رواية مقبرة الحب الأول للكاتبة جيهان عيد الفصل الثالث والثلاثون
عمر: ها يا عزة قررتى تسمى الولد إيه؟
عزة باندفاع: عمر، باعشق الاسم ده، وعايزاه يفضل معايا طول النهار أردد فيه، انت ما تعرفش بأحبك قد إيه يا عمر؟
عمر: لا عارف.
عزة: لا مش عارف، أنا باحبك أكتر من أى حد في الدنيا، حتى أكتر من أولادى، مهما تتخيل بعقلك مش نقطة في بحر حبى لك.
عمر وهو يقبل يدها: والله عارف.
أذابت الحركة جسد عزة ودكت كل حصونها فتصببت عرقا وقالت بصوت هامس: ياه يا عمر، انت عارف البوسة دى عندى بكل كنوز الدنيا.
عمر: على كدة بقى انتى هتبقى مليونيرة، خصوصا أنها مش هتبقى آخر مرة.
عزة: بس هتفضل دى أغلى مرة فيهم.
عمر: عشان أول مرة، دايما أى حاجة بنعملها أول مرة بيبقى ليها طعم مختلف، أول رحلة روحناها في المدرسة، أول لعبة لعبنا بيها، أول مرة نحب.
ارتبكت عزة وشعرت باهتزاز نبرة صوت عمر الذي تدارك نفسه وقال: بس بعد كدة بنروح أماكن أحسن الف مرة من اللى روحناها في أول رحلة، وبنجيب حاجات أغلى بكتير من أول لعبة، وبنقابل ناس نحبهم بالعشرة والمواقف حب عاقل يعيش طول العمر.
عزة: راهنت عليك وما خسرتس يا عمر.
عمر: انتى عمرك ما تخسرى يا عزة، انتى بنت أصول وأنا محظوظ بيكى محظوظ إنك في حياتى.
عزة: أنا اللى محظوظة بيك يا عمر.
عمر: ناوية تسمى الولد إيه؟
عزة بدلال: ما قلت عمر.
عمر: هو عمر واحد، أنا بأغير، وأخاف تنشغلى عنى بيه.
عزة: ولا كل عيال الدنيا تشغلنى عنك يا عمر.
عمر: أنا مش قد الكلام الحلو ده.
عزة: أنت قد الدنيا كلها.