رواية أحفاد البارون الجزء الثاني للكاتبة إيمان جمال الفصل السادس
ليث افتكر ان في القصر انذار حريق فقرر إيه بقى راح أخد قماشة كبيرة وولع فيها ورفعها للإنذار اللي موجود في الحيطة وفي ثانية كان كل جناح اشتغل فيه صوت الانذار والماية بدأت تنزل
فهد وليل جريوا من مكانهم بس لبسوا هدومهم وطالعين يجروا على بارة وأدهم وآيه نفس الكلام ونازلين جري عالسلم وليث واقفلهم في آخر السلم ومربع ايديه لعند صدره
ليث: ايه ياباشوات مش فيه عندكم شغل
فهد بغضب: بقى انت اللي عملت كدا.
ادهم: وحياة امك ماهعدهالك
ليل بصدمة: نعم يا اخويا بتقول ايه
ادهم: والنبي تقعدي انتي على جمب كدا عشان نشوف ابنك هبب إيه
ليث واقف بيبصلهم بتريقة: طب لما يسألوني عليكم اقولهم ايه بيقضوا شهر عسل جديد
فهد بصله بغضب ومسك ايد ليل: ايوا ابقى قولهم كدا يلا مش فاضيلك
فهد اخد ليل وطلع وادهم فضل واقف يبصله بغضب
ليث: ايه ياباشا هتقول ذيه ولا هتعمل ايه
أدهم: لا انا لو لاقيتك ادامي دلوقتي هنزل اتمرن في وشك.
ليث غصب عنه ضحك: والله انتوا هتجننوني طب كنتوا عرفوني مش تخضوني عليكم كدا
آيه ضحكت: معلش المرة الجايا
ادهم اخد آيه وطلعوا تاني وليث قعد ياخد نفسه بعد الخضة دي
أمل نزلت وشافته قاعد: انت جيت بدري ليه؟
أكمل ضحك اوي: هو لحق يروح ياطنط الاستاذ جه يقبض على الفهد والأدهم
أمل ضحكت اوي: هما وقعوا معاك ياليث
ليث: اصبروا بس عليا انا بقى مش راجع الشركة
اكمل: طب والشغل؟
ليث: هناك عمي جاسر وعمي اكمل وكمان جدو عبدالعزيز وجدو مراد وكمان هناك أيهم
اكمل: طب تعالى نطلع نقعد في الجنينة عند ماكس
ليث بص لملك: والنبي ياعمتو اعمليلي قهوة عشان انا مصدع أوي
ملك: حاضر ياحبيبي
ليث واكمل خرجوا يقعدوا عند ماكس واكمل عايز اخوه يتكلم
اكمل: مش هتحكيلي؟
ليث: احكيلك إيه؟
اكمل: ليث انا توأمك يعني حاسس بيك ان انت جواك حاجة ومش عاوز تطلعها
ليث: سيبك مني وقولي انت كويس مع كارما؟
اكمل: لا.
ليث: طب ليه يا اكمل غيرت فكرتك عنها رغم انك اختارتها بنفسك
اكمل: معرفش ياليث حسيت انها مش مناسبة ليا انا ايوا بحبها بس حاسسها مختلفة عننا خالص ونفسي بجد تتحجب
ليث: بص يا اكمل ايوا الحجاب فرض وحرام انها تقلعه وتكون من غيره بس هي اختارت دا وربنا هيهديها مع الوقت
اكمل: انا عاوز اعرض عليها انها تلبسه
ليث: صدقني هتعاند قصادك وهتقولك لا
اكمل: يبقي كدا هي بتخسرني ياليث.
ليث لسة هيرد بس تليفون اكمل رن وكانت مكالمة عن طريق الفيس بوك وكانت فيديو ومن مروان
واكمل رد: حبيبي اللي واحشني
مروان: والله انتوا اللي وحشتوني واولكم الرخم اللي اسمه ليث بقالي يومين برن عليه ومش بيرد
اكمل عنيه على ليث: والله يامروان ذي ما انت عارف هو مشغول أد إيه ومش بيمسك التليفون على طول ما انت عارف
مروان: ماشي ياصاحبي المهم انا خلاص كلها أسبوعين ونازل مصر
اكمل: تنزل بالسلامة ياحبيبي.
مروان: انا كنت بكلم چوري دلوقتي فيديو وقولت اشوفك عشان واحشني
اكمل: وانت كمان والله
اكمل اتكلم شوية معاه وقفل وبيبص لليث اللي قاعد مضايق
ليث بعصبية: هي اصلا تكلمه فيديو ليه
اكمل: دا هيكون خطيبها ياليث
ليث سابه وقام دخل جوا ومتعصب وشافها نازلة من على السلم: انتي مين سمحلك اصلا انك تكلميه فيديو
چويرية: قصدك مين؟
ليث بغضب: هيكون مين غيره عريس الغفلة
چويرية بعصبية: وانت مالك دا هيكون خطيبي واكلمه ملكش دعوة.
ليث بيقرب منها بغضب ولسة هيتكلم بس ابوه وقفه
فهد نازل وشايفهم بالمنظر دا: ما اسمعش كلمة منك تاني
ليث بغضب: هي مين ادالها الحق دا من امتي اصلا وبنات القصر دا بيعملوا كدا
فهد بهدوء: اظن هي معملتش حاجة غلط وبعدين مروان واخد الاذن قبل مايعمل كدا
ليث مش عارف يرد على ابوه يقوله إيه وفجأة اتكلم: انا رايح شرم
فهد: ليه؟
ليث: عاوز اغير جو
ليث سابه وطلع على فوق ومضايق ومش طايق حد ادامه
فهد لچويرية: حقك عليا انا.
چويرية بدموع: انا معملتش حاجة لكل دا ياخالو ولا عمري عملت حاجة غلط تستاهل اللي هو قاله
فهد قرب منها وحضنها: معلش ياقلب خالك انا هتصرف
ملك كانت متابعة كل حاجة ومستنية ايه هيحصل للآخر
امير في العيادة بتاعته خلص الحالات وخلاص عنده نص ساعة راحة فقرر يكلم شهد ورن عليها وهي ردت
شهد: الو
امير: عاملة ايه؟
شهد: الحمدلله
امير: ممكن تبلغي والدك بإن هاجي انا واهلي بكرة
شهد: تمام.
امير خلص كلام معاها وقفل وفكر في حاجة وعشان كدا بلغ الممرضة انه هيروح القصر ويرجع تاني
فهد قاعد عند ماكس وليل جات قعدت معاه
ليل: غيران عليها مش كدا؟
فهد: ايوا بس انا مش موافق انه يروح شرم
ليل: انت عارف ان ابنك عندي ومش هيوافق انه يقعد
فهد: كدا كدا احنا رايحين بعد اسبوع يبقى ليه يروح لوحده؟
ليل: سيبه على راحته لحد مايقدر ياخد قرار من غير ماحد فينا يضغط عليه.
امير وصل القصر وسأل على فهد وعرف من ملك انه عند ماكس وراحله
امير جاي من وراهم واخد باله ان فهد حاضن ليل وهما قاعدين عشان كدا بص للأرض: احم احم
فهد دور وشه وليل كمان
فهد: تعالى يا أمير
أمير: عاوز اتكلم مع حضرتك شوية
ليل قامت: طب انا هسيبكم لوحدكم
ليل دخلت وامير قعد مع فهد بس مش عارف يبدأ الكلام منين
فهد: في ايه؟
امير: في موضوع عاوز احكيلك عليه بس توعدني ان مافيش اي حد في القصر يعرفه
فهد: اوعدك.
امير حكاله عن اللي حصل لشهد وانه طلب ايديها عشان هي ماتتفضحش
فهد بهدوء: ممكن اسألك سؤال؟
امير: طبعاً ياعمي
فهد: انت طلبت تتجوزها عشان تقدر تساعدها ولا عشان هي شبه مريم الله يرحمها؟
امير بصله: صدقني مش عارف انا فجأة لاقيت نفسي بقولها تتجوزيني
فهد: بص يا امير انا معاك في حاجة هتعملها والخطوة دي جميلة وخصوصا في حقها
امير: بس ذي ماقولت لحضرتك جوازنا على الورق وبس ولفترة معينة.
فهد ابتسم: عمك اللي قاعد ادامك دا قال الكلام دا من سنين ومقدرش ينفذ ولا كلمة منه عشان عشق ليل وانا واثق ومتأكد انك هتبقى كدا
امير: وتفتكر لو انا حبيت كدا هي هتحب؟
فهد: اكيد بس هتحتاج شوية وقت، عاوز تروح ليها امتى؟
امير: بكرة
فهد: طب والفرح عاوزه امتى؟
امير بحزن: انا مش عاوز فرح
فهد: ماينفعش يا امير انك تحرمها من يوم ذي دا.
امير: تمام ياعمي لو هي حبت كدا انا موافق بس فرح عائلي وبس وذي ماقولت لحضرتك محدش يعرف وحتى الجاسر
فهد: حاضر ماتقلقش
في المكتب عند مهاب قاعد يتابع الاوراق اللي ادامه اللي يخص القضية اللي تبع كرم الصياد
السكرتيرة دخلتله: مستر مهاب احب اعمل لحضرتك فنجان قهوة؟
مهاب: ايوا ياريت ومش عاوز اي حد يدخل عليا
السكرتيرة: حاضر
السكرتيرة خرجت تعمل القهوة ومهاب فضل يتابع الشغل ومركز جداً.
في الجامعة هدى ورنا قاعدين سوا بين المحاضرات
هدى: مش ناوية تقوليلي ليه مهاب وصلك؟
رنا: انا اللي طلبت منه كدا
هدى: طب ليه؟
رنا: مش عارفة ياهدي لاقيت نفسي بطلب منه يوصلني وقولتله كمان انك قولتلي مش هتروحي الجامعة
هدى بإستغراب: طب ليه ياحبيبتي؟
رنا: حسيت ان عاوزة اقرب منه
هدي: انتي اللي بعدتيه عنك يارنا
رنا: انا ماكنتش اعرف ان شايفاه حبيب مش بس أخ
هدى: طب هتعملي ايه؟
رنا مش عارفة بس عاوزة اعرف هو لسة بيحبني ولا خلاص بطل يحبني
هدى: طب يلا ندخل المحاضرة وبعدين نشوف
في القصر البنات قاعدين سوا وطبعا معاهم ديما وريما لانهم لسة موجودين وهاجر رجعت بيتها من الصبح بدري
ريما: ماتيجوا ننزل الجنينة انا زهقانة
حور: يلا ننزل
البنات نزلت وقعدوا مع بعض تحت، اما بالنسبة لليث فبيجهز شنطة هدومه وليل دخلتله
ليل: باردوا ياليث هتمشي.
ليث بصلها وقعد على السرير: لو سمحتي ياماما انا مش عاوز كلام انا هكون مرتاح كدا
ليل قعدت جمبه: حبيتها؟
ليث بصلها: انتوا ليه مصممين ان حبيتها
ليل ابتسمت: عشان انا شايفاك الفهد ياليث شايفة فيك ابوك اول ما دخلت حياته كان كدا، كان قاسي اوي في حقي رغم كل الحنية والطيبة اللي جواه وانت بتعمل كدا دلوقتي
ليث: لا ياماما انا مش الفهد انا الليث
ليل: بس انت ابنه، انت واخد طباعه ياحبيبي.
ليث: انا محتاج اكون لوحدي شوية ياماما يمكن اعرف انا عاوز ايه
ليل: ماشي ياحبيبي واحنا اسبوعين وهنيجي
ليث: تمام
ليث قام تاني يلم في هدومه وخلاص هينزل وليل فضلت ماسكة في دراعه لحد تحت وفهد وامير داخلين
فهد: باردوا هتمشي؟
ليث: ايوا
امير: انت رايح فين؟
ليث: رايح شرم
امير: ليه في ايه؟
ليث: مافيش يا امير.
ليث سابهم وخرج وراح فك ماكس وفتحله باب العربية ودخله ورجع قفل الباب ولف عشان يركب لمح البنات قاعدين ومن ضمنهم چويرية طبعاً وعنيها جات في عيون ليث اللي هرب من عيونها وركب عربيته وخرج بارة القصر
في المساء، وكل الرجالة قاعدين متجمعين في القصر ودي اول مرة ليث يكون بعيد عنهم بعد الجيش
جاسر: هو ليه سافر؟
فهد: هو حابب كدا فمقدرتش اقوله لا
اكمل(الكبير): بس دي اول مرة ياخد قرار ذي دا.
اكمل(الصغير): ليث طول الوقت كدا ياعمي بياخد قراراته ومحدش بيقدر يدخل فيها
شريف: طب ايه سبب السفر المفاجئ دا
جاسر: سيبوه براحته واحنا كلها اسبوعين او تلاتة ونروحله على ما الولاد يخلصوا امتحانات نص السنة
مراد: طب فيه حاجة زعلته؟
فهد بغضب: هو حر بقى انا تعبت
عبدالعزيز: اهدي يافهد مش كدا
فهد: حقكم عليا بس انا حقيقي مابقتش عارف هو عاوز ايه وانا مبعرفش اتكلم معاه هو عندي وقراراته من دماغه معرفش طالع لمين دا.
ادهم غصب عنه ضحك: هذا الليث من ذاك الفهد
فهد: يعني انا كنت كدا؟
ليل كانت جوا وطلعت سمعتهم: ايوا واكتر كمان ياحبيبي
ادهم ضحك اوي: مراتك شهدت عليك
فهد بصلها بغضب: ماشي ياليل
اكمل(الكبير): طب ما اروحله انا وجاسر من دلوقتي
ادهم: والشغل؟
اكمل(الكبير): على اساس اننا ملتزمين اول بمواعيد الشغل احنا بنخلص كل الشغل واحنا هنا
فهد: تمام روحوا وخليكم معاه بس انتوا بس من غير نور ولا ملك.
ملك خرجت: نعم يافهد بتقول حاجة ياحبيبي
فهد غصب عنه ضحك: انا عاوزهم جمبه يالوكا عشان يقدروا يفهموا هو ماله لكن لما انتوا تروحوا معاهم هتشغلوهم ومش هيبقوا فايقين لليث
في دبي عند مروان قاعد مع سمير
سمير: انا هنزل معاك
مروان: ايوا كدا بقى ننزل سوا وهنبدأ شغل هناك سوا
سمير: تمام انت هتعمل خطوبة على طول؟
مروان: ايوا ان شاء الله طالما بقى هي موافقة يبقى خير البر عاجله
سمير: ربنا يتمملك على خير يارب.
مروان: يارب ياصاحبي وعقبال فرحتي بيك ان شاء الله
أكمل راح لكارما عشان يتكلم معاها في علاقتهم
كارما: وحشتني اوي
اكمل: وانتي كمان
كارما: اتقابلنا في البيت ليه مش كنا نخرج برة
اكمل: الموضوع اللي عاوزك فيه مش هينفع برة
كارما بقلق: ايه هو الموضوع؟
اكمل: انا لو طلبت منك طلب تنفذيه؟
كارما: على حسب الطلب
اكمل: يعني ايه؟
كارما: يعني لو الطلب دا انا هقدر انفذه يبقى تمام لكن لو مش هقدر يبقى لا
اكمل: ولا حتى عشاني؟
كارما: هو ايه الموضوع يا اكمل؟
اكمل: عاوزك تلبسي الحجاب
كارما بإستغراب: الحجاب؟!
اكمل: ايوا ياكارما ودا طلبي
كارما: وانا مش موافقة
اكمل: ليه؟
كارما: كدا يا اكمل انت عارفني وانا مش محجبة وانت عارف ان مش بحب حد يفرض عليا حاجة
اكمل بعصبية: بس دا الصح ياكارما انا حابب مراتي شعرها مايبانش لحد غيري
كارما بعصبية وبصوت عالي: وانا مش موافقة يا اكمل
سماح امها خرجت على صوتهم: في ايه ياولاد صوتكم عالي ليه.
كارما راحت وقفت جمب امها: تعالي يامامي شوفي اكمل بيطلب مني ايه
سماح بصت لأكمل: طلبت ايه يا اكمل؟
اكمل ماردش عليها لانه اضايق من تصرف كارما
كارما: انا هقولك ياماما، اكمل بيطلب مني اتحجب
سماح ببرود: ليه يا اكمل ما انت عارف انها مش محجبة ليه تطلب دا منها
اكمل بإستغراب: هو حضرتك شايفة ان طلبي غلط؟
سماح: مش حكاية غلط او صح الحكاية ان دي حرية شخصية ليها، هي رافضة تلبسه الفترة دي وممكن تلبسه بعدين.
كارما ردت: لا دلوقتي ولا بعدين
اكمل: افهم من كدا ان حتى بعد الجواز مش هتلبسيه
كارما: ايوا يا اكمل وانا كدا ومش هتحجب
اكمل قام من مكانه وبصلها: تمام ياكارما انا همشي دلوقتي
اكمل مشي وهو مضايق اوي ومخنوق منها
سماح لكارما: اضحكي عليه بكلمتين وبلاش تضيعيه من ايدك
كارما: يعني عاجبك تصرفاته، هو يعني عشان عيلته كلها محجبين يفرض عليا حاجة مش عاوزاها ليه.
سماح بتتكلم بطريقة الحموات العقارب: ياعبيطة اللي ذي اكمل دا كلمة بتوديه وكلمة بتجيبه انتي بس اضحكي عليه بكلمتين ولما تتجوزوا مش هيوافق يطلقك عشان سبب ذي دا
كارما بضيق: طيب ياماما لما اهدى هكلمه
حور قاعدة في الجنينة لوحدها ولمحت عربية اكمل داخلة من بوابة القصر، اكمل ركن عربيته بإهمال وفضل قاعد فيها سرحان وبيفكر في اللي حصل.
حور عاوزة تقوم تطمن عليه وعشان كدا قامت راحت عند ازاز العربية وبدأت تكلمه بس هو سرحان خالص
حور بتحرك ايديها ادام وشه: اكمل
اكمل فاق من سرحانه وبصلها: في ايه؟
حور: انت كويس؟
اكمل نزل من العربية ووقف ادامها ومسك ايديها: ايوا ياحور انا كويس ليه؟
حور سحبت ايديها بهدوء وبصتله: اصل يعني فضلت قاعد في العربية
اكمل: عادي مافيش حاجة
حور: ماشي.
حور لسة هتمشي بس هو مسك ايديها تاني وهي باردوا سحبتها: ليه بتسحبي ايدك من ايدي؟
حور بتوتر: عشان ماينفعش يا اكمل ودا حرام عن اذنك
حور سابته ودخلت وهو واقف سرحان في الفرق اللي بين بنات عيلته وبين كارما، أيهم دخل بعربيته واخد باله باللي واقف سرحان
أيهم نزل من العربية وقرب لأكمل: انت واقف كدا ليه؟
اكمل: أبداً مافيش بقولك انا هحصل ليث
أيهم: ليه هو ليث فين؟
اكمل: راح شرم من شوية
أيهم: نعم؟ من غيري.
اكمل ابتسم: انا محتاج اروح يومين
أيهم: ليه وهو اصلا راح ليه؟
اكمل: تعالى بس نطلع نجهز هدومنا ونروحله
في البيت عند سارة وناجي قاعدين سوا ومرام نايمة في اوضتها
سارة: عاوزة اتكلم معاك في موضوع
ناجي بصلها بشك: لو نفس الموضوع بتاع كل مرة بلاش
سارة: والله ياحبيبي هما عاوزينا نروح هناك
ناجي: وانا قولتلك من اول ما اتخطبنا ان حابب يكون ليا بيتي الخاص بيا وبعدين خلاص هننقل لليلا بتاعتنا.
سارة: انا مش بتكلم ان هنا شقة وهناك قصر او بتكلم اصلا على شكل المكان انا بحب لمتهم وعاوزة نكون كلنا سوا ياحبيبي
ناجي بعصبية: مش عاوز كلام في الموضوع دا تاني
ناجي سابها وراح ياخد دش
ليل قالت هتروح تأكل ماكس بس اتفاجأت إنه مش موجود واستغربت اوي فقالت يمكن يكون عمر وسامر اخدوه عندهم في الاوضة اللي هما لسة فيها فعشان كدا راحت ليهم.
ليل خبطت ودخلت وشافتهم نايمين وبتبص بعنيها في الاوضة مش شايفة اي حاجة، ليل جريت على جوا عشان تسأل فهد وهو كان في المكتب ومعاه أدهم
ليل دخلت من غير ماتخبط: فهد
فهد وقف بقلق: في ايه ياليل؟
ليل: ماكس مش في الجنينة
ادهم: ازاي دا؟
فهد وادهم جريوا على بارة واتقابلوا في چويرية وهي مستغربة انهم طالعين بيجروا
چويرية: في ايه ياخالو؟
فهد: ماشفتيش ماكس
چويرية كانت شايفة ليث وهو ماشي واخد ماكس: ايوا ليث اخده وهو ماشي.
فهد بغضب: اه يا ابن ال
ادهم بعصبية: هو حد سمحله ياخده اصلا
ليل: خلاص بقى المهم اننا اطمنا عليه
ادهم بصلها بغضب وبص لفهد: عاجبك تصرفات ابنك يعني هو من امتى وحد بياخد ماكس لا وكمان يروح شرم
فهد: انا قولت مية مرة الكلب دا محدش يخرج بيه من غير اذننا واحنا اصلا كدا كدا بناخده معانا شرم
ليل: خلاص ياجماعة مايمكن هو حب ياخده وبعدين يقولكم
فهد: يعني انتي شايفاه اتصرف صح.
ليل بصتله: خلاص يافهد دا موضوع عادي يعني مش محتاج خناق
ادهم بص لفهد: رد انت بقى
فهد بصله وضحك: ماهو بصراحة احنا مزودينها شويتين
اكمل وأيهم نازلين بشنط الضهر بتاعتهم وراحين على شرم
فهد: انتوا راحين فين؟
أيهم: للأستاذ اللي مشي
ادهم بغضب: والشركة يازفت
اكمل ضحك: البركة فيكم
فهد بيبص حواليه وأيهم بدأ يخاف
أيهم لأكمل: هو أبوك بيدور على ايه
أكمل بيبلع ريقه بصعوبة: تفتكر هيضربنا
أيهم: شكله كدا.
فهد بعصبية: يلا ياكلب منك له اطلعوا طلعوا الشنط دي وحصلوني على اوضة الرياضة
أيهم: ابوس ايدك ياعمي بلاش انا دا انا داخل على جواز يرضيك جوز بنتك يكون متعلم عليه
فهد: اه وانا هبدأ بيك بقى
اكمل ضحك اوي: البس يامعلم
ادهم: يلا يابابا عشان هبدأ بيك
ليل بصدمة: هو انتوا هتعملوا ايه في العيال
أيهم راح وقف وراه: والنبي ياطنط ليل الحقينا عشان كدا كتير والله.
اكمل افتكر حاجة: وبعدين انتوا نسيتوا اننا راحين بكرة مع أمير عشان يخطب بقى بزمتكم نروح للناس واحنا وشنا مشلفط
أدهم: مشلفط؟ هو انتو بتجيبوا الكلام دا منين
ايهم: من التي ي ياوالدي
ليل ضحكت أوي: والنبي ماتلعبوا معاهم سبيهم حلوين
آخر الليل وصل مهاب واتفاجئ بحاجة اول مادخل واضايق جداً
مهاب اتفاجئ برنا نايمة في الريسيبشن وراح عندها وبدأ يصحيها بهدوء
رنا بنوم: امممم
مهاب: ايه اللي منيمك هنا يارنا.
رنا فتحت عنيها وقامت مفزوعة: مهاب؟
مهاب بهدوء: ردي على سؤالي نايمة هنا ليه؟
رنا: ابدا انا كنت قاعدة بتفرج على المسلسل ونمت
مهاب: يعني انتي سايبة الشاشة اللي في اوضتك ونازلة هنا؟
رنا بتوتر: اصل الشاشة دي اكبر من اللي عندي فبحس ان انا جوا المسلسل
مهاب بشك: عشان كدا نمتي هنا؟
رنا: ايوا وكويس انك صحتني عشان اطلع انام في اوضتي
مهاب مسك ايديها لحقها قبل ماتمشي: بصيلي
رنا بصتله بتوتر: نعم.
مهاب قرب من ودانها واتكلم: ماتتكررش تاني
رنا بخجل: حاضر
مهاب ساب ايديها وحرك شعرها لورا ودنها: يلا على فوق
رنا جريت على فوق ودخلت اوضتها وقفلت الباب وفضل واقفة وراه وايديها على قلبها: والله قلبي هيقف
في آخر الليل في وقت متأخر، ليث قاعد على شط البحر وماكس قاعد جمبه
ليث قام ومسك سلسلة ماكس ومشي جمبه وفي طريقه للفندق الخاص بيهم وهو داخل الفندق شاف بنت بتتخانق مع سواق تاكسي.
ليث بص أوي للبنت اللي واقفة وابتسم: باردوا لسة فيكي الحركات دي.