قصص و روايات - قصص رومانسية :

حلقة خاصة من قصة انتقام الحب بمناسبة شم النسيم بقلم أمنية الريحاني

حلقة خاصة من انتقام الحب بمناسبة شم النسيم

حلقة خاصة من قصة انتقام الحب بقلم أمنية الريحاني

بمناسبة شم النسيم

أمنية الريحاني المبدعة تفاجئنا اليوم مرتين، الأولى بهذه التحفة الرائعة: فصل خاص هدية بمناسبة شم النسيم ( وللذين لا يعلمون: هو عطلة وطنية مصرية بمناسبة بداية فصل الربيع ). والثانية سنعلم في نهاية هذا الفصل أو الحلقة الخاصة بأن هناك جزء ثالث من قصة انتقام الحب قيد الكتابة الآن، والذي سنتحرق شوقا من الآن لنقرأه ونستمتع به.

دون رغي كثير أترككم مع الحلقة الخاصة من من انتقام الحب بمناسبة شم النسيم.

 

فى فيلا عاصم:
تصحى أميرة من نومها بتبص جنبها مبتلاقيش عاصم، بعد شوية بيخرج عاصم من الحمام وهو منتعش وفايق
عاصم: صباح الخير ، يا اميرتى
أميرة: صباح النور يا عاصم، إيه الى صحاك بدرى كده
عاصم: إيه يا أميرة إنتى نسيتى ولا إيه النهاردة شم النسيم يا حبيبتى
أميرة: ما انا عارفة ، بس إيه علاقته بالصحيان بدرى؟
عاصم: ايه علاقته ؟ انتى بتهزرى ، عارفة يعنى ايه شم النسيم ، يعنى ننزل بدرى الجنينة احنا والولاد ، ونفطر البيض الملون وبعدها بشوية نفرش بقى ونديها فسيخ وبصل، ياااه تصدقى جوعت.

اميرة: عاصم حبيبى، انت متأكد انك عاصم الشاذلى ابن إبراهيم الشاذلى ، انا شاكة فيك والله دا انا الى متربية فى السيدة زينب مبعملش زيك كده
عاصم: يا حبيبتى ادام الفسيخ مفيش بيه ولا باشا الكل أدامه بيضعف
أميرة: طب خد بالك ، انا مش هقدر اكل من الحاجات دى عشان الحمل انت عارف
عاصم: عارف يا ستى وفاهم ، مش مهم تاكلى المهم نتلم كلنا حوالين سفرة واحدة دا لوحده احساس تانى يا ميرا ، احساس بالدفا والامان ولا نسيتى
أميرة:ياااه يا عاصم ، لسه فاكر
عاصم: مينفعش انسى يا حبيبتى، يالا بقى يا كسلانة قومى زمان الفسيخ ينادينا.

فى عربية حسن :
حسن بيسوق العربية وجنبه بسنت ومعاهم أميرة بنتهم
بسنت: ممكن أعرف إحنا رايحين فين كده؟
حسن: بصى بقى يا حبيبتى انا قعدت سنين عايش معاكم بطريقتكم ، بس انتى قولتيلى عايزة تبدأى معايا من الصفر ، وتجربى عيشتى زمان، انا بقى هوريكى الحياة زمان كانت عاملة إزاى، وازاى رغم قلة الفلوس كنا بنقدر نفرح ونضحك بجد من قلبنا
بسنت مسكت إيده: وانا موافقة ادخل العالم بتاعك يا حبيبى واتعرف عليه وابقى جزء منه كمان ، المهم ابقى معاك يا حسن
حسن بصلها بحب: لا كده احنا هنعمل حادثة يا حبيبتى
بسنت بضحك: لا وعلى ايه؟

فى فيلا عاصم:
الكل قاعد فى جنينة الفيلا ادام سفرة الأكل الى كان كلها رنجة وفسيخ وملوحة ، اما تهانى والدة عاصم قاعدة بعيدة عنهم وحاطة إيديها على انفها فى اشمئزاز و فى ضحك من الجميع
عاصم فى مرح: الله يا جماعة ريحة الأكل تفتح النفس
أميرة بضحك: بالهنا والشفا يا حبيبى
عاصم بص لتهانى: إيه يا ماما، ما تقربى تاكلى معانا
تهانى: انت تسكت خالص ، أكل ايه يا ولد، أنا أكل الأكل ده، ييييااااااى
عاصم: ياى إيه يا أم عاصم بس
تهانى: جرى إيه يا أسمت ، أنتوا ربيتوا الواد ده إزاى

أسمت: والله يا تهانى ، يوم شم النسيم دا كان بيبقى موال ، كان بيقعد هو وطارق الله يرحمه وياكلوا الحاجات دى
عاصم: عمى طارق، ولا يوم من أيامك يا عمى الله يرحمك كان مشجعنى على الأكل ، مش زيكم واحدة حامل والتانية قرفانة
تهانى: بقى عاصم الشاذلى ابن ابراهيم بيه الشاذلى ياكل الحاجات دى
عاصم: عليا النعمة إبراهيم بيه الله يرحمه نفسه لو هنا كان زمانه ضعف أدام الأكل ده ونزل كل ، كله بيضعف أدام الفسيح
أميرة: خلاص بقى يا عاصم متغلسش عليها
عاصم خد لقمة وقربها من تهانى: طب وحياة عاصم ابنك وحبيبك لتاكلى اللقمة دى
تهانى: ابعد يا ولد عنى بالى انت ماسكه ده
عاصم: بقولك وحياة عصومة ابنك
أسمت: خلاص بقى يا تهانى متكسريش بخاطر الواد

مسكت تهانى انفها وغمضت عينيها وكلت اللقمة وبعدها جريت على الحمام وهى بتصوت
عاصم فى ضحك : مفيش فايدة تهانى هانم هتفضل زى ما هى
أميرة: بس انت تقلت عليها يا عاصم علفكرة
عاصم: لما ناكل هروح اصالحها، وانتوا يا ولاد كلوا يالا
طارق: انا باكل اهو يا بابا الاكل ده حلو اوى
عاصم: حبيبى يا طروق طالع لأبوك وجدك طارق يا واد أكيل، امال فين سيف؟
اميرة: نايم فوق تعبان شوية
عاصم: مبتاكليش ليه يا تقوى.؟

تقوى : لا يا بابى ، الاكل دا ريحته وحشة خالص ، مامى ممكن تعمليلى أكل تانى
اميرة: حاضر يا حبيبتى
عاصم: بت يا تقوى شكلك بتقعدى مع تيتة تهانى كتير
أسمت: مفيش فايدة فيك مش هترتاح غير لما تقلب عليك
عاصم: هى مامتك هترجع أمتى من الشقة بتاعتكم ، راحت من الصبح تجيب حاجات ومن ساعتها مجتش
أميرة: لا ما انا عارفة انها هتتاخر اصل اليوم ده كان عيد جوازهم هى وبابا الله يرحمه عشان كده بتحب تقضيه فى البيت عشان تفتكر ذكراها معاه
عاصم: ياه ، مامتك دى إنسانة فريدة من نوعها ، ربنا يباركلك فيها.

فى جنينة الفسطاط:
يوصل حسن ومعاه بسنت واميرة الصغيرة لجنينة الفسطاط ، وبسنت بتبص حواليها
حسن: يالا يا بسبس اقعدى
بسنت: اقعد فين يا حسن؟
حسن: هنا على الأرض ، مالك فى إيه؟
بسنت: أنا الى مالى ، أنت عايزنا نقعد على الارض كده هدومنا هتتوسخ ، وأكيد الارض فيها حشرات
حسن: لا ما أنا عامل حسابى وجايب معايا ملاية نفرشها على الأرض
بسنت: ملاية ؟! لا لا انا مش مصدقة اللى بسمعه

حسن: أقعدى بقى هنقضى اليوم كله فى استغراب خلينا نلحق ناكل ، انا هموت من الجوع
بسنت: طب هو فى مطعم هنا؟
حسن: مطعم إيه يا بنتى ، انا محضرلك حتة أكلة هتاكلى صوابعك وراها
وبالفعل بيقعدوا على الارض وحسن بيبقى جايب معاه رنجة وفسيخ وعيش وبيقعدوا ياكلوا فى الاول بسنت بتبقى قرفانة من الاكل والقعدة لكن مع الوقت بتاخد على المكان وبتبقى مبسوطة ، وبتحب الاكل ، كمان اميرة بتجرى حواليهم وهى مبسوطة وكانها اول مرة تلعب.

حسن: ها إيه رأيك؟
 بسنت: أنا مكنتش متخيلة أنى هبقى مبسوطة كده، رغم بساطة المكان والناس الى حوالينا ، وبغض النظر عن الأكل الغريب اللى اكلتهولى ، بس أنا فعلا حاسة انى مبسوطة مش عارفة ليه؟
 حسن: هقولك ليه يا بسنت، عشان هنا بننسى حاجة اسمها التكلف هنا كل واحد بيبقى على طبيعته ، بيخرج الطفل اللى جواه ، محدش بيبص لحد بيعمل إيه ولا بياكل إيه ولا لابس ايه ، هنا الناس جاية عشان تنبسط ولا بس، انتى عارفة أنا افتكرت لما كنت باجى هنا أنا وابويا وامى الله يرحمهم
بسنت: الله يرحمهم ، أكيد كنت لسه صغير

حسن: يااااه، كنا لسه عيال صغيرين بنروح المدرسة ، ونستنى يوم شم  النسيم عشان نخرج ونيجى هنا وناكل البيض الملون والفسيخ، كنا بنيجى هنا أنا وابويا وامى واميرة ومامتها وشوية اقرايب وصحاب، اللمة كانت بتأكلنا وبتفتح نفسنان كنا بنجرى ونلعب طول النهار مبنحسش بأى تعب، عارفة ... افتكرت مرة كنا بنلعب واحنا صغيرين واميرة وقعت ورجلها اتعورت وساعتها مامتها قعدتها ومخلتهاش تقوم تجرى معانا ، اميرة زعلت اوى ساعتها لانها مكنتش عارفة تجرى معانا ، أنا ساعتها عشان متزعلش فضلت ساندها وبنجرى سوا عشان متحسش ان اليوم ضاع عليها، صحيح انا اتهديت يومها ، بس كنت مبسوط كلنا كنا مبسوطين
حسن كان سارح بذكرياته ومخدش باله من وش بسنت اللى اتغير لما افتكر اميرة وذكرياته معاها، لما حسن انتبه لنفسه ولاحظ ان بسنت اضايقت، مسك ايديها بحب:  بسنت حبيبتى الكلام ده واحنا صغيرين كنا عيال يعنى.

بسنت: ولما كبرتوا ، انتهى
حسن: أنا فاهم قصدك إيه ، بس صدقينى أميرة علمتنى درس عمرى ما هقدر انساه، عرفتنى حقيقة اللى كان بينا ، أنا واميرة عمرنا ما كنا غير أخوات وبس ، اخوات اوى كمان ، خوفى وحبى ليها كان حب تعود وعشرة واخوة ، اميرة دى انا الى ربتها على ايدى، كنت بوصلها المدرسة الصبح كل يوم عشان محدش يضايقها ، ولما كان حد يزعلها كنت انا الى بجبلها حقها عشان انا كنت اخوها ، انا عارف ان جيت فى فترة كنت مغيب ومش عارف بعمل إيه ، بس انا فعلا اتعلمت الدرس كويس أوى وعرفت افرق بين يعنى ايه حب حقيقة ويعنى ايه تعود وعشرة
 بسنت:وانت بقى لقيت حبك الحقيقى زى ما اميرة لقته مع عاصم
حسن باس ايديها: امال أنا قاعد أدام مين دلوقتى
بسنت قابلته بابتسامة كلها حب ، لكنها بصت الناحية التانية ورجعت لسرحانها من تانى.

فى فيلا عاصم :
عاصم بعد يوم طويل من اللعب مع ولاده ومناكفة أمه تهانى ، عدى اليوم عليهم وكلهم مبسوطين وفرحانين ، وبالليل كان قاعد على السرير جنب اميرة
عاصم: يااااه انا حاسس أنى هموت وأنام
اميرة: من كتر اللعب اللى لعبتوا مع ولادك النهاردة
عاصم: أعمل ايه يا ميرا ولاد الإيه دول بينسونى نفسى خالص
أميرة: عارف يا عاصم وانت بتلعب من الولاد بحس أنك رجعت عيل صغير زيهم
عاصم: أنتى بتقولى يا حبيبتى ، انا فعلا لما بلعب معاهم بحس إنى رجعت عيل صغير، متنسيش يا اميرة إنى اتربيت وحيد من غير اخوات العب معاهم ، تقدرى تقولى معشتشت طفولتى ، عشان كده بعتبر ولادى دول مش بس ولادى دول اخواتى، خصوصا الواد طارق ابن الايه بحسه نسخة منى كأنه أنا.

أميرة: انت هتقولى دا طارق دا بالذات كله أنت شكلا وطبعا وحتى اسلوبه فى الكلام
عاصم: امال أنا ليه يا اميرة عايز اجيب عيال كتير عشان اعوض سنين الوحدة الى عشتها
أميرة: ربنا يقدرنى يا حبيبى واملى عليك حياتك ومخليكش تحس بالوحدة تانى ابدا
عاصم مسك ايديها وباسها بحب: من غير ما تحاولى يا اميرة ، انتى مش بس مليتى حياتى ، انتى بقيتى كل حياتى
أميرة بتعب: ربنا يخليك ليا يا عاصم وميحرمنيش من حبك وحن.....آآآه
عاصم: مالك يا اميرة، فى إيه؟
أميرة: مش عارفة يا عاصم، مغص جالى جامد اوى
عاصم: اوعى تكونى بتولدى؟
أميرة: انا لسه فى الخامس هولد ازاى بس.... لا لا ... مش قادرة يا عاصم ... ودينى المستشفى مش قادرة
عاصم: طب يا حبيبتى اسندى عليا يالا بسرعة
اميرة بصراخ: الحقنى يا عاااااصم...آآآآآه ه ه ه ه

ونتقابل مع أميرة عاصم فى إنتقام الحب الجزء الثالث
أمنية الريحانى

 

قد يهمك قراءة حلقات خاصة أخرى:

حلقة خاصة من رواية عشق الزين للكاتبة زينب محمد بعنوان فقدان حفيد

حلقة خاصة من رواية العنيد بمناسبة الفلانتين للكاتبة الشيماء

قصص مشابهة:
الآراء والتعليقات على القصة
قصص و روايات مختارة
قد يعجبك أيضا:
لتصك قصصنا الجديدة ... اعمل لايك لصفحتنا