قصص و روايات - قصص هادفة :

حكايات منار الحكاية الثالثة عشرة بعنوان أصل وصورة

حكايات منار بقلم منار محمود

حكايات منار الحكاية 13 بعنوان أصل وصورة

انا عمر تسعة وعشرين سنة محاسب في شركة اسمها ولا مش مهم تعرفو الشركة اسمها ايه المهم يعنى، انا شاب عادى جدا لا ملتزم اوى للاسف ولا برضه مقضيها وخارب الدنيا طول عمرى كده في الوسط
اعمل الذنب واستغفر ومعرفش افرح بيه للاخر ولا ببقى مرتاح بس برضه بعمله بذنب وبغلط وبعصى ربنا، بس والله دايما برجع واستغفر طمعان في رحمة ربنا يقربنى ليه اكتر حتى لو غصب عنى.

بقيت الحمد لله ملتزم بالصلاة الفروض مبتفوتنيش اللي ممكن معرفش التزم بيها هي السنن بس بحاول والله التزم بيها بس الصراحة مش دايما بعرف وكتير بتفوتنى
انا عارف انى اكيد مش المفروض اكلم بنات واشقط واعلق واصاحب والجو الروش ده بس عملتها اكتر من مرة
بس كالعادة مكملتش الغلط للاخر ولا كنت مفهم واحدة فيهم اننا هنتجوز وكده كنت بس بضيع وقت.

اللي خدتهم علي محمل الجد اتنين
واحدة معايا في الجامعة كنت بحبها بجد
وبحلم اكمل حياتى معاها بقي وكده وتبقي ملكة علي عرش قلبي وكلام صفحة احتواء ده
بس هى اتقدملها واحد جاهز فتنازلت عن عرش قلبي

وخزوقتنى وانا زيى زى اي شاب حمار قلت هداوينى بالتى كانت هى الداء يعنى علشان انساها عرفت كذا واحدة منهم اللي بالنسبالى احنا اصحاب عادى ومنهم اللى كنا مرتبطين لحد ما خلصت الجامعة وكان لازم اشتغل واشيل المسئولية بجد فى شغلي اتعرفت علي تانى واحدة خدتها في حياتى علي محمل الجد كنت ناوى خير معاها ومكنتش بضيع وقت بس وقت ما كنت انا بحاول المح
جه اللي قطع عرق وسيح دم وجاب من الاخر واتقدم
ووافقت عليه وسافرو دبي سوا يلا ربنا يسعدهم

محاولاتى انى اختار شريكة حياتى كانت نتيجتها فشل ذريع اللي هو يا فاشل يا فاشل جدا يعنى
انا تقريبا مكنتش بعرف اختار لدرجة ان واحدة كنت عايز اتقدملها قالتلي ان لسه بدرى عالجواز منتصاحب احسن دلوقتى واللي فيه الخير يقدمه ربنا بعدين
اللي يمسيها بالخير كانت صريحة اوفر واوبن مايند جدا
بعد تجارب فاشلة كتير بصراحة تجارب فاشلة كتير اوى

قررت اسمع لامى واشوف واحدة من اللي هي تعرفهم يمكن اختيارها يكون احسن ويكون نصيبي مع واحدة معرفهاش اول تلاتة ورتنى صورهم مكانوش ينفعو مش علشان شكل لا في اللي سنها مش مناسب واللي اسلوب حياتها مينفعنيش وواحدة منهم طلعت مرتبطة اصلا وبعتتلي عالفيس تترجانى ارفض انا وانهى الموضوع من عندى لانها مش هتقدر تقول لأهلها واللي هى مرتبطة بيه مش هيقدر يجى دلوقتى ساعتها انا قلت لامى انى مش عايز اتقدملها.

الرابعة بقي كانت مناسبة وروحتلهم البيت
وخدت دش ساقع في عز الشتا من اللي هى عملته فيا
روحت عادى ودخلت هى واهلها سابونا لوحدنا فضلت دقيقيتين ساكتة وانا مش عارف ابدء معاها الكلام بايه
وفى وسط ما انا بفكر هى اتكلمت ويا ريتها متكلمت

زينة :انت مش شايف ان مجيك هنا لمجرد صورة شوفتها حاجة سطحية جدا ومش كفاية خالص تختار علي اساسها نهائى يعنى
عمر بصدمة :نعم
زينة :يعنى مش شايف انك كبرت بقي ولازم تعتمد علي نفسك وتختار مش ماما تختار وانت تشوف صورة وتقول اوكى وحشة في حقك دى علي فكرة
عمر :هو لو عالصورة مكنتش جيت مش من حلاوة الصورة يعنى
زينة بصدمة :افندم
عمر :ايوه يعنى مش صورة ملكة جمال لبنان هى
زينة بسخرية :ولما الصورة مش حلوة سيادتك مشرفنا ليه النهاردة
عمر :علشان سألت علي حاجات تانية مهمة زي اخلاقك واهلك وسنك ولقيت انه ممكن يكون في بنا توافق وقلت ادى الموضوع فرصة يمكن نكون مناسبين لبعض
زينة :بجد

عمر :عمر طبعا بجد وانا هكدب عليكى ليه هو انا اعرفك اصلا علشان اضطر اكدب عليكى
زينة بحرج :واضح انى افورت وبدات غلط
انا اسفة علي اللي قلته
عمر :اسفك مقبول انا كمان اسف الصورة حلوة وزى الفل بس اكيد مش هى السبب انى قاعد هنا دلوقتى
زينة بابتسامة :تمام نبدء من الاول
عمر :نبدء من الاول
زينة :انا زينة الحياة

عمر وهو بيضحك :لا واضح انك متواضعة
زينة :يا كابتن مش مستاهلة ضحك ده اسمى انا اسمى زينة الحياة بابا سمانى كده
عمر بحرج :انا اسف اسمك حلو اوى علي فكرة ومختلف
وانا عمر تسعة وعشرين سنة خريخ كلية تجارة وشغال محاسب انتى كلية ايه
زينة :انا كلية اداب قسم انجليزى
عمر : عندك كام سنة

زينة :اتنين وعشرين سنة بس مش انت قلت انك سألت عالحاجات دى وعرفتها قبل ما تيجى
عمر :مش انتى قلتى نبدء من الاول انا ببدءلك من الاول اهو
زينة :تمام عندك اخوات
عمر :عندى اخ اصغر منى بتلت سنين واخت اصغر بخمس سنين دى اتجوزت من سنة وحامل دلوقتى
وانتى
زينة :لا انا وحيدة مليش اخوات
عمر :عندك صحاب
زينة :اه كتير وانت
عمر :انا كمان عندي صحاب كتير
انتى سبقلك خطوبة قبل كده
زينة :لا ولا حتى قراية فاتحة
وانت

عمر :انا كمان لا
زينة :غريبة مع ان سنك مش صغير ازاي مخطبتش ولا مرة لحد دلوقتى
عمر :نصيب الحاجات دى بتبقي نصيب
زينة :معاك حق
حابب تسالنى عن حاجة تانية
عمر :لا انا كده تمام وانتى
زينة :لا خلاص مش عايزة اسال عن حاجة تانية
عموما بابا هيبقي يبلغك بردى فرصة سعيدة يا استاذ عمر بعد اذنك
عمر :انا اسعد

روحت بيتنا وانا بفكر ايه البت دى هو في كده دى خدتنى فومين غسلتنى وربنا لا وفي الاخر بتقولي فرصة سعيدة محسسانى انى في انترفيو يا ترى هتقبل ولا هترفض لا دى لازم تقبل مينفعش تكون دى اخر مرة اتكلم معاها
يا رب توافق يا رب انا عن نفسي موافق لو اتساءلت
وانا قاعد كنت هقول موافق ده كفاية الدخلة اللي دخلت بيها دى بس هي بقي يا ترى هتوافق ادينى مستنى
بعد اربع ايام عرفت انها وافقت والحمد لله والله حمدت ربنا لما عرفت انا بجد كنت عايز اشوفها تانى
وروحت انا واهلي المرة دى واتفقنا علي التفاصيل

وهي كانت هادية ورقيقة وجميلة وبتتكلم مع اهلي بهدوء وزوق وانا متكلمتش معاها لوحدنا خالص وده ضايقنى لا انا عايز الشمحتجى اللي شفته المرة اللي فاتت
المهم اتخطبنا واول مروحت البيت كلمتها انا عارف ان الوقت متاخر بس كنت عايز اعرف رد فعلها لما اعمل كده كمان كنت عايز اتكلم معاها انا من يوم مشوفتها اول مرة وانا مبتكلمش معاها غير الكلام العادى ده اللي هو بالشوكة والسكينة
وانا مش عايزه كمان دى هتبقي اول مكالمة لينا يا ترى هنقول فيها ايه كان عندى فضول فظيع اعرف
رنيت وهى ردت علي طول
عمر :اخبارك ايه
زينة :انا تمام
عمر :رديتى بسرعة
زينة :التليفون في ايدى اصلا
بس هو انت هتكلمنى في الوقت ده دايما
عمر :اه عندك مانع ولا حاجة

زينة :لا انا بس مش متعودة اتكلم في الموبايل متاخر كده
عمر :هتتعودى يا زينة الحياة هتتعودى
زينة :انت مش محتاج تقولي يا زينة الحياة تقدر تقولي زينة عادى
عمر :لا انا حابب اقولك يا زينة الحياة
زينة :اتبسطت في الخطوبة
عمر :اه طبعا مش خطوبتى
زينة:مش علشان خطوبتك لازم تكون اتبسطت
عمر :لا هو انا مبسوط علشان دى خطوبتى عليكى
مش علشان دى خطوبتى وخلاص

زينة :يعنى لو كانت خطوبتك علي حد تانى غيرى مكنتش هتكون مبسوط
عمر :مش عارف يمكن
بس انا حاسس انى مكنتش هبقي مبسوط بنفس الدرجة لو مكونتيش انتى خطيبتى
زينة :لا والله
عمر :اه والله ده احساسي انا انتى مالك انتى
زينة :خلاص يا سيدى انت حر
عمر :وراكى حاجة بكرة عايز استأذن عمى ونخرج انا وانتى
زينة :بكرة بالذات عندى محاضرات مهمة لحد متاخر
عمر :مينفعش تزوغي من اخر واحدة علي الاقل
زينة وهى بتضحك :ده بدل متشجعنى عالدراسة
كمان مش هينفع الدكتور هيشرح حاجات مهمة

مانت اللي متقدم في وقت غريب حد يتقدم لحد في نص الترم كده انا حتى طلبت نخلي الخطوبة كمان شهرين اكون خلصت الترم واتخرجت اساسا وانت رفضت
عمر : علشان كتير شهرين لا يا ستى انا هستحمل خلاص نخليها بعد بكرة
زينة :تمام بعد بكرة عندى محاضرة وسيكشن
استأذن بابا وخلص شغل وعدى عليا
عمر :تحبي تروحى فين
زينة :لا اختار انت فاجأني واتمنى المفاجأة تعجبنى واتبسط باليوم
عمر وهو بيضحك :شكلك مبيعجبكيش العجب وانا هلبس صح
زينة :لا خالص مين قال
عمر :كلامك اللي بيقول
زينة :ده انا كيوت

عمر وهو بيضحك :متقوليش علي نفسك كده
زينة :ولما انا مش كيوت اتقدمتلي ليه حضرتك
عمر :علشان انا مش عايز واحدة كيوت
زينة :نعم يعنى ايه
عمر :لا انتى شكلك رغاية وانا عايز انام عندى شغل بكرة
زينة بغيظ :انا رغاية علي فكرة انت اللي متصل وانا عايزة اقفل من نص المكالمة اصلا
عمر :عارف وبرضه انتى رغاية
زينة :تصدق مش هرد عليك بعد كده لما تتصل
عمر :حسك عينك تعمليها انا بحذرك من اولها اهو
زينة :مش انت اللي بتقولي رغاية انا هريحك من رغيى
عمر : ومين قالك تريحينى منه انا طلبت منك تريحينى منه
زينة :عمر انت عندك انفصام في الشخصية صدقنى وحالتك بقت خطر كمان
روح نام تصبح علي خير
عمر :وانتى من اهل الجنة يا رب

ونمت وانا مبسوط واول مصحيت بعد ما صليت ولبست كلمتها وانا نازل الشغل
عمر :صباح الخير يا زينة الحياة
زينة :صباح النور يا عمر
عمر : روحتى الكلية
زينة :اه وصلت بس لسه عشر دقايق عالمحاضرة
عمر :حلو انا اولي بيهم اتكلمهم معاكى
زينة :هنتكلم في ايه
عمر :في اي حاجة تحبي نتكلم في ايه
زينة :معرفش انا مكنتش بكلم شباب قبل كده يعنى
عمر وهو بيضحك :طيب والله طمنتينى بس مش شايفة انك مش المفروض تقوليلي كده يعنى
زينة :ليه

عمر :علشان انا خطيبك بس اقولك خليكى بطبيعتك انا مش عايزك تفكرى وانتى بتتكلمى معايا
زينة :لا من الناحية دى اطمن انا مبعرفش اكون غير علي طبيعتى ولو حاولت اعمل غير كده بفشل وبعك الدنيا
الدكتور دخل انا لازم اقفل دلوقتى سلام
عمر :سلام يا زينة الحياة

وفضلت افتكر مكالمتنا واضحك وروحت الشغل مبسوط ومستنى اليوم يخلص علشان اكلمها بالليل
وأخيرا اليوم خلص وكلمتها
عمر :اخبارك ايه
زينة :انا تمام انت اخبارك ايه
عمر :انا تمام عملتى ايه النهاردة في يومك
زينة :ولا حاجة العادى حضرت المحاضرات رجعت عالبيت اتغديت وبعدين قعدت اشتغل في بحث مطلوب منى وبكلمك وانا بشوف حاجة اكولها علشان جعانة اوى
عمر :انا سبقتك واتعشيت وبعمل الشاى انتى

بتحبى الشاى
زينة :مش اوى بشرب عصاير اكتر مبحبش الحاجات السخنة
النهاردة كمية بنات فظيعة باركولى عالخطوبة وفضلو يسالونى طيب خطيبك شكله ايه طب اتخطبتو ازاي وفضلت افرجهم عالصور اللي معايا وارد عليهم لما نافوخى ورم من كتر الكلام
عمر :وقولتلهم ايه
زينة :وانت ..وانت مالك ده كلام بنات وبعدين..اا ..خليك في حالك
عمر :الله مش بتتكلمو عنى
زينة :بص غير الموضوع
عمر :ليه الموضوع ده عاجبنى
زينة :ومش عاحبنى شوف حاجة نتكلم فيها احنا الاتنين وتكون عاجبانا احنا الاتنين
عمر :انا كلمت عمى استأذنته نخرج مش عايزة تعرفي هنروح فين
زينة :لا قلتلك فاجأني
عمر :ماشي علي الله بس مترجعيش تقولي مش عاجبنى المكان او جيته قريب
زينة :لا مش هقول كده انا اللي اخترت تفاجأني ولازم اتحمل نتيجة اختيارى وكمان انت هتكون فكرت وتعبت وانت بتختار المكان لازم اقدر تعبك علي الاقل
عمر :تمام جدا

يبقي نتقابل بكرة انا هقفل علشان انام واكون فايق بكرة انتى كمان نامى تصبحى على خير
زينة :وانت من اهل الجنة
ونمت وانا بفكر في اليوم بكرة هيبقي عامل ازاى
ويا ترى اليوم هيعجبها وهتتبسط فيه ولا لا
تاني يوم روحت الشغل وانا بعد الساعات علشان اليوم يخلص واروحلها الجامعة اخدها
واخيرا يومى في الشغل خلص ورنيت عليها خرجتلي
عمر بابتسامة :اخبارك ايه يا زينة الحياة
زينة :انا تمام انت اخبارك ايه
عمر :زى الفل مفيش احسن من كده
انتى بتخافي من الموتسيكلات تحبي نروح بتاكسي
او اطلب اوبر

زينة :لا بالعكس انا بحبهم او حاسة انى هحبهم دى اول مرة اركب موتوسيكل
ها هتودينى فين
عمر :لا خليها مفاجاة بقي كل مكان بالدور تعرفيه
زينة بابتسامة :بالدور واضح ان في اكتر من مكان
عمر :بالظبط هنبدء بالغدا لانى جعان

فى مطعم بيتزا
عمر :انا بحب البيتزا اوى وقلت انك اكيد بتحبيها
زينة :جدا انا هطلبها بالحمة وانت
عمر :لا انا بحب الفراخ

بعد ساعة ونص
زينة :وادينا اتغدينا وودتنا كافيه انت بتحبه انت شربت شاى وانا عصير هنروح فين دلوقتى
عمر :عجبك المكان اهم حاجة
زينة :اه حبيته في حياة كده مش هادى وخنيق وديكوره حلو
عمر :وجهتنا التالية هى القلعة
زينة بابتسامة :اشمعنى
عمر :الغروب من هناك اكيد هيبقى حلو كمان بقالي سنين كتير مجتهاش وقلت اكيد انتى كمان كده
زينة :انا مروحتهاش قبل كده ولا حتى في رحلات المدرسة مكنتش بطلع رحلات المدرسة من اصله
عمر :يعنى اول مرة تروحيها هيكون معايا
زينة :بالظبط
عمر :حلو ده حلو اوى ده

فى القلعة
عمر :خدى صورينى وبعدين انا هصورك وبعدين نتصور سوا سيلفى
زينة :تمام
بعد ربع ساعة
عمر :كفاية صور لحد كده
زينة وهى بتضحك :لا ليه لسه مجبناش المية صورة
مكنتش اعرف انك بتحب الصور اوى كده
عمر :انا بحبها علشان بتخلد لحظات مينفعش تتنسي
زينة :معاك حق انا كمان..ثانية واحدة هرد علي موبايلي

ايوه يا سمية ...انا مينفعش اتكلم دلوقتي.. خلاص من غير عياط اهدى واحكيلي فيه ايه...تمام ..لا يا سمية متغضبيش وتسيبي بيتك مش كل مرة تعملي كده...محمود متضايق لانه حاسس انك بتتحامى في اهلك وانتى المفروض تتحامى فيه هو...اهلك مينفعش يحلو مشاكلكم يا سمية مشاكلكم تحلوها انتو تتعبو لحد ما تلاقو حل ليها سوا...مينفعش كل شهر ولا اتنين تسبيله البيت وتروحى بيت اهلك هو كده هيحس انك مش باقية عليه...يا حبيبتى انا عارفة انك بتحبيه وباقية عليه بس هو ميعرفش فكريه انتى يا سمية...مش لازم هو اللي يبدء ابدئى انتى...يبت اعقلي بقي عندكم محمد وانتى حامل اهو هتعقلي امتى الله...اه صحيح عرفتى حامل في ايه...بنت حلو هتسموها ايه...لا يا شيخة ...بقي هو عايز يسميها سمية من حبه فيكى وانتى عايزة تسبيله البيت تصدقى انك معندكيش دم...اضحكى يا ختى اضحكى بكرة يزهق ويبطل يصالحك ويراضيكى...ان كان حبيبك عسل متلحسوش كله يا سوسو ...ايوه كده اعقلي واهدى ولما يرجع من الشغل يلاقيكى عاملة غدا حلو ولا غدا ايه بقي يلاقيكى عاملة عشا حلو ومستنياه....يستى بعدها اتكلمى معاه وعاتبيه في اللي مضايقك...ربنا يسعدك يا حبيبتي...ماشي يا قلبي مع السلامة.

عمر :دى صاحبتك
زينة :اه صاحبتى انا اسفة حاولت أاجل كلامى معاها بعد ما اروح معرفتش
عمر :ولا يهمك انتو اصحاب من زمان
زينة :من الحضانة
عمر :هي معاكى في الكلية
زينة :لا هى مدخلتش كلية مدخلتش ثانوى من اصله
عمر :ليه

زينة :واحنا في تالتة اعدادى مجموعها كان يجيب ثانوى عام بس هى مرضيتش تدخل حاولت اقنعها قالتلي انها بتكره المذاكرة وبتحب البيت وشغل البيت ومش غاوية تعليم وانا في تانية ثانوى عرفت انها مش بس بتكره المذاكرة وبتحب البيت وشغله لا كمان هي بتحب محمود جارهم
عمر :وده ايه علاقته بانها مدخلتش ثانوى
زينة :محمود مدخلش ثانوى عام دخل صنايع بمزاجه كان عايز يشتغل بسرعة ومكنش ليه في العلام هو كمان
الحق يتقال هو ناجح في شغله وفاتح بيت ومكفيه مش ناقصه حاجة
سمية بقي كانت عارفة انها لو دخلت ثانوى ودخلت كلية اهلها مستحيل يوافقو يجوزوها لمحمود
عمر بابتسامة :وعلشان كده مدخلتوش

زينة :وعلشان كده مدخلتوش
وهو وهي في سنة تانية في الدبلوم اتقدملها واتخطبو وبعد ما خلصت الدبلوم بكام شهر اتجوزو
عمر :وانتى وهي فضلتو اصحاب
زينة :اه ومنفضلش ليه
عمر :علشان يعنى هي بقت دبلوم وانتى كنتى ثانوى عام ودخلتى كلية وهى لا

زينة :وانا مالي دخلت دبلوم ولا ثانوى عام ولا دخلت السينما حتى انا وهى اصحاب علشان انا وهي اصحاب مش علشان ثانوى وكلية
علي فكرة بقي سمية اعز اصحابي واقربلي من صحابي اللي في الكلية دى صاحبة عمرى انا اعرفها من وانا خمس سنين واكيد مش هضحى بكل السنين اللي بينا دى علشان هى قررت متدخلش ثانوى عام
عمر بابتسامة :مختلفة انتى يا زينة الحياة مختلفة اختلاف حلو يا بخت سمية بيكى انا كنت اتمنى يبقي عندى صاحب وفى زيك كده.

زينة :شكرا ها اليوم خلص كده ولا باقي حاجة
عمر :فاضل اخر حاجة

عالكورنيش
زينة :انا بحب حمص الشام اوى
عمر :وانا كمان
عايز اسئلك سؤال وتردى عليا بصراحة
زينة :اتفضل
عمر :انتى كنتى بتطفشينى ليه اول مرة شوفتك فيها في بيتكم
زينة وهى بتضحك :هو كان باين عليا انى بطفشك
عمر وهو بيضحك :والله ابغى اقولك كان باين جدا جدا بس استحى

زينة :بص هو مش فكرة بطفشك بس انا اتغاظت اوى واتضايقت لما عرفت انك جاي تتقدم وانت متعرفنيش بس شوفت صورتى اللي هو ده الاساس اللي انت اختارتنى علشانه يعنى ومش مهم بقية الحاجات ومش فارق معاك انك متعرفنيش حسيت كأنى بضاعة وانت بتعاينها في الصورة وجاي تشوف الاصل في البيت بقي قبل ما تقرر تشترى ولا لا
كمان حسيت انك سطحى وملكش شخصية يعنى ايه اللي يخلي واحد عاقل يتجوز بالطريقة دى ويختار واحدة هيكمل معاها عمره كله علي اساس صورة مجرد صورة
عمر :بس انا مخترتكيش علي اساس الصورة
كمان انا حاولت كتير اختار انا قبل كده اللي هتجوزها بس مكنتش بتظبط فقلت يمكن يكون ربنا عايزنى اتجوز بالطريقة دى وهي اللي فيها الخير ليا
زينة :ما هو ده اللي خلانى اعتزرت وجبت ورا

انا كنت خارجة ارفضك اصلا واللي خلانى قعدت معاك ان اهلي ادولك ميعاد مكنش ينفع أصغرهم ومخرجش
بس لما انت قلت ان اكيد مش الصورة هي السبب اللي انت جاى علشانه فهمت انى اتسرعت وان الموضوع مش بالسوء اللي كنت متخيلاه
كمان بصراحة انا كنت عايزة ارتبط بحد عايزنى ومختارنى وبعدين عرفت ان ربنا محرم ده والاصل في دينا انه يجى يعرفنى في البيت قلت خلاص يبقي اختيار ربنا احسن ومين عارف يمكن يكون نصيبي هيجى بالطريقة دى

واقنعت نفسي بالعافية علشان انا يهمنى رضا ربنا عنى وعارفة ان اختيار ربنا دايما احسن
وكمان مش كل اللي اتجوزو عن حب يعنى جوازتهم نجحت وعاشو سعدا يعنى فقلت يبقي نخلي برضا ربنا واختياره ليا سواء واحد عارفنى وعايزنى ومختارنى او واحد لا يعرفنى ولا اعرفه المهم يكون الخير
يقوم مش بس يجيلي حد بطريقة تقليدية ومش هو اللي مختارنى وعايزنى انا بالذات لا كمان ميعرفنيش من اساسه ومختارنى علي اساس صورة يا فرحة قلبي الصراحة
عمر :الفكرة مش حلوة فعلا

بس زى ما انتى قولتى اختيار ربنا احسن ومحدش يعرف نصيبه فين وهيلاقيه ازاي
يلا علشان اروحك علشان متاخرش علي الميعاد اللي اتفقت عليه مع والدك
زينة :يلا بينا

روحتها ورجعت البيت وانا مبسوط وعمال افتكر في اليوم وتفاصيله وبتفرج عالصور
فضلت احاول اقنعنى انى مش لازم اتكلم خصوصا اننا كنا اليوم كله سوا كمان يعنى هى متكلمنيش ليه
بس الصراحة مقدرتش وكلمتها
زينة :كنت لسه هكلمك حالا بس انت سبقت اخبارك ايه
عمر :انا تمام ومتكلمتيش ليه
زينة :قلت هصب الشاى واخده واخرج البلكونة اكلمك
لسه بمسك موبايلي لقيتك بترن انت فيك حاجة لله
عمر :وانتى من امتى بتشربى شاى

زينة :انا قلت بما انك بتحبه اجربه يمكن احبه انا كمان واتعود عليه
عمر بفرحة :بتشربيه علشانى
زينة :اه كمان انا قلت بجرب لو فضل مش عاجبنى خلاص انا عملت اللي عليا مش هجرب تانى
عمر :كفاية انك بتجربيه علشانى
اتبسطى النهار...
زينة في نفس الوقت :انا اتبسط اوى النهاردة...اسفة كمل كنت بتقول ايه
عمر :لا كملي انا كنت هسالك عن اللي انتى بتقوليه
زينة :اليوم كان حلو اوى بجد كله مفيش في حاجة واحدة مش حلوة
عمر :اهم حاجة انك اتبسطى
زينة :وانت اتبسط

عمر :جدا انتى مش متخيلة واتبسط اكتر انك اتبسطى واليوم عجبك
زينة :يوم ميتنسيش الصراحة مفاجأة زى الفل
عمر :الشاي طعمه ايه لسه بتشربيه
زينة :لا خلصته
عمر :ها وعجبك
زينة :مش عارفة
عمر وهو بيضحك :ده اللي هو ازاي يعنى
زينة :اصلى كنت مركزة في الكلام ومخدتش بالي هبقي اجرب تانى بقي
الوقت اتاخر انا هقفل علشان انام علشان الكلية وانت كمان علشان شغلك تصبح علي خير
عمر :وانتى من اهل الجنة يا رب

 

بعد شهرين
زينة :اخيرا خلصت امتحانات ايه ده هم وانزاح
عمر :مبروك عقبال متفرحى بالنتيجة
عيشي يومينك بقا خلاص مفيش صحيان بدرى ولا مذاكرة
زينة وهى بتضحك :ماما مش هتنولهالي
ده قالتلي جهزى نفسك من بكرة هننزل نجيب الحاجات اللي نقصاكى والنجف للشقة والستاير وبقية الهدوم اللي مجتش والرفايع وليلة كبيرة اوى سعادتك انا حسا علي ما يجى ميعاد الفرح هكون خلصت ومش قادرة اقف علي رجلي اصلا

عمر :فرحنا
زينة باستفهام :نعم
عمر :اسمها فرحنا يا زينة الحياة فرحنا وشقتنا
مش الفرح والشقة انتى ليه دايما بتتكلمى كده كأنك مش جزء من اللي هيحصل ده او كأن انا اللي مش جزء منه
مبتجمعيناش في كلامك ليه
زينة بتوتر :عادى مش قصدى
عمر :من هنا ورايح اسمها فرحنا وشقتنا وعفشنا اي حاجة تتكلمى عنها بصيغة جمع عننا احنا الاتنين لان احنا الاتنين في اللي هيحصل ده احنا شركا فيه وفي حياتنا الجاية فاهمانى

زينة :
عمر بصوت عالي :فهمتى ولا اعيد كلامى تانى
زينة :لا ..لا خلاص فهمت انت متعصب ليه
عمر :سؤالك ده يعصب اكتر اقفلي انا ورايا شغل هرجع اكمله سلام

بقالنا شهرين مخطوبين وخلاص فرحنا كمان شهرين تلاتة وهى تعاملها معايا دايما كده
دايما هي رد فعل ودايما انا الفعل دايما انا اللي ببدء
هي مبتبدءش باى حاجة وحتى رد فعلها ده بيكون علي قد فعلي بالظبط حسباها بالسنتى
بحسها بتتعامل معايا بعقلها بس مش بقلبها ولا روحها
في حاجة ناقصة ومش موجودة بينا
انا حتى مش عارف اقولها انى بحبها مش قادر الكلمة علي طرف لسانى ومش قادر انطقها
هى مش مشجعانى تعاملها معايا ده محسسنى انى بتعامل مع مديرى في الشغل تعاملنا محسوب والكلام بالمسطرة
انا مش عايز اسيبها ومعتقدش انى هقدر اسيبها اصلا

بس انا مش حاسس بيها معايا ولا حاسس انى في حياتها
كأنها بتتعامل معايا من ورا لوح ازاز شايفانى بس مش حاسة بيا معايا ومش معايا
انا مش عارف اعمل ايه بس احنا مينفعش نكمل كده
عدى تلت ايام مكلمتهاش فيهم مكنتش حاسس انى قادر كمان كنت عايز اشوفها هتعمل ايه
وكالمتوقع معملتش اي حاجة خالص
مفرقش معاها انى ماتكلمتش حياتها ماشية عادى
ورابع يوم لقيت التليفون بيرن مرديتش كنت عايز اعرف هترن تانى ولا لأ
ورنت تانى ورديت عليها
زينة :اخبارك ايه يا عمر
عمر :انا تمام الحمد لله

زينة :انت..انت مكلمتنيش بقالك تلت ايام ليه
عمر :ولما انا متكلمتش انتى متكلمتيش ليه
زينة :مانا بكلمك اهو
عمر :انتى اللي مكلمانى من نفسك ولا والدتك اللي قالتلك
زينة :هتفرق المهم انى اتكلمت
عمر :لا هتفرق معايا اقولك اقفلي انا مش عايز اتكلم وانتى شكلك معندكيش حاجة تقوليها لانك مش متصلة من نفسك ولا فارق معاكى اصلا سلام
زينة بسرعة :لا متقفلش انا اللي متكلمة من نفسي والله
ماما مخدتش بالها اننا مبنتكلمش علشان مشغولة في بقية جهازى اللي بنجيبه
طيب انت متكلمتش ليه

عمر :علشان تعبت وزهقت كل مرة لازم انا اللي اتكلم مينفعش انتى اللي تتكلمى
زينة :مانا اتكلمت اهو
عمر :بعد تلت ايام خدتى بالك بعد تلت ايام انى مكلمتكيش
زينة :والله من اول يوم واخدة بالي وكنت عايزة اكلمك
عمر :ومتكلمتيش ليه
زينة :علشان...اااا...علشان...
عمر :علشان انا مش مهم بالنسبالك انا مش مهم
زينة :انت ازاي تقول كده لا طبعا كلامك غلط
عمر بغضب :عملتى ايه انتى يثبت عكس كلامى ها ردى عملتى ايه طيب يحسسنى انى مهم انى موجود في حياتك من اصله
زينة :يا عمر انا..

عمر قاطعها :انا مش عايز اسمعك يا زينة لانى عارف انك معندكيش حاجة تقوليها
زينة :مين قال انى معنديش حاجة اقولها
كمان انت من امتى بتقولي يا زينة
عمر :وانتى من امتى فرق معاكى انى بقولك يا زينة الحياة
من امتى فرق معاكى حاجة بعملها او حاجة بقولها
بس انا خلاص تعبت ومش هينفع اكمل كده
زينة :يعنى ايه انت عايز تسبنى يا عمر صح
عمر :انتى بتقولي ايه

زينة بغضب :بقولك الحقيقة انت عايز تسبنى وعادى في ظرف يومين هتكون شايف صورة تانية لواحدة تانية تكمل معاها اللي مكملتوش معايا
ولا انت لقيت الاحلي منى او الاذكى
عمر بغضب:انتى اتجننتى
زينة وهى بتعيط :لا انت شكلك كده حبيت انت حبيت صح وقررت تختار اللي انت حبيتها مش كده
علشان كده مش عايز تكلمنى علشان كده مش قادر تكمل معايا
عمر بتوتر :انتى بتعيطى ليه دلوقتى متعيطيش وخلينا نتكلم ونتناقش بهدوء
زينة وهى بتعيط اكتر :عايزنى اناقشك بهدوء وانت عايز تسبنى يا عمر
عمر :يا زينة الحياة مش هسيبك انا مش عايز اسيبك

السؤال بقي انتى فارق معاكى انى اسيبك انا نفسي فارق معاكى من اصله
زينة :طبعا فارق انت وبس اللي فارق يا عمر ومفيش غيرك فارق والله بس السؤال بقي انا فارقة معاك ولا زيى زى غيرى كتير محترمين واهلهم كويسين وصورهم حلوة
عمر :يا بنتى صورة ايه بس اللى حلوة ده انتى حولة اصلا فيها
زينة وهى بتضحك :متضحكنيش وانا بعيط وبتخانق معاك كمان انا حولة وخطبتنى ليه ان شاء الله بقي لما انا حولة في الصورة وهتتجوزنى ليه
عمر :خطبتك علشان حسيت انى لازم اتكلم معاكى تانى بعد اول مرة شفتك فيها كنت حاسس انى عايز اعرفك وانك مش شبه اي بنت في الدنيا انا شوفتها قبل كده وهتجوزك علشان بحبك يا زينة الحياة بحبك وعايزك ومش عايز غيرك.

انتى بقي اتخطبتيلي ليه وهتتجوزينى ليه
زينة :علشان...اااا...علشان.. ااا..
عمر :قسما بالله لو مرديتى عدل لاكون قافل السكة في وشك ومش متكلم معاكى لحد يوم الفرح
زينة :وعلى ايه بقي الفرح
عمر :علشان انا مش هتجوز غيرك ولا انتى هتتجوزى غيرى يا زينة الحياة
انتى بقي جواكى ايه قبلتى بيا ليه كنتي بتعيطى ليه طيب انا مش فاهمك ولا عارف انتى عايزة ايه انا ابقالك ايه
زينة :كل حاجة يا عمر انت كل حاجة
انت صاحبي وحبيبي انت اول حد يهتم بيا انت اول حد اضحك معاه من قلبي انت اول حد اروح معاه القلعة لاول مرة في حياتى انت اول حد اركب وراه موتوسيكل انت اول حد ادعيله في صلاتى
انت اول حد احبه يا عمر انت كل حاجة بالنسبالى والله

عمر بصدمة :ولما انا كل ده وانتى جواكى كل ده بتعاملينى كده ليه
زينة وهى بتعيط :علشان انت مختارتنيش انا علشان انت مش عايزنى انا بالذات كان ممكن تبقي انا او غيرى
مية واحدة غيرى كان ممكن تبقي مكانى
عمر :يا غبية انا حتى لو خطبتك علشان مناسبة وخلاص
مفيش حاجة كانت تجبرنى اتجوزك واكمل معاكى
لو محبتكيش كل اهتمامى بيكى ده مفيش حاجة تجبرنى اعمله غير انى بحبك
وانا كمان مخطبتكيش علشان مناسبة وخلاص
انا خطبتك علشان كان لازم تبقي في حياتى كان لازم اتكلم معاكى تانى علشان بحب اتكلم معاكى وكلامك بيضحكنى
علشان انا عايز ابقي معاكى وعايزك معايا

زينة وهي بتعيط :بجد
عمر :بجد والله بجد بطلي عياط بقي
زينة :انا بحبك
عمر :لا سمعينى كده قولتى ايه تانى
زينة :انا بحبك
عمر :ومقولتيهاش قبل كده ليه ها وممرمطانى معاكى ومضايق ومخنوق منك
زينة :علشان غبية بس انت كمان غبي علي فكرة
لو كنت قولت انك بتحبنى لو كنت عرفتنى انى عندك مش زى غيرى كنت اطمنت وفرحت بدل ما انا كنت خايفة كده
عمر :كنتى خايفة من ايه
زينة :خايفة تسبنى خايفة تحب غيرى خايفة متحبنيش
خايفة تبعد

عمر :يا زينة الحياة مش مهم حكايتنا بدءت ازاي المهم كملت ازاي مش لازم يكون في بنا قصة حب عظيمة قبل الخطوبة علشان مبقاش عايز من الدنيا غيرك
مش لازم اعرفك في مكان تانى غير بيت اهلك علشان احبك المهم انى احبك المهم انى لما اعرفك احبك ومش مهم عرفتك ازاي فهمتى
زينة :فهمت
اخر مرة متكلمتيش لو مكلمتنيش تانى عارف انا هعمل ايه
عمر :هتعملي ايه
زينة :هكلمك انا صبح وضهر وعصر وليل هكلمك لحد ما تزهق لحد منبقي مش لاقين حاجة نقولها
والله العظيم التلت ايام اللي فاتو كانو مملين وطوال جدا وانا كنت هتجنن مستنية تكلمنى
عمر :وانا كمان كنت مستنى بقالى كتير مستنى منك اي حاجة حتى لو بسيطة

متخلنيش احس كده تانى يا زينة الحياة مبقاش عارف انا بالنسبالك ايه مبقاش عارف باقية عليا زى ما انا باقى عليكى ولا لأ
زينة :وعد اخر مرة خلاص بعد كده هقول كل حاجة لا هتردد ولا هفكر كتير
عمر :وانا مصدقك ووعد انا كمان هفضل بعمل كده بس خلي الطريق بينا راى جاى مينفعش يبقي رايح بس
زينة :صح متقلقش هنبقا شركا في كل حاجة في حياتنا والكلام والافعال هتكون متبادلة
عمر :الله عليكى وانتى عاقلة ومتفهمة كده
ده انا كنت خلاص يأست وجبت اخرى
زينة : خلاص بقي متحسسنيش بالذنب اكتر من كده
انسي اللى فات ونركز فى اللي جاي اتفقنا
عمر :اتفقنا

اوقات في حاجات بنكون مرتبينها في دماغنا بترتيب معين ولما الترتيب ده ميحصلش بنفكر ان كده الحاجات دى مش هتحصل مع ان ربنا بيكون ليه ترتيب تانى
ترتيب احلي واسهل بكتير من ترتيبنا
بس احنا دماغنا بتبقي متظبطة علي حاجة معينة
لو محصلتش دماغنا بتهنج مبتستوعبش اللي بيحصل مبتفهمش ان اللي بيحصل ده هو اللي احنا عايزينه واكتر كمان من اللي احنا كنا عايزينه
مش مهم البداية تكون زى ما احنا عايزين المهم النهاية تكون كده المهم في الاخر نوصل للي احنا عايزينه وحبينه وشايفين انه هيريحنا
انا وزينة الحياة اتجوزنا وخلفنا رضوى ورامى
برغم كل اللي عملته علشان احب واتحب واكمل حياتى مع واحدة انا مختارها الا انى كنت بفشل ولا محاولة من محاولاتى نجحت وفي الاخر لقيت اللي انا عايزه واكتر عن طريق واحدة لا كنت اعرفها ولا تعرفنى

ولما عرفتها لقيتها بجد احلي من كل اللي عرفتهم قبل كده
في حاجات كده مبتتاخدش غصب ولا بتتسرق ولا بتوصلها قبل ميعادها واي حاجة انت بتعملها علشان تغير ده غير انها بتكون ذنوب هي كمان بتكون تضييع وقت ومجهود ومشاعر عالفاضي
كل حاجة حلوة باوانها وفي وقتها واختيارات ربنا اكيد اكيد اكيد احسن واجمل ويمكن حتى اسهل من اختيارتنا ومن الطرق الصعبة اللي بنمشيها علشان نوصلها
ده اللي انا اتعلمته بوجود زينة الحياة في حياتى
لأنها بجد بقت زينة حياتى

الآراء والتعليقات على القصة