة وكانك كتير عليا
مروة :هو انا فعلا حاجة كبيرة
بس مش كتير عليك ولا حاجة
انت كمان حاجة كبيرة وكبيرة اوى كمان
بس احنا مش شبه بعض خالص بعاد عن بعض اوى ومفيش ارض مشتركة تجمعنا
انا بحترمك وبقدرك جدا على فكرة
جاسر :بتحترمينى وبتقدرينى

مروة :اه جدا وبتمنالك ان ربنا يرزقك باللي تسعدك وترتاح معاها بس بينى وبينك متمناش تكون بنفس شخصيتك لان كده حياتكم هتبقي مملة اوى بصراحة
اتمنى ربنا يرزقك بواحدة تخليك تشوف الدنيا وتعيشها بشكل مختلف وانت كمان تخليها تشوف الدنيا وتعيشها بشكل مختلف
جاسر :بصى انا مش عايز اقلل منك ولا حاجة بس الصراحة اللي انت قلتيه ده مفرقش معايا فى حاجة
مروة :عارفة وعلشان كده بقولك اننا مننفعش لبعض علشان اللي مفرقش معاك في حاجة ده بيمثلى انا كل حاجة
بس حتى لو مش فاهمه وحتى لو مش فارق معاك
اتمنى ربنا يرزقك بيه علشان تكون مرتاح في حياتك وتكون عايش بجد لانك تستاهل انت فعلا انسان كويس
انا هخرج من حياتك للابد وللمرة التالتة انا فعلا اسفة ليك
بعد اذنك

انا مروة او مارو بحب اسم مارو اكتر عندى اربعة وعشرين سنة مش محتاجة احكلكم عن شخصيتى اكيد عرفتوها من كلامى مع القيصر جاسر اول مشوفته حسيته كده قيصر ليه هيبة فظيعة حسيت انى خايفة منه شوية
اصل العيال دايما بيخافو من الكبار
وانا جوايا عيلة مبتكبرش العيلة دى خافت منه اول ما شافته
العيلة دى اللي انا كنت بحاول اقتلها جوايا وعلشان كده وافقت عليه بس وهى بتموت انا كنت حاسة ان روحى بتطلع
حياتى من غيرها صعبة فعلا صعبة ولا تحتمل

وقبل ما تطلع اخر نفس لحقتها واتمسكت بيها لان انا وهى واحد ولانى مسواش من غيرها
مين قال ان لازم كلنا نعمل نفس الحاجة علشان نبقي ناجحين مين قال اننا لازم نبقي شبه بعض علشان نبقي صح
كل واحد فينا ناجح بطريقته وكل واحد فينا صح برضه بطريقته
ده اللي استفدته من تجربتى الفاشلة في التغيير ده اللي طلعت بيه من حكايتى مع القيصر جاسر واللي الحمد لله كتبتلها كلمة النهاية لما فسخت خطوبتى منه النهاردة
محتاجة اكل ايس كريم احتفال بالنصر العظيم ده

جبت ايس كريم ورجعت البيت لقيت دعاء بنت اختى عندنا
بالمناسبة انا عندى اخ اكبر منى بسبعتاشر سنة وده متجوز ومخلف طبعا وعنده بنتين انا عمتهم بس مش عمة حرباية خالص والله انا عمة كيوت جدا
وعندى اخت اكبر منى بتلتاشر سنة اتجوزت وهى عندها عشرين سنة
الفرق بينى وبين اخواتى كبير تقريبا اهلي كانو استكفو ومكانوش عاملين حسابهم يجيبونى خالص بس ربنا كاتبلى وكاتبلهم يجيبونى وانور حياتهم
اختى عندها دعاء وسارة ومنى واخيرا محمد هى وجوزها كان نفسهم في ولد ومصدقو جابو بعد شوقة زى ما بيقولو محمد مدلع دلع مدلعهوش اخواته التلاتة

انا رجعت لقيت دعاء عندنا
واول مش شافتنى طلبت منى ندخل اوضتى نتكلم
مروة :وادينى حطيت الايس كريم فى الفريزر مع انى هموت واكله وجتلك نتكلم في ايه بقي يا ست دودو اهم من الايس كريم
دعاء وهى بتعيط :انا فى مشكلة يا خالتو
مروة بخضة :مشكلة ايه بس بطلى عياط واحكيلي
دعاء :ماما عرفت انى بحب نادر
مروة :نادر مين
دعاء :نادر ابن طنط لميا جارتنا وصاحبة ماما
مروة :وعرفت ازاي
دعاء :سمعتنى وانا بكلمه في الموبايل
مروة :وبعدين ايه اللي حصل
دعاء :اتخانقت معايا وزعقتلي

انا خايفة تقول لبابا يضربنى خايفة كمان بابا يعمل حاجة لنادر خايفة يبعدونى عنه ده مش حقهم هما يعرفو عنى او عن سارة ومنى ايه هما عنيهم مبتشوفش غير محمد دنيتهم مفيهاش غيره حرام يبعدونى عن الانسان الوحيد اللي بيهتم بيا ومحسسنى انى ليا وجود ولازمة في الدنيا
انا بعد ما هى اتخانقت معايا جيت هنا اتصلت ببابا استأذنته وجيت علشان تلحقينى خليها متقولش لبابا يا خالتو امنعيها علشان خاطرى
مروة :خلاص يا حبيبتى اهدى وانا هكلمها
قومى ساعدى تيتا في الغدا علي ما انا اكلمها
دعاء :حاضر

كلمت صفية اختى في الموبايل
صفية :طبعا الهانم هربت عندك بعد عملتها المنيلة
مروة:عملة ايه هى عملت ايه غلطت في ايه
الغلط غلطك انتى وابوها
صفية :وانا وابوها غلطنا في ايه قصرنا معاها في ايه
مروة :انتى بتسألى بجد

غلطتو في انكم قبل ما تخلفو محمد كنتو مستنينه ومش فرحانين ببناتكم نعمة ربنا عليكم وبعد ما خلفتوه مهتمتوش بغيره كأنكم مخلفتوش غيره
قصرته في حقهم ومعدلتوش بينهم فرقتم بينهم في المعاملة
هتبوظو محمد من كتر الدلع هتهدو بدل ما تبنو
وهتكرهو اخواتو فيه وفيكم
انتى تعرفى ايه عن بنتك يا صفية
صفية :يعنى ايه اعرف عنها ايه اعرف عنها كل حاجة دى بنتى
مروة :لا انتى متعرفيش عنها حاجة وانا اعرف عنها اكتر منك ونادر يعرف عنها اكتر منى ومنك
انتى السبب في اللي هى عملته

صفية :وانا السبب ليه بقي
مروة :انتى اللى سبتى فراغ كبير في حياتها هو ملاه
انتى اللي خلتيها محتاجة اهتمام من اي حد
انتى اللى معرفتيهاش ان علاقتها بيه حرام ومتنفعش
انتى اللي سبتيها تقرب منه وانتى مش دريانة بحاجة انتى اللي خليتى بنتك صيدة سهلة لاى حد ببعدك عنها
كنتى فين انتى وهى بتقرب منه وبتحبه ما هى اكيد محبتوش بين يوم وليلة ردى عليا كنتى فين
بتحاسبيها علي ايه والغلط غلطك من الاول

ودلوقتى هتعملي ايه هتقولي لابوها علشان يرنها علقة محترمة علشان تكرهه وتكرهك وتحب نادر اكتر
هتبعديها عنكم اكتر ما هى بعيدة صح
هتستسهلي ويا ريته هيجيب نتيجة ولا هيكون حل من اصله بدل ما تقربي منها وتحاولي تصلحى غلطك الكبير في حقها هى وسارة ومنى
صفية :يعنى اعمل ايه
مروة :متقوليش لجوزك
قربي من بنتك واتكلمى معاها صاحبيها يا صفية بدل ما هى بتخاف منك ومن ابوها كده الخوف مش حل ولو من خوفها مغلطتش قدامكم هتغلط من وراكم
الحل انها تحبكم وتخاف على زعلكم وتخاف تخسر ثقتكم
الحل انك تعرفيها الحلال والحرام

انما غير كده هتخسريها هى واخواتها واولهم محمد
اعدلى بينهم يا صفية ابوس ايدك متضيعش ولادك بايدك متضيعش البنات من قلة الاهتمام ومتضيعيش محمد بكتر الاهتمام والدلع ربيهم صح
صفية :وحتى لو مقولتش لعادل هعمل ايه هى مينفعش تفضل بتكلم الزفت نادر
مروة :مش هتفضل بتكلمه انا وانتى مش هنسيبها
بس زى مقلتلك قربي منها صاحبيها وانا معاكى وهننجح انا وانتى وهنبعدها عنه
صفية :خلاص مش هقوله وانتى اتكلمى معاها وعرفينى هتقولك ايه
مروة :حاضر وانتى عرفى جوزك انها هتبات معايا النهاردة علشان اتكلم معاها براحتى واعرف كل حاجة عن الموضوع ده
صفية :ماشي

بعد ما اتغدينا انا وماما وبابا ودعاء
خدتها في اوضتى علشان نتكلم
مروة وهى بتاكل الايس كريم :ادينى كلمت امك وخليتها متقولش لابوكى لا وكمان هتباتى معايا النهاردة احكيلي بقي ايه حكاية سى نادر ده
دعاء :نادر ده جارنا ساكن فى الشارع اللى ورانا مامته وماما اصحاب هو اكبر منى بسنة معايا في المدرسة انا وهو صحاب من صغرنا بس من كام شهر قالى انه بيحبنى وان لما يخلص جامعة ويشتغل هنتجوز وطلب منى نرتبط

مروة :وطبعا انتى وافقتى علشان تحكى لولادك عن قصة حبك انتى وابوهم اللي بدأت من وانتى فى اولى وهو في تانية ثانوى
ومحكتليش قبل كده ليه مش انا وانتى صحاب وانتى مبتخبيش عنى حاجة
دعاء :بصراحة كنت عارفة انك هتقوليلي حرام وغلط وعيب
وانتى اصلا متعرفيش نادر هو بجد انسان محترم
مروة :طيب قبل ما اكلمك في حتة حلال وحرام دى
عايزة اسئلك سؤال
انتى لحد من سنتين تلاتة كنتى بتحبي سبونج بوب جدا مبتفوتيش ليه حلقة ومبتناميش غير والدبدوب بتاعك اللي شكله في حضنك
وبعد كده بطلتى تتفرجى عليه واديتى الدبدوب بتاعك لمنى اختك ليه

دعاء :علشان كبرت مبقاش ينفع اتفرج عليه مبقتش بحس انى مبسوطة بقيت عايزة اتفرج علي افلام عربي واجنبي مش كرتون للاطفال
مروة :يعنى انتى في سنتين تلاتة اتغيرتى وبطلتى تحبي حاجة كنتى بتحبيها جدا
دعاء :اه اتغيرت مش كبرت طبيعى اتغير
مروة :بالظبط كده كل ما هتكبرى افكارك هتتغير هتحبي حاجات كنتى بتكرهيها وهتكرهى حاجات كنتى بتحبيها
افكارك هتختلف يبقي ازاي بقي تقررى انك ترتبطى بواحد علي اساس انك تكملي بقية حياتك معاه
وانتى ممكن كمان سنة او اتنين او تلاتة تلاقي نفسك لا بتحبيه ولا عايزاه
او هو اللي ممكن يحس كده لانه هو كمان كل ما هيكبر هيتغير

انا بكلمك اهو عن حالة انكم واخدين الموضوع جد مش قلة ادب ولعب عيال علشان انا عارفاكى كويس وانتى قلتى ان نادر محترم
ايه بقي اللي يضمن انكم لحد ما يجى الوقت اللى ممكن فعلا ترتبطو فيه وتتخطبو وتتجوزو اللى هو على الاقل كمان ست سبع سنين هتفضلو عايزين بعض ومقتنعين ببعض
دعاء :اممممممممممم.....مفيش حاجة تضمن
مروة :صح مفيش حاجة تضمن
يبقي ليه تحطى نفسك في الوضع ده

وكمان خايفة اهلك يعرفو يبقي بتعملي حاجة غلط ما هى لو صح مكنتيش هتخافى
وكمان بتعملى حاجة حرام لو انتى واثقة انها مش حرام كنتى هتقوليلي وتناقشينى وتدافعى عنه وعنك بس انتى عارفة ان ده مش حقيقي واننا لو اتناقشنا انا اللي هكسب النقاش
وعلشان كده خبيتى عن الكل حتى عنى
دعاء انا عارفة انك لوحدك وان بابا وماما مش قريبين منك
بس متعالجيش الغلط بغلط يا حبيبتى
علاقتك بنادر متنفعش مش بس علاقة الارتباط حتى صداقتكم متنفعش مفيش حاجة اسمها صداقة بين ولد بنت
دعاء :بس انا بحبه يا خالتو

ولو ما حبتش واتحبيت دلوقتى امال هيبقي امتى
مروة :صغيرة اوى يا قلبي علي انك تحبي وتتحبي صغيرة علي انك تعرفي الحب اللي بجد
ولو علي وقته فلسه بدرى ما انا عندك اهو اربعة وعشرين سنة لا حبيت ولا اتحبيت وعادى قلبي مصداش ومشاعرى محمضتش
ويا ستى لو عالحب فانا بحبك ومستعدة اجبلك انا دبدوب وقلب احمر فى الفالنتين
دعاء وهى بتضحك :خلاص هفكر
بس انتى ازاى عمرك ما حبيتى ولا اتحبيتى امال ابيه جاسر ايه
مروة :لا ابيه جاسر راح لحاله خلاص
دعاء :يعنى ايه
مروة وهى بترفع ايدها اليمين :يعنى فسخت الخطوبة
دعاء :سبتيه ليه ...علشان مبيحبكيش ولا بتحبيه

مروة :اه وكمان علشان كان اختيار غلط تخيلي انا فى سنى ده بختار اختيار غلط عايزة انتى يا مفعوصة انتى في سنك ده تختارى اختيار صح
دعاء وهى بتفكر :لا انا بدات اقلق..ممكن كلامك يكون صح
مروة :ايوه هو ده انا عايزاكى تقلقي وتفكرى فى كلامى ونتناقش فيه انا وانتى وانتى وماما اتفقنا
دعاء :انا وانتى ماشى بس انا وماما ازاى احنا مبنتكلمش مع بعض اصلا ماما مبتتكلمش مع حد ولا بتهتم بحد غير محمد
مروة :هتتغير يا حبيبتى انا وانتى هنخليها تتغير
دعاء وهى بتعيط :تفتكرى ممكن تتغير ممكن تقتنع انها عندها تلت بنات غير محمد ممكن تهتم بحد تانى غيره ممكن يفرق معاها حد تانى غيره يا خالتو
مروة وهى بتحضنها :ممكن طبعا يا قلب خالتو انا وانتى هنساعدها وهى هتتغير متقلقيش
دعاء :يا رب يا خالتو يا رب
انا بحبك اوى يا خالتو
مروة :وانا بحبك اكتر يا قلب وروح وعمر خالتو

تانى يوم دعاء رجعت البيت كلمتنى بالليل حكتلي ان هى وصفية اتكلمو قالتلى ان صفية مقالتش حاجة لعادل جوزها وكانت بتتكلم معاها شوية تتعصب وشوية تمسك نفسها
وفى الاخر قالتلها انها عايزاها متخبيش عليها حاجة تانى
قالتلي ان برغم انها لسه خايفة منها هى وباباها بس فرحانة شوية علشان حاسة ان صفية مهتمة بيها وبحاجة تخصها
ينهار ابيض دعاء كانت محتاجة لاى نوع من الاهتمام من صفية حتى لو كان خنيق وعصبية

انا قلتلها ان حلو وكده صفية بتحاول تتغير وتقرب منها
تديها هى فرصة بقي وتساعدها لحد ما تنجح وتتغير ويبقو صحاب ودعاء قالتلي حاضر
وقبلها كانت صفية كلمتنى وحكتلي وانا قلتلها تحاول تتحكم في عصبيتها وتتكلم مع البنت بهدوء تقرب منها وتتصاحب عليها مش تخوفها منها بالزعيق والخناق
وصفية قالتلي انها هتحاول

طلبت منها كمان تهتم بسارة وبمنى مش بس دعاء وتخلى جوزها كمان يهتم
بيهم قبل ما يخسروهم بجد وقلتلها كمان انها لازم تقلل دلع محمد لان الدلع الزايد بجد بيبوظ
وهى قالتلي برضه انها هتفكر في كلامى وهتحاول
قلتلها تحاول وانا معاها

احلي حاجة انى كنت بسمع كل حاجة مرتين مرة من صفية ومرة من دعاء كنت حلقة الوصل بينهم بس مع الوقت دورى قل لانهم فعلا قربو من بعض مبقوش محتاجنى زى الاول بقو بيعرفو يتعاملو مع بعض من غير مساعدتى باختصار بقو اصحاب ودعاء بعدت عن نادر مش بس بسبب كلامى
كمان علشان مبقتش محتاجاه لما صفية وعادل اهتمو بيها مبقتش محتاجاه مبقاش ليه فى حياتها مكان
خلاص الفراغ اللي كان في حياتها اهلها ملوه فوجود نادر مبقالوش لزوم

انا بشتغل فى شركة استيراد وتصدير بشتغل فى الشئون القانونية هناك لانى محامية نسيت اقلكم صحيح انى محامية
وكالعادة وانا قاعدة في مكتبي امجد زميلي جه يرخم عليا
امجد :انتى مش هتتجوزى يا مروة بقي
مروة :يا فتاح يا عليم يا رزاق يا كريم امجد اصطبح وقول يا صبح وحل عن سمايا
امجد :يا ستى اصطبحت وقولت يا صبح
اخلصي بقي وجاوبي ام سؤالى

مروة :لا يا امجد انا لسه صغيرة ارتحت طرقنى بقي وفرجنى علي جمال خطوتك
امجد :اربعة وعشرين سنة صغيرة ايه ناوية تتجوزى وانتى ستين سنة بدل ما تدخلى دار المسنين يعنى
مروة :اه حاجة زى كده
وبعدين مش كنت متنلية مخطوبة وفسختها من ست شهور حقي افضل سنتين الملم جراحى واتعافى من اللي حصل
امجد :تلملمى ايه وتبعترى ايه وتتعافى من ايه
ده انتى كنتى مكتئبة وانتى مخطوبة وبوزك كان قدامك قد زلومة الفيل ومرجعتيش تضحكى غير بعد ما سبتيه
مروة :هو علشان مبحسسكوش بآلامى يبنى انا بضحك علشان مبكيش
امجد وهو بيضحك :لا وانتى الصادقة انتى اللى رجعتى خفيفة من تانى يا مارو
مروة :قلت مية مرة متقوليش مارو دى

امجد :ليه نيرة وفاطمة مبيندهولكيش غير بيها
مروة :علشان هما اصحابي وحقهم يقولو اللي هما عايزينه انت بقي تقولهالي بتاع ايه هنتصاحب
امجد :وهو احنا مش صحاب
مروة :سبحان الله برضه مية مرة قبل كده قلت اننا مش صحاب يا امجد احنا زمايل
امجد :وليه احنا مش صحاب
مروة :هو انت فاضى موراكش شغل
امجد باصرار :جاوبى سؤالى
مروة بنفاذ صبر : علشان مفيش حاجة اسمها صداقة بين راجل وست يا امجد انا مؤمنة ان الصداقة لازم ميكونش فيها حدود وصداقتى بيك او باى راجل هيبقي فيها حدود كتير تبقي مش صداقة وتبقي متنفعش وغير انه اصلا حرام وغير انها مش هتفضل صداقة وبس ها خلاص جاوبت سؤالك ممكن تسبنى اشتغل واجرى علي اكل عيشي بقي
امجد :طيب انا عايز اقولك يا مارو براحتى وعايز نبقي صحاب واكتر من صحاب كمان

مروة :هو انا بتكلم بولندى
مقلت مينفعش حرام حرااااااام اغنيهالك علشان تفهمها
جوعتنى لسه فاطرة ومن كتر كلامى معاك عصبتنى وجوعتنى وهفطر تانى ارتحت كده
امجد :متجبيهاش فيا انتى كل يوم بتفطرى مرتين تلاتة بتيجى الشركة علشان تفطرى اصلا
مروة :انت مركز معايا اوفر وده غلط انت بتسحب كهربا كتير على فكرة وانا بدأت اقلق منك
امجد :انا مش عايزك تقلقي منى انا عايزك تحبينى
مروة :اللللللله انا كان قلبي حاسس اليوم ده مش هيبقي يوم لطيف
لا وزى ميكون كده هيبقي اخر يوم ليا او ليك هنا
امجد امشي من قدامى ومتعتبش المكتب ده تانى انا بحذرك مش عايزة اخد ضدك اجراء مش كويس
امجد :وبتقولي ان انا اللى بسحب كهربا كتير
يبنتى ادينى فرصة اقول جملة مفيدة واكمل كلامى للاخر
مروة :ميلزمنيش ومش...

امجد :اخرسي مروة اخرسى
مروة بصدمة :اخرس
امجد :اه اخرسي وادينى زفت فرصة اتنيل اكمل كلامى
من الاخر كده علشان البعيدة حمارة ومينفعش معاها تلميح
خديلي ميعاد من اهلك انا عايز اتقدملك عايز نبقي اصحاب وعايزك تحبينى في الحلال برضا ربنا ورضا اهلك ورضاكى
فهمتى انك مكنتيش محتاجة الموشح الاسود اللي سمعتيهولي ده وبحذرك وهاخد اجراء مش كويس وعاملالي فيها نادية الجندى في جبروت امراة
مروة :
امجد :انا خلصت انتى ساكتة ليه

اتكلمى انا عايز اعرف ردك
مروة بتوهان :انت ...انت قلت انك عايز ميعاد من اهلى صح
امجد :لا واضح انك جعانة والجوع مأثر علي استيعابك ايوه قلت انى عايز ميعاد من اهلك علشان اتقدملك
مروة :ليه
امجد :انتى مسمعتيش مانا قلت علشان نبقي اصحاب وعا...
مروة قاطعته :لا سمعتك
انا قصدى ليه دلوقتى احنا بنشتغل مع بعض من سنتين انا اتخطبت وكان ممكن اتجوز
دلوقتى اكتشفت انك عايز كل اللى قلته ده
امجد :لا دلوقتى اتاكدت منه

انا بفكر فيه من سنة من ساعة مبقيت لازم كل يوم اجى مكتبكم زى ما اكون بثبت حضورى للشغل
لما بقي اليوم اللي بتغيبي فيه يوم قفيل وخنيق
لما بقت ضحكتى اللي من قلبى مبتطلعش غير بسبب كلامك
لما بقت كلمة احنا مش صحاب مبتضايقنيش بالعكس بتفرحنى انى مش محتاج اغير من اي حد لانك معندكيش صحاب اغير منهم عليكى
بس وسط اكتشافى ده انتى اتخطبتى فمبقاش ليه لازمة
فسكت وبعدين الحمد لله فسختى خطوبتك
لقتنى فرحان فعلا فرحان وقلبي طاير

بس كنت محتاج وقت اتأكد فيه ان مشاعرى حقيقة مية في المية ومش ممكن تتغير كمان اتأكد ان خطوبتك دى انتهت وملهاش اي اثر جواكى
ولما اتأكدت بقيت بحاول المح وانتى ولا هنا
ويقولك ذكاء الانثى وكيدهن عظيم ودهاء المرأة وبتاع وانتى اساسا بطة بلدى ولا فاهمة اي حاجة
ولما ربنا كرمك وفهمتى فهمتى غلط
فجبتلك من الاخر بقي وخلاص بلا تلميح بلا نيلة
انتى مينفعش معاكى التلميح
مروة :صح انا مينفعش معايا التلميح واقصر الطرق هو الخط المستقيم والوضوح مفيش احسن منه
امجد :وادينى اتكلمت بوضوح وعلى بلاطه اهوه ردك ايه
مروة :هفكر
امجد :هتفكرى

مروة :اه هفكر انت فكرت واكتشفت واتأكدت اظن حقى انا كمان اخد وقتى في التفكير
امجد :ماشي حق ربنا فعلا بس مطوليش فى التفكير
مروة :والله بقالك سنة بتفكر وبتتأكد وبتقولي مطولش في تفكيرى
امجد :يباى عليكى خلاص يستى فكرى براحتك بس متاخديش راحتك اوى يعنى الله يباركلك
مروة :امشى يا امجد
امجد :امشي
مروة :اه امشي مانا اكيد مش هفكر وانت قاعدلى كده
امجد :عايزانى امشي علشان تفكرى ولا علشان تفطرى يا مار..خلاص متبصليش كده يا مروة حلو كده ان شاء الله توافقي ومقولكيش غيرها اصلا
المهم هسيبك تفكرى او تفطرى ايهما اقرب
سلام مؤقتا

فكرت كتير فى كلام امجد
وفيه في شخصيته في مواقفى معاه في اللى اعرفه عنه فضلت اسبوع بفكر وبستخير
وطول الاسبوع كنت بطرد امجد من المكتب لانه كل يوم كان بيسألنى فكرت ولا لسه
وفى الاخر وافقت انا كنت مستريحة بعد الاستخارة كمان امجد فعلا انسان محترم انا معرفش عنه غير كل خير
كمان انا بكون قدامه علي طبيعتى من غير لا تزييف وخداع ولا حتى تجميل بكون قدامه زى ما انا مروة او مارو زى ما انا بحب وهو بيحب يناديلي مصدق انى وافقت وبقي بيقولهالي بمعدل عشرين مرة فى الدقيقة
اتخطبنا تلت شهور واتكتب كتابنا شهرين وبعدين اتجوزنا
بعد جوازنا بسنتين خلفنا مازن وبعده بتلت سنين خلفنا مروان

وصفية الحمد لله اتغيرت خدت وقت طويل على ما اتغيرت بس المهم انها فى الاخر اتغيرت وفهمت انها عندها اربع ولاد والاربعة مهمين زي بعض ومحدش فيهم اغلي من التانى ومحمد زيه زي اخواته البنات بالعكس ده هو المفروض يبقي راجلهم ومسئول عنهم ربته انه يكون سندها هى وجوزها وسند اخواته تربيتها ليه في الاول كانت هتخليه عالة عليهم مش سند
ودعاء بعدت عن نادر ونسيته فعلا مع الوقت مبقتش بتفكر فيه ولما جه الوقت انها تتخطب اتخطبت لواحد مختلف تماما عن نادر لان هى نفسها اختلفت عن دعاء اللي كان يعرفها نادر
كبرت وبقت انضج وافكارها اختلفت ومداركها بقت اوسع
فهمت بنفسها ان كلامى كان صح
انا مش عارفة ايه اللى حصل للقيصر فعلا معرفش حاجة عن جاسر ومش فارقلي اعرف عنه حاجه هو كان غلطة وصلحتها درس واتعلمته
لازم تقبل نفسك ومتشوفش حد احسن منك وتعرف قيمة نفسك
متركزش فى مميزات اللي حواليك مش فيك وعيوبك اللى مش فيهم وتنسي ان انت كمان عندك مميزات مش فيهم وهما فيهم عيوب مش فيك
سوء التقدير فى كل حاجة وحش.

سواء سوء تقدير لنفسك او للى حواليك
انك تقدر حد بذيادة عن اللى هو يستاهله غلط
وانك تقدر حد اقل من اللي هو يستاهله برضه غلط
خليك صريح مع نفسك وقول اللى ليك واللى عليك
من غير لا زيادة ولا نقصان قدر نفسك صح
قدرها حق قدرها من غير سوء تقدير
بلاش تجنى علي نفسك لا بالتصالح الزايد معاها وانك متحاولش تطور من نفسك للاحسن
ولا تجنى عليها بانك تقل منها وتيجى عليها بزيادة فتحبط وتيأس من نفسك
من الاخر كده سوء التقدير خسرنا كتير
فنقدر صح بقي من غير لا زيادة ولا نقصان
الاعتدال حلو والتوسط مفيش احسن منه

قصص مشابهة:
الآراء والتعليقات على القصة
قصص و روايات مختارة