رواية أحزان رهف للكاتبة سحر فرج الفصل السادس

رواية أحزان رهف للكاتبة سحر فرج الفصل السادس

وفعلا راح عمر الكافيتريا علشان يجيب حاجه لمامته واخواته والضيف اللى كان موجود معاهم وبعد شويه رجع ومعاه بعض العصاير والسندوتشات وقدم لوالدته ولحسام.
ولرغد اخته ورهف كمان اللى فتحلها علبه عصير.
حسام: شكرا يا عمر تعبت نفسك ليه مكنش ليه لزوم والله.
عمر: ولا تعب ولا حاجه احنا عندنا كام رهف يعنى.
حسام: ان شاء الله هاتبقى زى الاول وافضل وترجع على البيت.
الام: يارب يا حسام يا ابنى، واتفضل اشرب العصير.

حسام فتح علبه العصير علشان يريح والده رهف ويادوبك شرب منها حابه صغيرين وسابها على التربيزة اللى كانت اودامه
وشويه والدكتور فارس دخل وسلم عليهم كلهم واتفاجأه بحسام صاحبه واستغرب وجوده.
وقرب من رهف واطمن عليها واتاكد انها بتاخد علاجها في مواعيده مضبوط. وعلى طول طمن عمر ووالدتها.
الام: طمنى يا دكتور بنتى اخبارها ايه دلوقتى؟
فارس: اطمنى يا حاجه رهف بخير وباذن الله كلها كام يوم وهاتبقى بخير.

الام بفرحه: الحمد لله وربنا يطمنك زى ما طمنتى عليها يارب.
فارس: ربنا يخليكى ليهم يا حاجه ومتشكر جدا.
حسام عيونه كانت مركزه على رهف وده اللى خلى فارس ياخد باله من كده.
فبصله وقال: مش يالا بينا يا حسام تعالى نروح على مكتبى كنت عاوز اسألك على حاجه مهمه.
حسام بصله بغيظ وقال: تمام ماشى.
حسام بص لعمر ووالدته وقال استأذن انا يا جماعه والف سلامه على الانسه رهف ولو عوزتوا اى حاجه اتمنى انكم تتصلوا بيا.

وده رقمى يا عمر اعتبرنى زى اخوك بالضبط تمام يا عمور.
عمر ابتسم وخرج معاه ووصلوا لحد باب المستشفى وفضل لحد ما ركب حسام عربيته ومشى بيها.
وفى الاوضه عند رهف الام بصتلها
وقالت: بسم الله ما شاء الله على المهندس حسام ده شكله أدب وأخلاق وتربيه وذوق وشكله كمان ابن ناس محترمه وبيعرف في الاصول كويس اوى ولاحظت يا رهف انه عمال يبص عليكى جامد.
رغد: اه يا ماما عندك حق فعلا.

حسام طول أيه!؟ وعيون ايه؟ وشعر ايه؟ ولا غمازاته يا لهوووووى.
رهف: وشها احمر جدا من الخجل ومن كلامهم وبصت بغيظ وقالت: اتلمى يا رغد عيب، وملوش لازمه الكلام اللى انتى بتقوليه ده.
وفجأه....
قاطعهم صوت جرس تليفون رهف فمسكته على طول وعرفت أن اللى بيتصل سلمى زميلتها فاردت عليها.
رهف بتعب وارهاق: اهلا يا سلمى.
سلمى: ايه يا ست رهف يا كسلانه مش قولتى انك جايه النهارده الكليه مجتيش ليه يا بنتى؟

رهف: ازيك يا سلمى وازى ريهام، والله يا بنتى ولا كسلانه ولا حاجه وكنت جايه ولبست ونزلت فعلا من البيت ويادوبك وصلت اودام الكليه وحصلى حادثه.
سلمى بصدمه: حادثه! حادثه ايه يا رهف احكيلى بسرعه في ايه والاهم طمنينى انتى كويسه؟
رهف: اهدى يا بنتى واطمنى انا الحمد لله كويسه متقلقش.
وبدأت رهف تحكى لسلمى كل اللى حصل معاها.

سلمى بخوف وقلق: الحمد لله يا حبيبتى والف مليون سلامه عليكى يا قلبى وانشاء الله هاكون عندك الصبح من بدرى انا وريهام علشان نطمن عليكى.
رهف: ما تتعبوش نفسكم يا بنتى انا بخير الحمد لله يا سلمى.
سلمى: تعب ايه بس متقوليش كده انتى اختى يا رهف
رهف: ما اتحرمش منكم ابدا يا روح قلبى وشويه وقفلت معاها.

عمر كان طلع ليهم تانى بعد ما وصل حسام لتحت، وفضلوا قاعدين شويه مع بعض كلهم وبعد شويه والدته قالته يالا يا عمر خد رغد واتوكلوا على الله وارجعوا البيت.
عمر رد وقال: خلينى معاكم شويه يا امى جايز تحتاجوا اى شىء من تحت.
الام: هانحتاج ايه بس يا حبيبى زمانكم تعبتوا ارجعوا البيت واستريحوا وانا هافضل مع اختك هنا ما تقلقش يا ابنى.
رغد راحت ناحيه رهف وقالت: طيب مش عاوزة منى اى شىء يا رورو؟

رهف ابتسمت وقالت: تسلميلى حبيبتى متنسيش تجيبى اللى قولتلك عايه الصبح وانتى جايه.
عمر بهزار: طيب قوليلى انا وسيبك من البت رغد وانا اجيبه
رهف ضحكت وقالت: دى حاجات بنات يا استاذ عمر.
الام: يالا ابنى خد اختك وانزلوا بقى وسيبوا اختكم ترتاح لها شويه.
عمر: حاضر يا ست الكل ولو عزتم اى شىء اتصلى عليا على طول وثوانى واكون عندكم في غمضه عين.
الام: ماشى يا حبيبى تسلم يارب وربنا ما يحرمنى منك ولا من اخواتك ابدا.

وفعلا عمر خد أخته رغد وخرجوا من الاوضه ونزلوا من المستشفى وروحوا على البيت على طول.
وفضلت مامته بايته مع رهف في المستشفى علشان تبقى مطمنه عليها.
وفى اخر الليل على الساعه عشرة ونصف دخل الدكتور فارس عندهم بعد ما خبط الاول على الباب علشان يكشف ويطمن على رهف.
حسام: مساء الخير.
الام: مساء النور يا ابنى اتفضل.
حسام: ازيك يا حاجه؟ وازى المريضه بتاعتنا دلوقتى؟
الام: الحمد لله بخير يا دكتور.

فارس قرب من رهف وقال: عامله ايه يا دكتورة رهف دلوقتى؟
رهف حاولت تعدل نفسها في السرير وبصتله وقالت: الحمد لله يا دكتور فارس احسن شويه من الصبح وحسيت أن الالم بدأ يخف شويه بعد العلاج، بس حاسه ان جسمى مدشدش ومكسر شويه.
فارس: دى حاجه طبيعيه متقلقيش منها ومتنسيش الخبطه بتاعه العربيه ووقعتك على الارض ساعتها اكيد هي اللى عامله التكسير اللى في الجسم ده، والحمد لله انها جت على اد كده.

الام: الف حمد وشكر ربنا كبير.
فارس قرب من رهف واستأذن منها علشان يكشف عليها.
وبعد ما خلص الكشف طمن رهف ومامتها انها افضل ونبه عليها انها تاخد العلاج بانتظام وتاكل كويس، وبلغها ان هايخلى الممرضة تيجيلها وتديها حقنه مسكنه لتكسير العضم اللى هي حاسه بيه وكمان علشان تنام كويس.
واستأذن علشان يكمل كشف على باقى المرضى، ولو احتاجوا اى شىء هو سهران في مكتبه.

واول لما خرج راحت الام على الباب وقفلته وراه ودخلت على الحمام علشان تتوضأ وتصلى وكمان تشكر ربنا وتحمده على كل شىء وتدعى لرهف انها تقوم بالسلامه وان ربنا يحفظ عيالها ويرحم جوزها.
وشويه والممرضه جت وادت لرهف الحقنه وبعدها بشويه نامت على طول بعد ما الحقنه بدأت تعمل مفعولها في الجسم.

اشرقت شمس يوم جديد في الصباح الباكر ونورت بنورها غرفه رهف اللى كانت صحيت هي ومامتها من بدرى علشان ميعاد العلاج. وفجأه سمعوا صوت خبت على الباب.
الام قامت من مكانها وراحت فتحت الباب وشافت اودامها شاب واقف ومعاه بوكيه ورد جميل اوى.
الشاب: غرفه الانسه رهف؟
الام باستغراب: اه يا ابنى خير؟
الشاب: بوكيه الورد ده ليها يا افندم اتفضلى.
الام مدت ايديها وخدته وشكرته وقفلت الباب على طول.

رهف بأستغراب بصت للورد وبصت لمامتها وقالت: ايه ده يا ماما مين جاب بوكيه الورد ده؟
الام؟ مش عارفه يا رهف يا بنتى بس استنى كده اصل في كارت جواه.
فتحت الام الكارت وقرأت الاسم اللى موجود وعرفت أنه من المهندس حسام.
الام: ده المهندس حسام هو اللى بعته.
خدى يا بنتى شوفى كاتب ايه على الكارت واديته لرهف وقرأت رهف الكلام الموجود وهو
صباح الخير.
يارب تكونى أفضل دلوقتى وربنا يقومك بالسلامه
م/ حسام.

الام: والله ابن حلال ويعرف في الاصول كتر خيره.
رهف بخجل: فعلا كتر خيره.
فجأه سمعوا خبطه صغيرة على الباب والام سمحت للى بيخبط انه يدخل وكان الدكتور فارس.
الدكتور فارس صبح عليهم وكشف على رهف وطمن مامتها واستأذن وخرج.
وشويه جت ريهام وسلمى اصحاب رهف وقعدوا معاها واطمنوا عليها وفضلوا يضحكوا ويهزروا ويرغوا مع بعض لحد ما باب الاوضه خبط وراحت سلمى تفتح وتشوف مين واتفاجأت بشخص واقف اودامها.
حسام: صباح الخير.

سلمى باستغراب بصتله وبصت لرهف وقالت: صباح النور مين حضرتك؟
الام اول لما سمعت صوته قامت وقفت وراحت ناحيه الباب وابتسمت لحسام وقالت: صباح الخير يا حسام يا ابنى اتفضل.
حسام: تسلمى يا حاجه وعيونه جت على رهف وابتسم وقال: يا ترى اخبار الانسه رهف ايه النهارده.
جريت سلمى ووقفت جنب ريهام وغمزت لرهف بعيونها.
الام: بخير يا حسام يا ابنى ودكتور فارس لسه كان هنا من شويه وطمنا كتر خيره.

حسام عيونه على رهف وقال: طب الحمد لله وربنا يتم شفاها على خير باذن الله.
الام: يارب ياااارب.
حسام بص لرهف وقال: اخبارك ايه يا انسه رهف النهارده؟
رهف بتوتر من نظرات سلمى وريهام ليها ولحسام ردت وقالت: الحمد لله احسن دلوقتى وبقيت افضل بكتير من امبارح.
حسام: طب الحمد الله ويارب تقومى بالسلامه.
رهف: يارب.
الام لاحظت توتر بنتها فقالت: تعبت نفسك ليه يا ابنى وجيت مكنش ليه لزوم والله وكفايه تعبك معانا امبارح.

حسام: ولا تعب ولا حاجه يا حاجه تعبكوا راحه وقالها وهو بيبص على رهف. كل ج
ولاحظت ريهام وسلمى النظرات اللى بينهم و فضلوا يبتسموا لبعض
وبعد شويه استأذن حسام انه يمشى وخرجت الام معاه توصله لحد باب الاسانسير.
لكن ريهام وسلمى فضلوا يضحكوا ويقلدوا حسام ورهف وهما بيتكلموا وبيبصوا لبعض وعرفوا منها ان هو ده اللى خبطها بالعربيه وكان السبب في اللى حصل لرهف.
سلمى غمزت لرهف وقالت: شكله حصل يا ست هانم.

رهف: بكسوف هو ايه اللى حصل يا بايخه انتى.
سلمى بضحك قعدت جنب رهف
وقالت: اللى بيحصل من النظرة الاولى يا قمر
ريهام: هو حصل بس.
ده حصل وحصل وحصل
وفضلوا التلت بنات يضحكوا جامد.
وعدى يومين على الوضع ده وكل يوم يجى حسام لرهف ويطمن عليها.
لحد ما صحه رهف اتحسنت ورجعت لبيتها بعد ما اطمن الدكتور فارس انها بقت كويسه فعلا وسمح لها بالخروج.